ಏಷ್ಯಾ ಅಮೆರಿಕನ್ನರ ಮೇಲಿನ ದೌರ್ಜನ್ಯಕ್ಕೆ ನಾದೆಳ್ಲ ಕಿಡಿ!
ಏಷ್ಯಾ ಅಮೆರಿಕನ್ನರ ಮೇಲಿನ ದೌರ್ಜನ್ಯಕ್ಕೆ ನಾದೆಳ್ಲ ಕಿಡಿ| 2020ರಲ್ಲಿ 3 ಸಾವಿರಕ್ಕೂ ಹೆಚ್ಚು ದೌರ್ಜನ್ಯ ಕೇಸ್ಗಳು| ಏಷ್ಯಾ ಸಮುದಾಯದ ನ್ಯಾಯಕ್ಕಾಗಿ ಹೋರಾಡುವೆ: ನಾದೆಳ್ಲ
ವಾಷಿಂಗ್ಟನ್(ಮಾ.14): ಕೊರೋನಾ ಅಬ್ಬರದ ನಡುವೆಯೇ ಅಮೆರಿಕದಲ್ಲಿ ಏಷ್ಯಾದ ಅಮೆರಿಕನ್ನರ ಮೇಲೆ ನಡೆಯುತ್ತಿರುವ ದೌರ್ಜನ್ಯಗಳ ವಿರುದ್ಧ ಅಧ್ಯಕ್ಷ ಜೋ ಬೈಡನ್ ಕಿಡಿಕಾರಿದ ಬೆನ್ನಲ್ಲೇ, ಏಷ್ಯಾದ ಅಮೆರಿಕನ್ನರ ಮೇಲಿನ ಹಿಂಸಾಚಾರ ವರ್ಣಭೇದ ನೀತಿ ಸೇರಿದಂತೆ ಇನ್ನಿತರ ದೌರ್ಜನ್ಯಗಳ ಬಗ್ಗೆ ಮೈಕ್ರೋಸಾಫ್ಟ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಸತ್ಯ ನಾದೆಳ್ಲ ಅವರು ಅಸಮಾಧಾನ ಮತ್ತು ಖಂಡನೆ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಇಂಥ ಘಟನೆಗಳಿಂದ ನನಗೆ ತೀವ್ರ ಆಘಾತವಾಗಿದೆ ಎಂದು ನಾದೆಳ್ಲ ಹಾಗೂ ಅಮೆರಿಕದ ಹಲವು ಸಂಸದರು ಹೇಳಿದ್ದಾರೆ.
2019ರಲ್ಲಿ ಏಷ್ಯಾದ ಅಮೆರಿಕನ್ನರ ಮೇಲೆ ಕೇವಲ 216 ದೌರ್ಜನ್ಯ ಕೇಸ್ಗಳು ಮಾತ್ರವೇ ದಾಖಲಾಗಿದ್ದವು. ಆದರೆ 2020ರ ಮಾಚ್ರ್ನಿಂದ ಡಿಸೆಂಬರ್ವರೆಗೆ ಈ ಸಂಖ್ಯೆಯು 3 ಸಾವಿರವನ್ನೂ ಮೀರಿಸಿದೆ ಎಂದು ದೂರಲಾಗಿದೆ.
ಈ ಸಂಬಂಧ ಶನಿವಾರ ಟ್ವೀಟ್ ಮಾಡಿದ ನಾದೆಳ್ಲ, ‘ನಮ್ಮ ಸಮಾಜದಲ್ಲಿ ಹಿಂಸಾಚಾರ, ದ್ವೇಷ ಮತ್ತು ವರ್ಣಭೇದ ನೀತಿಗಳಿಗೆ ಅವಕಾಶವಿಲ್ಲ. ಆದಾಗ್ಯೂ, ಏಷ್ಯಾದ ಅಮೆರಿಕನ್ನರು ಮತ್ತು ಜಾಗತಿಕ ಮಟ್ಟದಲ್ಲಿ ಏಷ್ಯಾದ ಸಮುದಾಯಗಳ ಮೇಲೆ ದೌರ್ಜನ್ಯಗಳು ನಡೆಯುತ್ತಿವೆ. ಈ ಅನ್ಯಾಯದ ವಿರುದ್ಧದ ಹೋರಾಟದಲ್ಲಿ ಏಷ್ಯಾದ ಸಮುದಾಯದೊಂದಿಗೆ ಇರುತ್ತೇನೆ’ ಎಂದು ಪ್ರತಿಪಾದಿಸಿದ್ದಾರೆ.