Asianet Suvarna News Asianet Suvarna News

ಫೆ.14-24ರ ವರೆಗೆ ವಿಮಾನ ಸೇವೆಯಲ್ಲಿ ವ್ಯತ್ಯಯ

ಫೆ.14-24ರ ವರೆಗೆ ವಿಮಾನ ಸೇವೆಯಲ್ಲಿ ವ್ಯತ್ಯಯ| ಏರೋ ಇಂಡಿಯಾ ವೈಮಾನಿಕ ಪ್ರದರ್ಶನ ಹಿನ್ನೆಲೆ| ಕೆಲ ಕಾಲ ವಾಣಿಜ್ಯ ವಿಮಾನಗಳ ಕಾರ್ಯಾಚರಣೆ ಸ್ಥಗಿತಕ್ಕೆ ನಿರ್ಧಾರ

Change in Flight Schedule at KIA Due To Bengaluru Air Show
Author
Bangalore, First Published Jan 22, 2019, 3:27 PM IST

 ಬೆಂಗಳೂರು[ಜ.22]: ನಗರದ ಯಲಹಂಕ ವೈಮಾನಿಕ ನೆಲೆಯಲ್ಲಿ ಫೆ.20ರಿಂದ 24ರ ವರೆಗೆ ಏರೋ ಇಂಡಿಯಾ ವೈಮಾನಿಕ ಪ್ರದರ್ಶನ ಜರುಗುವ ಹಿನ್ನೆಲೆಯಲ್ಲಿ ಫೆ.14ರಿಂದ 24ರವರೆಗೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ(ಕೆಐಎಎಲ್‌) ಕೆಲ ಕಾಲ ವಿಮಾನ ಸೇವೆಯಲ್ಲಿ ವ್ಯತ್ಯಯವಾಗಲಿದೆ ಎಂದು ಬೆಂಗಳೂರು ಇಂಟರ್‌ ನ್ಯಾಷನಲ್‌ ಏರ್‌ಪೋರ್ಟ್‌ ಲಿಮಿಟೆಡ್‌(ಬಿಐಎಎಲ್‌) ತಿಳಿಸಿದೆ.

ಏರೋ ಇಂಡಿಯಾ ವೈಮಾನಿಕ ಪ್ರದರ್ಶನ ಅಂತಾರಾಷ್ಟ್ರೀಯ ಮಟ್ಟದ ವೈಮಾನಿಕ ಪ್ರದರ್ಶನವಾಗಿದ್ದು, ಪ್ರತಿಷ್ಠಿತ ವಿಮಾನ ಕಂಪನಿಗಳು ತಮ್ಮ ಉತ್ಪನ್ನಗಳು ಹಾಗೂ ಸೇವೆಯನ್ನು ಈ ಐದು ದಿನಗಳ ಕಾಲ ಪ್ರದರ್ಶಿಸಲಿವೆ. ಇಂತಹ ಮಹತ್ವದ ಕಾರ್ಯಕ್ರಮವನ್ನು ಬಿಐಎಎಲ್‌ ಬೆಂಬಲಿಸುತ್ತಿದೆ. ಈ ಪ್ರದರ್ಶನದ ಸುರಕ್ಷತೆ ಹಾಗೂ ಯಶಸ್ಸಿಗಾಗಿ ಪ್ರದರ್ಶನದ ತಯಾರಿ ಮತ್ತು ಪ್ರದರ್ಶನದ ದಿನಗಳಂದು ಕೆಐಎಎಲ್‌ನಲ್ಲಿ ಕೆಲ ಕಾಲ ವಾಣಿಜ್ಯ ವಿಮಾನಗಳ ಕಾರ್ಯಾಚರಣೆ ಸ್ಥಗಿತಗೊಳಿಸಲು ನಿರ್ಧರಿಸಲಾಗಿದೆ.

