* ಅಮೆರಿಕ ಅಧ್ಯಕ್ಷ ಜೋ ಬೈಡೆನ್ ಅವರು ಮೋದಿ ಅವರ ಬಳಿ ಹಾಸ್ಯ ಚಟಾಕಿ* ಭಾರತದ ಪತ್ರಿಕೋದ್ಯಮ ಬಗ್ಗೆ ಬೈಡೆನ್ ಮೆಚ್ಚುಗೆ
ವಾಷಿಂಗ್ಟನ್(ಸೆ.26): ಭಾರತದ ಪ್ರಧಾನಿ ನರೇಂದ್ರ ಮೋದಿ(Narendra Modi) ಅವರ ಜತೆಗಿನ ದ್ವಿಪಕ್ಷೀಯ ಮಾತುಕತೆಗೂ ಮುನ್ನ ಅಮೆರಿಕ ಅಧ್ಯಕ್ಷ ಜೋ ಬೈಡೆನ್(Joe Biden) ಅವರು ಮೋದಿ ಅವರ ಬಳಿ ಹಾಸ್ಯ ಚಟಾಕಿಗಳನ್ನು ಹಾರಿಸಿದರು.
ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಓವಲ್ ಕಚೇರಿಯಲ್ಲಿ ಬೈಡೆನ್ ಅವರು ಸ್ವಾಗತ ಮಾಡಿದರು. ಬಳಿಕ ದ್ವಿಪಕ್ಷೀಯ ಮಾತುಕತೆಗೆ ಮುನ್ನ ಭಾರತದ ಪತ್ರಿಕೋದ್ಯಮ(Journalism) ಅಮೆರಿಕದ ಪತ್ರಿಕೋದ್ಯಮಕ್ಕಿಂತಲೂ ಉತ್ತಮವಾಗಿದೆ ಎಂದು ಬೈಡೆನ್ ಅವರು ಪ್ರಧಾನಿ ಮೋದಿ ಅವರ ಬಳಿ ತಮಾಷೆಯಾಗಿ ಹೇಳಿದರು.
ಅಲ್ಲದೆ, ‘ಮಾಧ್ಯಮ ಪ್ರತಿನಿಧಿಗಳು ಸರಿಯಾದ ಪ್ರಶ್ನೆಗಳನ್ನು ಕೇಳಲ್ಲ. ಈ ಹಿನ್ನೆಲೆಯಲ್ಲಿ ನಿಮ್ಮ(ಮೋದಿ) ಅನುಮತಿಯೊಂದಿಗೆ ಅವರ ಯಾವುದೇ ಪ್ರಶ್ನೆಗಳಿಗೆ ಉತ್ತರಿಸುವುದು ಬೇಡ ಎಂದೆನಿಸುತ್ತದೆ’ ಎಂದರು. ಇದಕ್ಕೆ ಮೋದಿ, ‘ಸಂಪೂರ್ಣ ಸಹಮತವಿದೆ’ ಎಂದು ಉತ್ತರಿಸಿದರು.
ಮೊದಲ ಬಾರಿ ಕ್ವಾಡ್ ಶಕ್ತಿಪ್ರದರ್ಶನ
ಕ್ವಾಡ್’ ಒಕ್ಕೂಟ (ಭಾರತ, ಆಸ್ಪ್ರೇಲಿಯಾ, ಅಮೆರಿಕ ಹಾಗೂ ಜಪಾನ್ ದೇಶಗಳ ಒಕ್ಕೂಟ) ಇರುವುದು ಜಾಗತಿಕ ಒಳಿತಿಗಾಗಿ. ನಮ್ಮ ಸಹಕಾರದಿಂದ ವಿಶ್ವ ಹಾಗೂ ಇಂಡೋ-ಪೆಸಿಫಿಕ್(indo Pacific) ವಲಯದಲ್ಲಿ ಶಾಂತಿ ಸ್ಥಾಪನೆ ಆಗಲಿದೆ ಎಂದು ಪ್ರಧಾನಿ ನರೇಂದ್ರ ಮೋದಿ ಅವರು ಹೇಳಿದ್ದಾರೆ.
ಭೌತಿಕವಾಗಿ ಮೊತ್ತಮೊದಲ ಬಾರಿ ನಡೆಯುತ್ತಿರುವ ಕ್ವಾಡ್ ಶೃಂಗ ಉದ್ದೇಶಿಸಿ ಶುಕ್ರವಾರ ಮಾತನಾಡಿದ ಮೋದಿ, ‘ನಾವೆಲ್ಲ ಈ ಹಿಂದೆ 2004ರಲ್ಲಿ ಸುನಾಮಿ ಸಂಭವಿಸಿದಾಗ ಇಂಡೋ-ಪೆಸಿಫಿಕ್ ಪ್ರಾದೇಶಿಕ ಸಹಕಾರಕ್ಕೆ ಒಟ್ಟಾಗಿದ್ದೆವು. ಈಗ ಮತ್ತೆ ಪ್ರಾದೇಶಿಕ ಸಹಕಾರಕ್ಕೆ ಒಂದಾಗಿದ್ದೇವೆ. ನಮ್ಮೆಲ್ಲರ ಧ್ಯೇಯ ಜಾಗತಿಕ ಒಳಿತು’ ಎಂದರು.
‘ಇಂದು ಕೋವಿಡ್-19 ವಿರುದ್ಧ ವಿಶ್ವವು ಹೋರಾಡುತ್ತಿದೆ. ಈ ಸಂದರ್ಭದಲ್ಲಿ ಮಾನವೀಯತೆಯ ಅಂಗವಾಗಿ ನಾವು ಕೂಡ ಒಗ್ಗಟ್ಟಾಗಿದ್ದೇವೆ’ ಎಂದು ತಿಳಿಸಿದರು.
