ಕಝಾಕಿಸ್ತಾನ ಸಾರ್ವಜನಿಕ ಸ್ಥಳಗಳಲ್ಲಿ ನಿಖಾಬ್ ಸೇರಿದಂತೆ ಮುಖ ಮುಚ್ಚುವ ಉಡುಪುಗಳನ್ನು ನಿಷೇಧಿಸುವ ಮಸೂದೆಗೆ ಅನುಮೋದನೆ ನೀಡಿದೆ. ಭದ್ರತಾ ಕಾರಣ ಮತ್ತು ಜಾತ್ಯತೀತ ಮೌಲ್ಯಗಳನ್ನು ಉಲ್ಲೇಖಿಸಿ ಈ ಕ್ರಮ ಕೈಗೊಳ್ಳಲಾಗಿದೆ. ಈ ನಿಷೇಧವು ಧಾರ್ಮಿಕ ಉಡುಪುಗಳ ಬಗ್ಗೆ ದೇಶದ ನಿಲುವನ್ನು ಮತ್ತಷ್ಟು ಬಲಪಡಿಸುತ್ತದೆ.
ಕಝಾಕಿಸ್ತಾನ (kazakhstan) ಸಾರ್ವಜನಿಕ ಸ್ಥಳಗಳಲ್ಲಿ ನಿಖಾಬ್ (Niqab) ಮತ್ತು ಎಲ್ಲಾ ಮುಖ ಮುಚ್ಚುವ ಉಡುಪುಗಳನ್ನು ಧರಿಸುವುದನ್ನು ನಿಷೇಧಿಸುವ ಹೊಸ ಮಸೂದಿಗೆ ಅನುಮೋದನೆ ನೀಡಿದೆ. ಈ ಮಸೂದೆ ಈಗ ರಾಷ್ಟ್ರಪತಿ ಕಾಸಿಮ್-ಜೋಮಾರ್ಟ್ ಟೋಕಾಯೆವ್ ಅವರ ಅಂತಿಮ ಒಪ್ಪಿಗೆಗೆ ಕಾಯಲಾಗುತ್ತಿದೆ. ಮೂಲಭೂತವಾದಿ ಚಟುವಟಿಕೆಗಳು ಮತ್ತು ಸಾರ್ವಜನಿಕ ಸುರಕ್ಷತೆಯ ಕುರಿತು ಹೆಚ್ಚುತ್ತಿರುವ ಚಿಂತನೆಗಳನ್ನು ಎದುರಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಧಿಕಾರಿಗಳು ಬಹಿರಂಗಪಡಿಸಿದ್ದಾರೆ.
ಭದ್ರತೆ ದೃಷ್ಠಿಯಿಂದ ನಿಷೇಧ
ಮುಖ ಮುಚ್ಚುವ ಉಡುಪುಗಳು, ಮುಖ ಮುಚ್ಚುವ ಉಡುಪುಗಳು ಕಾನೂನು ಜಾರಿ ಸಂಸ್ಥೆಗಳಿಗೆ ವ್ಯಕ್ತಿಗಳನ್ನು ಗುರುತಿಸಲು ಅಡೆತಡೆಯಾಗುತ್ತವೆ, ಹಾಗಾಗಿ ಭದ್ರತಾ ದೃಷ್ಟಿಯಿಂದ ಈ ನಿಷೇಧ ಅವಶ್ಯಕವಾಗಿದೆ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ರಷ್ಯಾ ಟುಡೇ ವರದಿಯ ಪ್ರಕಾರ, ನಿಖಾಬ್ ಇಸ್ಲಾಂ ಧರ್ಮದಲ್ಲಿ ಕಡ್ಡಾಯವಾದ ಆಚರಣೆ ಅಲ್ಲ ಎಂದು ಅಧಿಕಾರಿಗಳು ತಮ್ಮ ಮಂಡನೆಯನ್ನು ವ್ಯಕ್ತಪಡಿಸಿದ್ದಾರೆ
ಆದರೆ, ಉದ್ಯೋಗ, ಆರೋಗ್ಯ ಸಮಸ್ಯೆಗಳು, ಹವಾಮಾನ ಪರಿಸ್ಥಿತಿಗಳು, ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ನಾಗರಿಕ ರಕ್ಷಣಾ ಕಾರ್ಯಗಳಿಗೆ ಬಳಕೆಯಾದ ಮುಖಗವಸುಗಳಿಗೆ ಕಾನೂನು ವಿನಾಯಿತಿ ನೀಡಲಾಗಿದೆ. ಹಾಗಿದ್ದರೂ, ಸಾರ್ವಜನಿಕವಾಗಿ ತೆರೆಯಲಾದ ಸ್ಥಳಗಳಲ್ಲಿ ಅಂತಹ ಉಡುಪುಗಳನ್ನು ಧರಿಸುವುದು ಮುಂದೆ ಅನುಮತಿಯಲ್ಲ ಎಂದು ಸರ್ಕಾರ ಹೇಳಿದೆ.