ಇದರಿಂದ ವಿವಿಧ ಏರ್‌ಲೈನ್‌ಗಳ ವಿಮಾನ ಸಂಚಾರದ ವೇಳಾ ಪಟ್ಟಿಬದಲಾವಣೆಯಾಗಲಿದೆ. ಏರ್‌ಲೈನ್‌ ಕಂಪನಿಗಳು ಪ್ರಯಾಣಿಕರಿಗೆ ಬದಲಾದ ವೇಳಾ ಪಟ್ಟಿಅಥವಾ ವಿಮಾನ ರದ್ಧತಿ ಬಗ್ಗೆ ಮಾಹಿತಿ ನೀಡಲಿವೆ. ಇನ್ನು ವೈಮಾನಿಕ ಪ್ರದರ್ಶನದ ದಿನಗಳು ಕೆಐಎಎಲ್‌ಗೆ ಸಂಪರ್ಕ ಕಲ್ಪಿಸುವ ಎನ್‌ಎಚ್‌-4 ಹೆದ್ದಾರಿಯಲ್ಲಿ ವಾಹನ ಸಂಚಾರ ದಟ್ಟಣೆ ಇರುತ್ತದೆ. ಇದರಿಂದ ಏರ್‌ಪೋರ್ಟ್‌ ಟ್ಯಾಕ್ಸಿ ಮತ್ತು ಬಸ್‌ಗಳ ಸಂಚಾರಕ್ಕೆ ಹೆಚ್ಚಿನ ಸಮಯ ಹಿಡಿಯುತ್ತದೆ. ಹಾಗಾಗಿ ಪ್ರಯಾಣಿಕರು ಆ ದಿನಗಳಂದು ತಾವು ಪ್ರಯಾಣಿಸುವ ವಿಮಾನಗಳ ಸಂಸ್ಥೆಗಳೊಂದಿಗೆ ಸಂಪರ್ಕ ಸಾಧಿಸಿ, ವಿಮಾನಗಳ ಬದಲಾದ ವೇಳಾ ಪಟ್ಟಿಬಗ್ಗೆ ಮಾಹಿತಿ ಪಡೆಯಬೇಕು.

ಯಾವ ಸಮಯದಲ್ಲಿ ವಿಮಾನ ಸೇವೆ ಸ್ಥಗಿತ?

ಫೆ.14ರಿಂದ 17ರವರೆಗೆ ವೈಮಾನಿಕ ಪ್ರದರ್ಶನದ ತಾಲೀಮು ನಡೆಯುವ ಹಿನ್ನೆಲೆಯಲ್ಲಿ ಆ ದಿನಗಳಂದು ಮಧ್ಯಾಹ್ನ 1.30ರಿಂದ ಸಂಜೆ 4.30ರ ವರೆಗೆ ವಿಮಾನ ಕಾರ್ಯಾಚರಣೆ ಸ್ಥಗಿತವಾಗಲಿದೆ.

ಫೆ.18 ಮತ್ತು 19ರಂದು ಸಮವಸ್ತ್ರದೊಂದಿಗೆ ವೈಮಾನಿಕ ಪ್ರದರ್ಶನದ ಅಭ್ಯಾಸ ನಡೆಯಲಿರುವುದರಿಂದ ಈ ಎರಡೂ ದಿನ ಬೆಳಗ್ಗೆ 10ರಿಂದ ಮಧ್ಯಾಹ್ನ 12 ಮತ್ತು ಮಧ್ಯಾಹ್ನ 2ರಿಂದ ಸಂಜೆ 5ರವರೆಗೆ ವಿಮಾನ ಸಂಚಾರ ಸ್ಥಗಿತವಾಗಲಿದೆ.

ಫೆ.20ರಂದು ವೈಮಾನಿಕ ಪ್ರದರ್ಶನದ ಉದ್ಘಾಟನೆ ಮತ್ತು ವೈಮಾನಿಕ ಪ್ರದರ್ಶನ ಇರುವುದರಿಂದ ಬೆಳಗ್ಗೆ 9ರಿಂದ ಮಧ್ಯಾಹ್ನ 12 ಮತ್ತು ಮಧ್ಯಾಹ್ನ 2ರಿಂದ ಸಂಜೆ 5ರವರೆಗೆ ವಿಮಾನ ಸೇವೆ ಇರುವುದಿಲ್ಲ.

ಫೆ.21ರಿಂದ 24ರ ವರೆಗೆ ವೈಮಾನಿಕ ಪ್ರದರ್ಶನ ಇರುವುದರಿಂದ ಈ ದಿನಗಳಲ್ಲಿ ಬೆಳಗ್ಗೆ 10ರಿಂದ ಮಧ್ಯಾಹ್ನ 12 ಮತ್ತು ಮಧ್ಯಾಹ್ನ 2ರಿಂದ ಸಂಜೆ 5ರ ವರೆಗೆ ವಿಮಾನಗಳ ಕಾರ್ಯಾಚರಣೆ ಸ್ಥಗಿತಗೊಳ್ಳಲಿದೆ ಎಂದು ಬಿಐಎಎಲ್‌ ತಿಳಿಸಿದೆ.

Follow Us:
Download App:
  • android
  • ios