‘ಮಮ್ಮಿ’ಗೂ ಸಿಟಿ ಸ್ಕ್ಯಾನ್: ಶವಸಂಸ್ಕಾರ ರಹಸ್ಯ ಬೇಧಿಸಲು ಪ್ರಯೋಗ!
* ಮೊದಲ ಬಾರಿಗೆ ಸಾವಿರಾರು ವರ್ಷಗಳ ಹಿಂದೆ ಸಾವನ್ನಪ್ಪಿ, ಬಳಿಕ ಸಂರಕ್ಷಿಸಲಾದ ಶವದ ಸಿಟಿ ಸ್ಕ್ಯಾನ್
* ಇಟಲಿಯಲ್ಲಿ ‘ಮಮ್ಮಿ’ಗೂ ಸಿಟಿ ಸ್ಕ್ಯಾನ್
* ಪ್ರಾಚೀನ ಶವಸಂಸ್ಕಾರದ ರಹಸ್ಯ ಭೇದಿಸಲು ಪ್ರಯೋಗ
ರೋಮ್‌(ಜೂ.25): ಅನಾರೋಗ್ಯ ಪೀಡಿತರ ದೇಹದ ಭಾಗಗಳ ಅಧ್ಯಯನಕ್ಕೆ ಸಿಟಿ ಸ್ಕ್ಯಾನ್ ಮಾಡುವುದು ಗೊತ್ತು. ಆದರೆ ಇದೇ ಮೊದಲ ಬಾರಿಗೆ ಸಾವಿರಾರು ವರ್ಷಗಳ ಹಿಂದೆ ಸಾವನ್ನಪ್ಪಿ, ಬಳಿಕ ಸಂರಕ್ಷಿಸಲಾದ ಶವ (ಮಮ್ಮಿ)ವೊಂದನ್ನು ಸಿಟಿ ಸ್ಕ್ಯಾನ್‌ಗೆ ಒಳಪಡಿಸಲಾಗಿದೆ. ಪ್ರಾಚೀನ ಈಜಿಪ್ಟ್‌ನಲ್ಲಿ ಮೃತದೇಹಗಳನ್ನು ಕೆಡದಂತೆ ರಕ್ಷಿಸಿಡುವ ಪದ್ಧತಿ ಇತ್ತು. ಈ ರೀತಿ ರಕ್ಷಿಸಲ್ಪಟ್ಟ ಶವಗಳಿಗೆ ಮಮ್ಮಿ ಎಂದು ಕರೆಯಲಾಗುತ್ತದೆ. ಆಧುನಿಕ ಜಗತ್ತಿಗೂ ಮಮ್ಮಿಗಳು ರಹಸ್ಯವಾಗಿಯೇ ಉಳಿದಿವೆ. ಈ ರಹಸ್ಯವನ್ನು ಭೇದಿಸುವ ನಿಟ್ಟಿನಿಂದ ಇಟಲಿಯಲ್ಲಿ ಮೊದಲ ಬಾರಿಗೆ ಮಮ್ಮಿಗಳನ್ನು ಸಿಟಿ ಸ್ಕ್ಯಾನ್‌ಗೆ ಒಳಪಡಿಸಲಾಗಿದೆ.
ಸಿಟಿ ಸ್ಕ್ಯಾನ್ ನಡೆಸಿದ್ದು ಯಾವ ಮಮ್ಮಿಗೆ?
ಪ್ರಾಚೀನ ಈಜಿಪ್ಟ್ ಪಾದ್ರಿ ಅಂಖೆಖೋನ್ಸು ಎಂಬ ಮಮ್ಮಿಯನ್ನು ಇಟಲಿಯ ಬೆರ್ಗಾಮೊದ ಮ್ಯೂಸಿಯಂನಿಂದ ಪಾಲಿಕ್ಲಿನಿಕೋ ಆಸ್ಪತ್ರೆಗೆ ತಂದು ಸಿಟಿ ಸ್ಕಾ್ಯನ್‌ಗೆ ಒಳಪಡಿಸಲಾಗಿದೆ. ಈ ಶವ ಸುಮಾರು ಹಳೆಯದಾಗಿದೆ. ಅದನ್ನು ಮೂಲತಃ ಈಜಿಪ್ಟ್‌ನಿಂದ ತಂದು ಸಂಗ್ರಹಿಸಿ ಇಡಲಾಗಿತ್ತು. ಕ್ರಿಸ್ತ ಪೂರ್ವ 900 ಮತ್ತು 800ರ ನಡುವಿನ ಮಮ್ಮಿ ಇದಾಗಿದೆ ಎಂದು ಅಂದಾಜಿಸಲಾಗಿದೆ.