Related Articles
ಜಾತ್ಯತೀತ ಮೌಲ್ಯದ ಬದ್ದತೆ
ಹೊಸ ನಿಯಮವು ಕಝಾಕಿಸ್ತಾನ ತನ್ನ ಜಾತ್ಯತೀತ ಮೌಲ್ಯಗಳು ಮತ್ತು ರಾಷ್ಟ್ರೀಯ ಗುರುತಿಗೆ ಬದ್ಧವಾಗಿರುವುದನ್ನು ತೋರಿಸುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸ್ಥಳೀಯ ಮಾಧ್ಯಮಗಳ ವರದಿಯ ಪ್ರಕಾರ, ಅಧಿಕಾರಿಗಳು ದೇಶವನ್ನು “ವಿದೇಶಿ” ಎನ್ನಲಾಗುವ ಧಾರ್ಮಿಕ ಆಚರಣೆಗಳಿಂದ ದೂರವಿಡಲು ಬಯಸುತ್ತಿದ್ದಾರೆ ಮತ್ತು ಅವು ಕಝಾಕ್ ಪರಂಪರೆಯ ಭಾಗವಲ್ಲ ಎಂದು ತಿಳಿಸಿದ್ದಾರೆ.
ಕಝಾಕಿಸ್ತಾನದ ಮೌಲ್ಯಕ್ಕೆ ವಿರುದ್ಧ
2024ರ ಮಾರ್ಚ್ನಲ್ಲಿ, ರಾಷ್ಟ್ರಪತಿ ಟೋಕಾಯೆವ್ ನಿಖಾಬ್ ಅನ್ನು ಟೀಕಿಸಿ, ಅದನ್ನು ಮೂಲಭೂತವಾದಿ ಗುಂಪುಗಳು ಪರಿಚಯಿಸಿದ ಹಳೆಯ ಶೈಲಿಯ ಉಡುಗೆ ಎಂದು ಖಂಡಿಸಿದ್ದರು. ಮಾತ್ರವಲ್ಲ ಇದು ಕಝಾಕಿಸ್ತಾನದ ಮೌಲ್ಯಗಳು ಮತ್ತು ಪರಂಪರೆಗಳಿಗೆ ವಿರುದ್ಧವಾಗಿದೆ ಎಂದು ಅವರು ಹೇಳಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ, ಕಝಾಕ್ ನಗರಗಳಲ್ಲಿ ಕಪ್ಪು ನಿಖಾಬ್ಗಳು ಮತ್ತು ಉದ್ದವಾದ ನಿಲುವಂಗಿಗಳು ಹೆಚ್ಚು ಕಾಣಿಸುತ್ತಿವೆ. ಇದು ದೇಶವು ಅಧಿಕೃತವಾಗಿ ಜಾತ್ಯತೀತವಾಗಿಯೇ ಉಳಿದಿದ್ದರೂ ಧಾರ್ಮಿಕ ಉಡುಪಿನಲ್ಲಿ ಬದಲಾವಣೆಯನ್ನು ಪ್ರತಿಬಿಂಬಿಸುತ್ತದೆ.
ಶೈಕ್ಷಣಿಕ ಬೇರೆ ಧಾರ್ಮಿಕ ನಂಬಿಕೆ ಬೇರೆ
ಧಾರ್ಮಿಕ ಉಡುಪುಗಳನ್ನು ನಿಯಂತ್ರಿಸುವಲ್ಲಿ ಇದು ಕಝಾಕಿಸ್ತಾನದ ಮೊದಲ ಹೆಜ್ಜೆಯಲ್ಲ. ಸರ್ಕಾರವು 2017ರಲ್ಲಿ ಶಾಲೆಗಳಲ್ಲಿ ಹಿಜಾಬ್ ಧರಿಸುವಿಕೆಯನ್ನು ನಿಷೇಧಿಸಿತ್ತು. 2023ರ ವೇಳೆಗೆ, ನಿಷೇಧವು ವಿದ್ಯಾರ್ಥಿಗಳು ಮತ್ತು ಶಿಕ್ಷಕರನ್ನೂ ಒಳಗೊಂಡಂತೆ ವಿಸ್ತರಿಸಲಾಯಿತು. ಆದೇ ವರ್ಷದಲ್ಲಿ, 150ಕ್ಕೂ ಹೆಚ್ಚು ಶಾಲಾ ಹುಡುಗಿಯರು ತರಗತಿಗಳಿಗೆ ಹಾಜರಾಗುವುದನ್ನು ನಿರಾಕರಿಸಿ ಪ್ರತಿಭಟಿಸಿದರು. ಈ ವಿಷಯದಲ್ಲಿ ರಾಷ್ಟ್ರಪತಿ ಟೋಕಾಯೆವ್ ದೃಢ ನಿಲುವು ತಳೆದರು. “ಶಾಲೆಯು ಮಕ್ಕಳು ಜ್ಞಾನವನ್ನು ಪಡೆಯುವ ಶೈಕ್ಷಣಿಕ ಸ್ಥಳ. ಧಾರ್ಮಿಕ ನಂಬಿಕೆಗಳು ಖಾಸಗಿ ವಿಷಯ,” ಎಂದು ಅವರು ಹೇಳಿದ್ದಾರೆ ಎಂದು ದಿ ಟೈಮ್ಸ್ ಆಫ್ ಸೆಂಟ್ರಲ್ ಏಷ್ಯಾ ವರದಿ ಮಾಡಿದೆ. ಇತ್ತೀಚಿನ ವರ್ಷಗಳಲ್ಲಿ ಉಜ್ಬೇಕಿಸ್ತಾನ್ ಮತ್ತು ಕಿರ್ಗಿಸ್ತಾನ್ ಸೇರಿದಂತೆ ಇತರ ಮಧ್ಯ ಏಷ್ಯಾದ ದೇಶಗಳು ಸಹ ಮುಖ ಮುಸುಕುಗಳ ಮೇಲೆ ಇದೇ ರೀತಿಯ ನಿಷೇಧಗಳನ್ನು ವಿಧಿಸುತ್ತಿವೆ.
