ಇಪಿಎಫ್ ಪಡೆಯೋರಿಗೆ ಭರ್ಜರಿ ಗುಡ್ ನ್ಯೂಸ್ ಕೊಟ್ಟ ಸಚಿವಾಲಯ!
* ಕೊರೋನಾದಿಂದಾಗಿ ಸಂಕಷ್ಟಕ್ಕೀಡಾಗಿರುವ ಸಾವಿರಾರು ಕುಟುಂಬಗಳಿಗೆ ಆಸರೆ
* ಇಪಿಎಫ್ ಉಚಿತ ವಿಮೆ ಮೊತ್ತ 7 ಲಕ್ಷಕ್ಕೆ ಏರಿಕೆ
* ಕೊರೋನಾದಿಂದ ಸಾವನ್ನಪ್ಪಿದ ಉದ್ಯೋಗಿಯ ಕುಟುಂಬಕ್ಕೆ ನೆರವು
ನವದೆಹಲಿ(ಜೂ.12): ಕೊರೋನಾದಿಂದಾಗಿ ಸಂಕಷ್ಟಕ್ಕೀಡಾಗಿರುವ ಸಾವಿರಾರು ಕುಟುಂಬಗಳಿಗೆ ಆಸರೆಯಾಗುವ ನಿಟ್ಟಿನಿಂದ ನೌಕರರ ಭವಿಷ್ಯನಿಧಿ ಸಂಸ್ಥೆ- ಇಪಿಎಫ್ಒ ಇತ್ತೀಚೆಗೆ ಉದ್ಯೋಗಿಯ ಠೇವಣಿ ಆಧಾರಿತ ವಿಮೆ (ಇಡಿಎಲ್ಐ)ಯೋಜನೆಯ ಗರಿಷ್ಠ ಮೊತ್ತವನ್ನು 7 ಲಕ್ಷ ರು.ಗಳಿಗೆ ಏರಿಕೆ ಮಾಡಿದೆ. ಈ ಸೌಲಭ್ಯವನ್ನು ಪಡೆಯಲು ನೌಕರರು ಯಾವುದೇ ಹೆಚ್ಚುವರಿ ವೆಚ್ಚವನ್ನು ಭರಿಸಬೇಕಾಗಿಲ್ಲ ಎಂದು ಕಾರ್ಮಿಕ ಸಚಿವಾಲಯ ತಿಳಿಸಿದೆ.
ಇಪಿಎಫ್ ಯೋಜನೆಯ ಎಲ್ಲಾ ಗ್ರಾಹಕರಿಗೆ ಇಡಿಎಲ್ಐ ಯೋಜನೆಯ ಅಡಿಯಲ್ಲಿ ವಿಮಾ ಸೌಲಭ್ಯ ಒದಗಿಸುವುದು ಕಡ್ಡಾಯವಾಗಿದೆ. ಒಂದು ವೇಳೆ ಉದ್ಯೋಗಿ ಸ್ವಾಭಾವಿಕವಾಗಿ, ಕಾಯಿಲೆಯಿಂದ ಅಥವಾ ಅಪಘಾತದಿಂದ ಸಾವಿಗೀಡಾದ ಸಂದರ್ಭದಲ್ಲಿ ನಾಮಿನಿಗೆ 7 ಲಕ್ಷ ರು. ಹಣ ಲಭ್ಯವಾಗಲಿದೆ.
ಈ ಸಂಬಂಧ ಇಪಿಎಫ್ಒ ಇತ್ತೀಚೆಗೆ ಉದ್ಯೋಗಿ ಸಾವಿಗೀಡಾದ ಸಂದರ್ಭದಲ್ಲಿ ನೀಡುವ ಕನಿಷ್ಠ ಮೊತ್ತವನ್ನು ಕನಿಷ್ಠ ಮಿತಿಯನ್ನು 2 ಲಕ್ಷದಿಂದ 2.5 ಲಕ್ಷಕ್ಕೆ ಹಾಗೂ ಗರಿಷ್ಠ ಮಿತಿಯನ್ನು 6 ಲಕ್ಷದಿಂದ 7 ಲಕ್ಷಕ್ಕೆ ಏರಿಕೆ ಮಾಡಿದೆ. ಸಾವಿಗೂ ಮುನ್ನ ಕಳೆದ 12 ತಿಂಗಳಿನಲ್ಲಿ ಉದ್ಯೋಗಿ ಪಡೆದಿದ್ದ ವೇತನಕ್ಕೆ ಅನುಗುಣವಾಗಿ ವಿಮಾ ಕವರ್ ಇರಲಿದೆ.