ಏನು ಉಪಯೋಗ?
ಈಜಿಪ್ಟ್ ಪಾದ್ರಿಯ ಜೀವನ ಮತ್ತು ಮರಣದ ಘಟನಾವಳಿಗಳ ಪುನರ್‌ಸೃಷ್ಟಿ, ದೇಹವನ್ನು ಕೆಡದಂತೆ ರಕ್ಷಿಸಲು ಯಾವ ಪದಾರ್ಥವನ್ನು ಬಳಕೆ ಮಾಡಲಾಗಿದೆ ಎಂಬುದನ್ನು ಅರಿಯುವ ಉದ್ದೇಶದಿಂದ ಮಮ್ಮಿಯನ್ನು ಸಿಟಿ ಸ್ಕಾ್ಯನ್‌ಗೆ ಒಳಪಡಿಸಲಾಗಿದೆ. ಆಧುನಿಕ ವೈದ್ಯಕೀಯ ಸಂಶೋಧನೆಗಳಿಗಾಗಿ ಪ್ರಾಚೀನ ಕಾಯಿಲೆಗಳು ಮತ್ತು ಗಾಯವನ್ನ ಅಧ್ಯಯನ ಮಾಡುವುದು ಮಹತ್ವದ್ದಾಗಿದೆ. ಆಗಿನ ಕಾಲದಲ್ಲಿ ಜನರಿಗೆ ಯಾವ ಕಾಯಿಲೆ ಬಂದಿತ್ತು. ಮೃತಪಟ್ಟಿದ್ದು ಹೇಗೆ ಎಂಬುದನ್ನು ತಳಿಯಲು ಇದರಿಂದ ಸಹಕಾರಿಯಾಗಲಿದೆ. 3000 ವರ್ಷಗಳಷ್ಟುಹಳೆಯ ಇತಿಹಾಸವನ್ನು ಹೊಂದಿರುವ ಮಮ್ಮಿಗಳ ಬಗ್ಗೆ ಈ ಪ್ರಯೋಗ ಬೆಳಕು ಚೆಲ್ಲಲಿದೆ ಎಂದು ಎಂದು ವಿಶ್ವಾಸವನ್ನು ವೈದ್ಯರು ವ್ಯಕ್ತಡಿಸಿದ್ದಾರೆ.
ಏನಿದು ಮಮ್ಮಿ?
ಮಮ್ಮಿ ಅಂದರೆ ಕೆಡದಂತೆ ರಕ್ಷಿಸಲ್ಪಟ್ಟ ಶವಗಳಾಗಿವೆ. ಮೃತದೇಹವನ್ನು ಸಾವಿರಾರು ವರ್ಷಗಳ ಹಿಂದೆ ಈಜಿಫ್ಟ್‌ನಲ್ಲಿ ಮೃತದೇಹಗಳನ್ನು ದೇಹದ ಆಕಾರದ ಪೆಟ್ಟಿಗೆಯಲ್ಲಿ ಇಟ್ಟು ಅಂತ್ಯಸಂಸ್ಕಾರ ಮಾಡಲಾಗುತ್ತಿತ್ತು. ಇದರಲ್ಲಿ ಇಟ್ಟಿದ್ದ ಶವಗಳು ಸಾವಿರಾರು ವರ್ಷಗಳು ಕಳೆದರೂ ಮೃತ ದೇಹದ ಚರ್ಮ, ಕೂದಲು, ಮೂಳೆಗಳು ಕೆಡದೇ ಯಥಾಸ್ಥಿತಿಯಲ್ಲಿವೆ.
