Russia-Ukraine War: ಉಕ್ರೇನ್‌ ತೊರೆಯಲು ಸಿಕ್ಕ ಸಿಕ್ಕ ವಾಹನ ಹತ್ತುತ್ತಿದ್ದಾರೆ ಕನ್ನಡಿಗರು..!
* ನವೀನ್‌ ದುರ್ಮರಣ ಬಳಿಕ ಜೀವಭಯದಲ್ಲಿ ವಿದ್ಯಾರ್ಥಿಗಳು
* ಆಗಿದ್ದಾಗಲೆಂದು ಗಡಿಯತ್ತ ಪಯಣ ಜತೆಗೆ ಆಹಾರ ಸಮಸ್ಯೆ
* 200 ಡಾಲರ್‌ ಲಂಚ ಕೊಟ್ಟು ರೈಲು ಹತ್ತಿದ ವಿದ್ಯಾರ್ಥಿ
ಬೆಂಗಳೂರು(ಮಾ.03): ಯುದ್ಧಪೀಡಿತ ಉಕ್ರೇನ್ನ(Ukraine) ಖಾರ್ಕೀವ್‌ನಲ್ಲಿ ಕಿರಿದಾದ ಬಂಕರ್‌ಗಳಲ್ಲಿ ಅನ್ನ, ಆಹಾರ ಇಲ್ಲದೆ ರಕ್ಷಣೆಗಾಗಿ ಎದುರು ನೋಡುತ್ತಿದ್ದ ಕರ್ನಾಟಕದ(Karnataka) ಅನೇಕ ವಿದ್ಯಾರ್ಥಿಗಳೀಗ(Students) ದಿಢೀರ್‌ ರೈಲು, ಬಸ್ಸು ಸೇರಿ ಕಂಡ ಕಂಡ ವಾಹನಗಳನ್ನೇರಿ ಗಡಿಯತ್ತ ದೌಡಾಯಿಸುತ್ತಿದ್ದಾರೆ. ಹಾವೇರಿ ಮೂಲದ ನವೀನ್‌(Naveen) ಸಾವು ಮತ್ತಷ್ಟು ದಿಕ್ಕೆಡಿಸಿದ್ದು, ಭಯಭೀತರಾಗಿರುವ 50ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಬಾಂಬ್‌, ಶೆಲ್‌ ದಾಳಿ ಆತಂಕದ ನಡುವೆಯೇ ತಾಯ್ನಾಡಿಗೆ ದಾಪುಗಾಲು ಹಾಕುತ್ತಿದ್ದಾರೆ. ಇಲ್ಲೇ ಇದ್ದರೆ ನವೀನ್ಗಾದ ಗತಿಯೇ ತಮಗಾಗಬಹುದು ಎಂಬ ಆತಂಕದಿಂದಲೇ ಹೊರಟು ನಿಂತಿದ್ದಾರೆ.
ಖಾರ್ಕಿವ್‌ ನ್ಯಾಷನಲ್‌ ಮೆಡಿಕಲ್‌ ಯುನಿವರ್ಸಿಟಿ ವಿದ್ಯಾರ್ಥಿಯಾಗಿದ್ದ ನವೀನ್‌ ತನಗೆ ಹಾಗೂ ಸ್ನೇಹಿತರಿಗೆ ಆಹಾರ ತರಲೆಂದು ದಿನಸಿ ಅಂಗಡಿ ಮುಂದೆ ಸಾಲಿನಲ್ಲಿ ನಿಂತಿದ್ದಾಗ ರಷ್ಯಾದ(Russia) ಶೆಲ್‌ ದಾಳಿಗೆ ಸಿಲುಕಿ ಮಂಗಳವಾರ ಬೆಳಗ್ಗೆ ಮೃತಪಟ್ಟಿದ್ದರು. ಇದು ಯುದ್ಧಪೀಡಿತ ಪ್ರದೇಶವಾದ ಕೀವ್‌, ಖಾರ್ಕೀವ್‌ನಲ್ಲಿದ್ದ ಉಳಿದ ವಿದ್ಯಾರ್ಥಿಗಳಲ್ಲಿ ದಿಗ್ಭ್ರಮೆ ಮೂಡಿಸಿದೆ. ಇಲ್ಲೇ ಇದ್ದರೆ ನಾವೂ ಆಹಾರ(Food), ನೀರಿಲ್ಲದೆ(Water) ಪರದಾಟ ಅನುಭವಿಸಿ ಕೊನೆಗೆ ನವೀನ್‌ ರೀತಿ ಸಾವು ಕಾಣಬಹುದು ಎಂಬ ಆತಂಕ ಅನೇಕರನ್ನು ಕಾಡಲು ಶುರುವಾಗಿದೆ. ಹೀಗಾಗಿ ಕೀವ್‌ ಮತ್ತು ಖಾರ್ಕೀವ್‌ನಿಂದ ಅನೇಕರು ಬಸ್‌, ರೈಲು, ಖಾಸಗಿ ವಾಹನಗಳ ಮೂಲಕ ಗಡಿಯತ್ತ ಹೊರಟಿದ್ದಾರೆ. ಕಲಬುರಗಿಯಿಂದ ಏಳು, ದಕ್ಷಿಣ ಕನ್ನಡ, ಚಿತ್ರದುರ್ಗ, ಬಳ್ಳಾರಿಯಿಂದ ತಲಾ 4, ಮಂಡ್ಯ-2, ದಾವಣಗೆರೆ, ಚಾಮರಾಜನಗರರಿಂದ ತಲಾ ಒಬ್ಬರು ಸೇರಿದಂತೆ ಸುಮಾರು 50ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಈಗಾಗಲೇ ಹಾಲೆಂಡ್‌, ಹಂಗೇರಿ ಗಡಿಯತ್ತ ಹೊರಟಿದ್ದಾರೆ ಎನ್ನುವ ಮಾಹಿತಿ ಸದ್ಯಕ್ಕೆ ದೊರೆತಿದೆ.
