ನವದೆಹಲಿ(ಫೆ.02): ಆನ್​ಲೈನ್​ ಶಾಪಿಂಗ್ ಪ್ರೀಯರಿಗೆ ಕೇಂದ್ರ ಸರ್ಕಾರ ಶಾಕ್ ನೀಡಿದೆ.  ಇ-ಕಾಮರ್ಸ್ ಗೆ ಸಂಬಂಧಿಸಿದಂತೆ ಕೇಂದ್ರ ಸರ್ಕಾರ ಹೊಸ ನೀತಿ ಜಾರಿಗೊಳಿಸಿದ್ದು, ಕ್ವಿಕ್ ಡಿಲೆವರಿ ಸೌಲಭ್ಯ ರದ್ದಾಗಲಿದೆ.

ಹೌದು, ಇನ್ನು ಮುಂದೆ ಆನ್​ಲೈನ್‌ನಲ್ಲಿ ಖರೀದಿಸಿದ ವಸ್ತುಗಳು ಗ್ರಾಹಕನಿಗೆ ತಲುಪಲು ಆಗಲು 4-7 ದಿನ ತೆಗೆದುಕೊಳ್ಳಲಿದೆ.

ಇ-ಕಾಮರ್ಸ್​​ನಲ್ಲಿ ಹೊಸ ವಿದೇಶಿ ನೇರ ಬಂಡವಾಳ ಹೂಡಿಕೆ ನೀತಿ ಜಾರಿಗೆ ಬಂದಿದ್ದು, ಇದರನ್ವಯ ಕ್ವಿಕ್​ ಡೆಲಿವರಿ ಆಯ್ಕೆ ಸಿಗುವುದಿಲ್ಲ. ಇದು ಆನ್​ಲೈನ್​ ವಸ್ತುಗಳ ಮಾರಾಟ ತಾಣಕ್ಕೆ ಭಾರೀ ಹೊಡೆತ ನೀಡುವ ಸಾಧ್ಯತೆ ಇದೆ.

ಅಷ್ಟೇ ಅಲ್ಲದೇ ಹೊಸ ನೀತಿಯ ಪರಿಣಾಮವಾಗಿ ಇ-ಕಾಮರ್ಸ್ ಸಂಸ್ಥೆಗಳು  ಡೆಲಿವರಿಗೆ ಹೆಚ್ಚಿನ ಶುಲ್ಕ ಪಡೆಯಲು ನಿರ್ಧರಿಸಿದ್ದು, ಇದು ಗ್ರಾಹಕರಿಗೆ ಕಸಿವಿಸಿ ತರಲಿದೆ ಎಂದು ಹೇಳಲಾಗಿದೆ.

ಹೊಸ ನೀತಿಯಿಂದಾಗಿ ಭಾರತದ ಇ-ಕಾಮರ್ಸ್ ದಿಗ್ಗಜ ಅಮೆಜಾನ್ ಸೇರಿದಂತೆ ಹಲವು ಕಂಪನಿಗಳಿಗೆ ಭಾರೀ ಹೊಡೆತ ಬೀಳುವ ಸಂಭವ ಹೆಚ್ಚಿದ್ದು, ಈ ನೀತಿಗೆ ಅಸಮಾಧಾನ ವ್ಯಕ್ತಪಡಿಸಲಾಗಿದೆ. 

ಇತ್ತ ಕೇಂದ್ರ ಸರ್ಕಾರದ ಹೊಸ ನೀತಿಯಿಂದಾಗಿ ಮಧ್ಯಮ ಗಾತ್ರದ ಉದ್ದಿಮೆದಾರರು ಸಂತಸದಲ್ಲಿದ್ದಾರೆ. ಕಾರಣ ಆನ್‌ಲೈನ್ ವಹಿವಾಟಿನಿಂದ ಇವರಿಗೆ ನಷ್ಟ ಎದುರಾಗಿದ್ದು, ಇದೀಗ ಗ್ರಾಹಕರು ಮರಳಿ ಇವರತ್ತ ಬರಬಹುದು ಎಂಬ ಆಶಾವಾದ ಇದೆ.