ಇಬ್ಬರು ಹೈಕರ್ಗಳು ಸುಮಾರು 100 ವರ್ಷಗಳ ಹಿಂದಿನದ್ದು ಎಂದು ನಂಬಲಾದ 598 ಚಿನ್ನದ ನಾಣ್ಯಗಳು ಮತ್ತು ಆಭರಣಗಳನ್ನು ಹೊಂದಿರುವ ಅಲ್ಯೂಮಿನಿಯಂ ಬಾಕ್ಸ್ಅನ್ನು ಪತ್ತೆ ಮಾಡಿದ್ದಾರೆ.
ನವದೆಹಲಿ (ಮೇ.24): ಜೆಕ್ ಗಣರಾಜ್ಯದ ಕ್ರ್ಕೊನೋಸ್ ಪರ್ವತದ ತಪ್ಪಲಿನಲ್ಲಿ ಇಬ್ಬರು ಹೈಕರ್ಗಳಿಗೆ ಭಾರೀ ನಿಧಿಯಿರುವ ನಿಗೂಢ ಬಾಕ್ಸ್ ಪತ್ತೆಯಾಗಿದೆ. ಅದಲ್ಲಿ ಚಿನ್ನದ ನಾಣ್ಯಗಳು, ಆಭರಣಗಳು ಮತ್ತು ಇತರ ವಸ್ತುಗಳಿಂದ ತುಂಬಿತ್ತು ಎಂದು ವರದಿಯಾಗಿದೆ. ಹೆಸರು ಹೇಳಲು ಇಚ್ಛಿಸದ ಹೈಕರ್ಗಳು ಕಾಡಿನ ದಾರಿಯಲ್ಲಿ ನಡೆದುಕೊಂಡು ಹೋಗುವಾಗ ಅವರಿಗೆ ಈ ನಿಗೂಢ ನಿಧಿ ಇರುವ ಬಾಕ್ಸ್ ಪತ್ತೆಯಾಗಿದೆ.
ಅಲ್ಯೂಮಿನಿಯಮ್ನಿಂದ ಮಾಡಲಾದ ಪೆಟ್ಟಿಗೆಯಲ್ಲಿ 598 ಚಿನ್ನದ ನಾಣ್ಯಗಳು, 10 ಚಿನ್ನದ ಬಳೆಗಳು, 17 ಸಿಗಾರ್ ಪೆಟ್ಟಿಗೆಗಳು, ಒಂದು ಪುಡಿ ಕಾಂಪ್ಯಾಕ್ಟ್ ಮತ್ತು ಒಂದು ಬಾಚಣಿಗೆ ಇತ್ತು. ಪಾದಯಾತ್ರಿಕರು ಈ ನಿಧಿಯನ್ನು ಹ್ರಾಡೆಕ್ ಕ್ರಾಲೋವ್ನಲ್ಲಿರುವ ಪೂರ್ವ ಬೊಹೆಮಿಯಾ ವಸ್ತುಸಂಗ್ರಹಾಲಯದ ವಶಕ್ಕೆ ನೀಡಿದ್ದಾರೆ.
ತಜ್ಞರು ಈ ವಸ್ತುಗಳು ಸುಮಾರು 100 ವರ್ಷಗಳಷ್ಟು ಹಳೆಯವು ಎಂದು ಅಂದಾಜಿಸಿದ್ದಾರೆ. ಏಕೆಂದರೆ, ಅದರಲ್ಲಿಒಂದು ನಾಣ್ಯವು 1921 ರ ಹಿಂದಿನದು. ಈ ನಿಧಿಯನ್ನು ಎರಡನೇ ಮಹಾಯುದ್ಧದ ಮೊದಲು ಉದ್ವಿಗ್ನ ಸಮಯದಲ್ಲಿ ಜೆಕ್ ಮತ್ತು ಯಹೂದಿ ಕುಟುಂಬಗಳು ಈ ಪ್ರದೇಶವನ್ನು ತೊರೆದು ಹೋಗಿರಬಹುದು ಅಥವಾ 1945 ರಲ್ಲಿ ಜರ್ಮನ್ನರು ಮರೆಮಾಡಿರಬಹುದು ಎಂದು ಅಂದಾಜಿಸಲಾಗಿದೆ.