Russia-Ukraine Crisis: ಕೇಂದ್ರದ ನಿರ್ಲಕ್ಷ್ಯದಿಂದಲೇ ನವೀನ್‌ ಸಾವು: ಸಿದ್ದರಾಮಯ್ಯ
ಸುಲಭವಿಲ್ಲ ದಾರಿ:
ತುಮಕೂರಿನ ಪ್ರತಿಭಾ ಬುಧವಾರ ರೈಲು ಮೂಲಕ ಖಾರ್ಕೀವ್‌ನಿಂದ ಹಂಗೇರಿ ಗಡಿ ತಲುಪಲು ಮುಂದಾಗಿದ್ದಾರೆ. ಆದರೆ, ಸ್ಥಳೀಯ ಪೊಲೀಸರು(Police) ಮೊದಲು ಉಕ್ರೇನ್‌ ವಿದ್ಯಾರ್ಥಿಗಳಿಗೆ ಆದ್ಯತೆ ನೀಡುತ್ತಿದ್ದಾರೆ, ಉಳಿದವರಿಗೆ ಅಡ್ಡಿ ಮಾಡುತ್ತಿದ್ದಾರಂತೆ. ಆದರೂ ಆಕೆ ಸಾಹಸ ಮಾಡಿ ರೈಲು ಹತ್ತಿದ್ದಾಳೆ. ಕೆಲವರಂತು ಖಾಸಗಿ ವಾಹನ ಮಾಡಿಕೊಂಡೇ ಗಡಿಯತ್ತ ಹೊರಟಿದ್ದರೆ, ಇನ್ನು ಕೆಲವರು ರೈಲು ನಿಲ್ದಾಣ ತಲುಪಲು 10ರಿಂದ 18 ಕಿ.ಮೀ. ನಡೆದುಕೊಂಡೇ ಹೊರಟಿದ್ದಾರೆ.
ಬೆಳಗಾವಿ ಜಿಲ್ಲೆಯ ಅಥಣಿಯಲ್ಲಿ ಮೂವರು ವಿದ್ಯಾರ್ಥಿಗಳು ಬುಧಾವರ ಬೆಳಗ್ಗೆ ಹೇಗೋ ರೈಲು ಹತ್ತಿದ್ದು, ರೈಲು ಹತ್ತಲು ಪೊಲೀಸರಿಗೆ ತಲಾ 200 ಡಾಲರ್‌ ಲಂಚ(Bribe) ನೀಡಬೇಕಾಯಿತಂತೆ. ಖಾರ್ಕೀವ್ನಲ್ಲೇ ಓದುತ್ತಿದ್ದ ಮಂಗಳೂರು ಮೂಲದ ಅನೈನಾ ಮಂಗಳವಾರ ಮಧ್ಯಾಹ್ನವೇ ರೈಲು ಹತ್ತಿದ್ದು, ಲ್ವಿವ್‌ ತಲುಪಿದ್ದಾರೆ. ಅದೇ ರೀತಿ ಉಡುಪಿಯ ಗ್ಲೆನ್‌ವಿಲ್‌ ಖಾರ್ಕೀವ್‌ನ ಬಂಕರ್‌ನಿಂದ ಹೊರ ಬಂದು 8 ಕಿ.ಮೀ. ನಡೆದುಕೊಂಡೇ ರೈಲು ನಿಲ್ದಾಣಕ್ಕೆ ಹೊರಟಿದ್ದಾರೆ. ಆ ನಂತರ ಆತನ ಮೊಬೈಲ್‌ ಸ್ವಿಚ್‌ ಆಫ್‌ ಆಗಿದ್ದು, ಪೋಷಕರಲ್ಲಿ ಆತಂಕ ಮೂಡಿಸಿದೆ.
Russia Ukraine Crisis: ಗಡಿಯಲ್ಲೀಗ ನೈಜೀರಿಯಾ ವಿದ್ಯಾರ್ಥಿಗಳ ಕಾಟ!
ಇನ್ನು ಹಾಸನದ ಗಗನ್‌ಗೌಡ ಕೂಡ ಖಾರ್ಕೀವ್ನಲ್ಲೇ ಇದ್ದು, ಹೊರಡಲು ಸಿದ್ಧರಾಗಿದ್ದಾರೆ. ರೈಲು ನಿಲ್ದಾಣ ತಲುಪಬೇಕಾದರೆ 10 ಕಿ.ಮೀ. ನಡೆದುಕೊಂಡೇ ಹೋಗಬೇಕಂತೆ. ಅಲ್ಲಿರೋದು ಬೇಡ, ದೇವರ ಮೇಲೆ ಭಾರ ಹಾಕಿ ರೈಲು ಹತ್ತು ಮಗಾ ಎಂದು ತಾಯಿ ಆತನಿಗೆ ಸಲಹೆ ನೀಡಿದ್ದಾರೆ. ಕೀವ್‌ನಗರದಲ್ಲಿದ್ದ ಚಾಮರಾಜನಗರ ಜಿಲ್ಲೆ ಗುಂಡ್ಲುಪೇಟೆ ತಾಲೂಕಿನ ಕಮರಹಳ್ಳಿಯ ಕಾವ್ಯಾ ಬುಧವಾರ ಬೆಳಗ್ಗೆ ರೈಲು ಹತ್ತಿದ್ದು, ಗಡಿಯತ್ತ ಹೊರಟಿದ್ದಾಳೆ ಎಂಬ ಮಾಹಿತಿ ಇದೆ.
ಖಾರ್ಕಿವ್‌ನಲ್ಲಿದ್ದ ನನ್ನ ಪುತ್ರ ಗ್ಲೆನ್‌ ವಿಲ್‌ ಬಂಕರ್‌ನಿಂದ ಹೊರ ಬಂದು 8 ಕಿ.ಮೀ. ದೂರ ರೈಲ್ವೆ ನಿಲ್ದಾಣಕ್ಕೆ ನಡೆದುಕೊಂಡು ಹೊರಟಿದ್ದಾನೆ. ಸದ್ಯ ಆತನ ಮೊಬೈಲ್‌ ಸ್ವಿಚ್‌ ಆಫ್‌ ಆಗಿದೆ. ರೈಲು ಸಿಕ್ಕಿದೆಯೋ ಇಲ್ಲವೋ? ಹಂಗೇರಿಗೆ ಹೋಗುತ್ತಾನೋ, ಪೋಲೆಂಡ್‌ಗೆ ಹೋಗುತ್ತಾನೋ ಗೊತ್ತಿಲ್ಲ. ವಾರದ ಹಿಂದಷ್ಟೇ ಉಕ್ರೇನ್ಗೆ ಹೋಗಿದ್ದ. ಇಡೀ ದಿನ ಏನೂ ತಿಂದಿಲ್ಲ ಆತ ಅಂತ ಉಡುಪಿಯ ಗ್ಲೆನ್‌ಮಿಲ್‌ ತಂದೆ ಮೆಲ್ವಿನ್‌ ತಿಳಿಸಿದ್ದಾರೆ.
200 ಡಾಲರ್‌ ಲಂಚ ಕೊಟ್ಟು ರೈಲು ಹತ್ತಿದ್ವಿ
ಮಂಗಳವಾರ ಸಂಜೆಯಿಂದ ಖಾರ್ಕೀವ್‌ನಲ್ಲಿ ಪರಿಸ್ಥಿತಿ ಬದಲಾಗಿದೆ. ಸದ್ಯ ಸ್ಥಳೀಯರಷ್ಟೇ ರೈಲಲ್ಲಿ ಪ್ರಯಾಣಿಸುತ್ತಿದ್ದಾರೆ. ವಿದೇಶಿಯರಿಗೆ ರೈಲು ಹತ್ತಲು ಅವಕಾಶ ನೀಡುತ್ತಿಲ್ಲ. ನಾವು ಮೂವರು ಸ್ಥಳೀಯ ಪೊಲೀಸರಿಗೆ ತಲಾ 200 ಡಾಲರ್‌ ಲಂಚ ನೀಡಿ, ಕೈ ಮುಗಿದು ರೈಲು ಹತ್ತಿದ್ದೇವೆ. ಬುಧವಾರ ಸಂಜೆ ಒಳಗೆ ದೇಶ ಬಿಟ್ಟು ಹೋಗಲು ಸೂಚನೆ ನೀಡಿದ್ದಾರೆ. ಮುಂದೆ ಏನಾದರೂ ನಾವು ಜವಾಬ್ದಾರಿ ಅಲ್ಲ ಎಂದಿದ್ದಾರೆ. ನಾವು ಆತಂಕದಲ್ಲಿದ್ದೇವೆ ಅಂತ ಅಥಣಿ ದುಂಡಪ್ಪ ಕೋಮಾರ ಹೇಳಿದ್ದಾರೆ.