Related Articles
"ನಿಧಿಯನ್ನು ಶೋಧನೆ ಮಾಡಿದವರು ನಮ್ಮ ವಸ್ತುಸಂಗ್ರಹಾಲಯದ ನಾಣ್ಯಶಾಸ್ತ್ರಜ್ಞರ (ನಾಣ್ಯ ತಜ್ಞ) ಬಳಿಗೆ ಪೂರ್ವ ಅಪಾಯಿಂಟ್ಮೆಂಟ್ ಇಲ್ಲದೆ ಬಂದಿದ್ದರು. ಅದರ ನಂತರವೇ ಪುರಾತತ್ತ್ವಜ್ಞರು ಹುಡುಕಾಟವನ್ನು ಪ್ರಾರಂಭಿಸಿದರು ಮತ್ತು ಸ್ಥಳವನ್ನು ಅನ್ವೇಷಿಸಲು ಹೊರಟರು" ಎಂದು ವಸ್ತುಸಂಗ್ರಹಾಲಯದ ಪುರಾತತ್ವ ವಿಭಾಗದ ಮುಖ್ಯಸ್ಥ ಮಿರೋಸ್ಲಾವ್ ನೊವಾಕ್ ಸಿಎನ್ಎನ್ಗೆ ಇಮೇಲ್ನಲ್ಲಿ ತಿಳಿಸಿದ್ದಾರೆ.
"ಇದು ಹೆಚ್ಚಾಗಿ ಎರಡನೇ ಮಹಾಯುದ್ಧ ಪ್ರಾರಂಭವಾಗುವ ಮೊದಲು ಜೆಕ್ ಮತ್ತು ಯಹೂದಿ ಜನಸಂಖ್ಯೆಯು ಗಡಿ ಪ್ರದೇಶವನ್ನು ತೊರೆಯುತ್ತಿದ್ದ ಪ್ರಕ್ಷುಬ್ಧ ಅವಧಿಗೆ ಅಥವಾ ಜರ್ಮನ್ನರು ಹೊರಡುತ್ತಿದ್ದ 1945 ಕ್ಕೆ ಸಂಬಂಧಿಸಿದೆ" ಎಂದು ನೊವಾಕ್ ಹೇಳಿದ್ದಾರೆ.
ನಿಧಿಯನ್ನು ಯಾರು ಮತ್ತು ಏಕೆ ಮರೆಮಾಡಿದರು ಎಂಬುದು ಇನ್ನೂ ನಿಗೂಢವಾಗಿದೆ. ಪುರಾತತ್ತ್ವಜ್ಞರು ಈಗ ಆ ಸ್ಥಳ ಮತ್ತು ಅದರ ವಸ್ತುಗಳನ್ನು ಅಧ್ಯಯನ ಮಾಡುತ್ತಿದ್ದಾರೆ ಮತ್ತು ಹೆಚ್ಚಿನದನ್ನು ತಿಳಿದುಕೊಳ್ಳಲು ಪ್ರಯತ್ನಿಸುತ್ತಿದ್ದಾರೆ. ಈ ಅದೃಷ್ಟದ ಆವಿಷ್ಕಾರವು ತಜ್ಞರು ಮತ್ತು ಸಾರ್ವಜನಿಕರ ಗಮನ ಸೆಳೆದಿದೆ.
ಈ ಚಿನ್ನದ ಸಂಗ್ರಹವು ಅದರ ನಾಣ್ಯ ಮೌಲ್ಯಕ್ಕೆ ಕೇವಲ $360,000 (₹3 ಕೋಟಿಗೂ ಹೆಚ್ಚು) ಮೌಲ್ಯದ್ದಾಗಿದೆ. ನಾಣ್ಯಗಳು 3.7 ಕೆಜಿ ತೂಕವಿದ್ದು, ಹೆಚ್ಚಾಗಿ ಬಾಲ್ಕನ್ ಮತ್ತು ಫ್ರೆಂಚ್ ಮೂಲದವುಗಳಾಗಿವೆ. ವಿಚಿತ್ರವೆಂದರೆ, ಯಾವುದೇ ಸ್ಥಳೀಯ ಅಥವಾ ಜರ್ಮನ್ ನಾಣ್ಯಗಳು ಕಂಡುಬಂದಿಲ್ಲ. ಪೆಟ್ಟಿಗೆಯಲ್ಲಿದ್ದ ಎರಡು ಸಿಗಾರ್ ಪೆಟ್ಟಿಗೆಗಳ ಸೀಲ್ ಹಾಗೆಯೇ ಇದೆ.
ಸ್ಥಳೀಯರು ಈ ನಿಧಿಯ ಮೂಲದ ಬಗ್ಗೆ ಅನೇಕ ಸಿದ್ಧಾಂತಗಳನ್ನು ಹಂಚಿಕೊಂಡಿದ್ದಾರೆ. ಕೆಲವರು ಇದು ಶ್ರೀಮಂತ ಕುಟುಂಬಕ್ಕೆ ಸೇರಿದ್ದು ಎಂದು ನಂಬಿದರೆ, ಇನ್ನು ಕೆಲವರು ಇದು ಜೆಕೊಸ್ಲೊವಾಕ್ ಸೈನಿಕರಿಂದ ಬಂದ ಯುದ್ಧ ಲೂಟಿಯಾಗಿರಬಹುದು ಎಂದು ಹೇಳುತ್ತಾರೆ.
ನಿಧಿಯನ್ನು ಮರೆಮಾಡಿ ಇಟ್ಟವರು ಯಾರು?
ಜೆಕ್ ಕಾಡಿನಲ್ಲಿ ದೊರೆತ ನಿಧಿಯಲ್ಲಿನ ಇತ್ತೀಚಿನ ನಾಣ್ಯವು 1921 ರದ್ದಾಗಿದೆ. ಅದನ್ನು ಉಲ್ಲೇಖಿಸುತ್ತಾ, ಇತಿಹಾಸಕಾರ ಮೇರಿ ಹೈಮನ್, ಇದು ಜೆಕೊಸ್ಲೊವಾಕಿಯಾದಲ್ಲಿ ಆರ್ಥಿಕ ಬಿಕ್ಕಟ್ಟು ಮತ್ತು ಅಸ್ಥಿರತೆಯ ಸಮಯವಾಗಿತ್ತು ಎಂದು ಹೇಳುತ್ತಾರೆ. ಹಾಗಾಗಿ, ಆಗ ಯಾರಾದರೂ ಚಿನ್ನವನ್ನು ಮರೆಮಾಡಿರುವುದು ಆಶ್ಚರ್ಯವೇನಿಲ್ಲ. 1945 ರ ಸಮಯದಲ್ಲಿ ಯಾವುದೇ ನಾಣ್ಯಗಳು ಕಂಡುಬಂದಿಲ್ಲವಾದ್ದರಿಂದ ನಿಧಿಯನ್ನು ಮರೆಮಾಡಿರಬಹುದು ಎಂದು ಅಂದಾಜಿಸಿದ್ದಾರೆ. ಒಂದೇ ಇದನ್ನು ಮರೆಮಾಡಿದ ವ್ಯಕ್ತಿಯು ಸಂಗ್ರಾಹಕ, ವಸ್ತು ಸಂಗ್ರಹಾಲಯದ ಕೆಲಸಗಾರ ಅಥವಾ ಕಳ್ಳನಾಗಿರಬಹುದು ಎಂದಿದ್ದಾರೆ.
"(ನಾಣ್ಯಗಳನ್ನು ಮರೆಮಾಡಿದ ವ್ಯಕ್ತಿ) ಸಂಗ್ರಾಹಕನಾಗಿರಬಹುದು ಅಥವಾ ವಸ್ತು ಸಂಗ್ರಹಾಲಯಗಳಲ್ಲಿ ಕೆಲಸ ಮಾಡುತ್ತಿದ್ದ ವ್ಯಕ್ತಿಯಾಗಿರಬಹುದು. ಅಥವಾ ಎಲ್ಲೋ ಸಂಗ್ರಹವನ್ನು ಕದ್ದ ವ್ಯಕ್ತಿಯಾಗಿರಬಹುದು. ಇದು ಗಡಿ ಪ್ರದೇಶ, ಇದು ಇಂದಿನ ಜೆಕ್ ಗಣರಾಜ್ಯವನ್ನು - ಹಿಂದೆ ಜೆಕೊಸ್ಲೊವಾಕಿಯಾ ಆಗಿತ್ತು - ಪೋಲೆಂಡ್ನಿಂದ ಬೇರ್ಪಡಿಸುತ್ತದೆ" ಎಂದು ಹೈಮನ್ ತಿಳಿಸಿದ್ದಾರೆ.
ಪರೀಕ್ಷೆಗಳು ಮುಗಿದ ನಂತರ, ನಿಧಿಯನ್ನು ವಸ್ತುಸಂಗ್ರಹಾಲಯದಲ್ಲಿ ಇಡಲಾಗುತ್ತದೆ. ಕಾನೂನಿನ ಪ್ರಕಾರ, ಅದು ಸ್ಥಳೀಯ ಸರ್ಕಾರಕ್ಕೆ ಸೇರಿದೆ. ಆದರೂ ಇದನ್ನು ಹುಡುಕಿದ ಇಬ್ಬರಿಗೆ ಸರ್ಕಾರದಿಂದ ಬಹುಮಾನ ಕೂಡ ಸಿಗಲಿದೆ.