ಮಹಿಳಾ ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌: ಲವ್ಲೀನಾ ಸೇರಿದಂತೆ ಭಾರತದ ನಾಲ್ವರು ಫೈನಲ್‌ಗೆ
ಮಹಿಳಾ ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಭಾರತಕ್ಕೆ 4 ಬೆಳ್ಳಿ ಖಚಿತ
ಭಾರತದ ನಾಲ್ವರು ಮಹಿಳಾ ಬಾಕ್ಸರ್‌ಗಳು ಫೈನಲ್‌ಗೆ ಲಗ್ಗೆ
ಒಲಿಂಪಿಕ್ಸ್‌ ಪದಕ ವಿಜೇತೆ ಲವ್ಲೀನಾ ಬೊರ್ಗೋಹೈನ್‌ ಫೈನಲ್ ಪ್ರವೇಶ
ನವದೆಹಲಿ(ಮಾ.24): ಮಹಿಳಾ ಬಾಕ್ಸಿಂಗ್ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಭಾರತದ ನಾಲ್ವರು ಫೈನಲ್‌ಗೆ ಲಗ್ಗೆ ಇಟ್ಟಿದ್ದು, ಕನಿಷ್ಠ ಬೆಳ್ಳಿ ಪದಕ ಖಚಿತಪಡಿಸಿಕೊಂಡಿದ್ದಾರೆ. ಗುರುವಾರ 50 ಕೆ.ಜಿ. ವಿಭಾಗದ ಸೆಮಿಫೈನಲ್‌ನಲ್ಲಿ ಹಾಲಿ ಚಾಂಪಿಯನ್‌ ನಿಖಾತ್‌ ಒಲಿಂಪಿಕ್ಸ್‌ ಪದಕ ವಿಜೇತೆ, ಕೊಲಂಬಿಯಾದ ವೆಲೆನ್ಸಿಯಾ ಇಂಗ್ರಿಟ್‌ ವಿರುದ್ಧ 5-0 ಗೆಲುವು ಸಾಧಿಸಿದರೆ, 48 ಕೆ.ಜಿ. ವಿಭಾಗದಲ್ಲಿ ನೀತು ಗಂಗಾಸ್‌ ಕಜಕಸ್ತಾನದ ಬಲ್ಕಿಬೆಕೋವಾ ಅವರನ್ನು 5-2ರಿಂದ ಸೋಲಿಸಿದರು.
ಒಲಿಂಪಿಕ್ಸ್‌ ಪದಕ ವಿಜೇತೆ ಲವ್ಲೀನಾ ಬೊರ್ಗೋಹೈನ್‌(75 ಕೆ.ಜಿ.) ಚೀನಾದ ಲಿ ಕ್ವಿಯಾನ್‌ ವಿರುದ್ಧ 4-1ರಿಂದ ಗೆದ್ದು ಮೊದಲ ಬಾರಿ ಫೈನಲ್‌ಗೆ ಲಗ್ಗೆ ಇಟ್ಟರು. 81+ ಕೆ.ಜಿ. ವಿಭಾಗದಲ್ಲಿ ಸ್ವೀಟಿ ಆಸ್ಪ್ರೇಲಿಯಾದ ಎಮ್ಮಾ ಗ್ರೀನ್‌ಟ್ರೀ ವಿರುದ್ಧ 4-3 ಅಂತರದಲ್ಲಿ ಗೆದ್ದು ಫೈನಲ್ ತಲುಪಿದರು. ಆದರೆ ಕಳೆದ ಅವೃತ್ತಿಯ ಕಂಚು ವಿಜೇತೆ ಮನೀಶಾ(57 ಕೆ.ಜಿ.), ಸಾಕ್ಷಿ ಚೌಧರಿ(52 ಕೆ.ಜಿ.), ಜಾಸ್ಮಿನ್‌(60 ಕೆ.ಜಿ.) ಹಾಗೂ ನುಪೂರ್‌(81 ಕೆ.ಜಿ.) ಗುರುವಾರ ಕ್ವಾರ್ಟರ್‌ ಫೈನಲ್‌ನಲ್ಲಿ ಸೋತು ಹೊರಬಿದ್ದರು.
ಸ್ವಿಸ್‌ ಓಪನ್‌: ಭಾರತೀಯ ಪುರುಷರ ಅಭಿಯಾನ ಅಂತ್ಯ
ಬಸೆಲ್‌: 2023ರಲ್ಲಿ ಭಾರತೀಯ ಪುರುಷ ಶಟ್ಲರ್‌ಗಳ ಕಳಪೆ ಲಯ ಮುಂದುವರಿದಿದ್ದು, ಸ್ವಿಸ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ 2ನೇ ಸುತ್ತಿನಲ್ಲೇ ಅಭಿಯಾನ ಕೊನೆಗೊಳಿಸಿದ್ದಾರೆ. ಗುರುವಾರ ಪುರುಷರ ಸಿಂಗಲ್ಸ್‌ನಲ್ಲಿ ಮಾಜಿ ವಿಶ್ವ ನಂ.1 ಕಿದಂಬಿ ಶ್ರೀಕಾಂತ್‌, ಎಚ್‌.ಎಸ್‌.ಪ್ರಣಯ್‌ ಹಾಗೂ ಹಾಲಿ ರಾಷ್ಟ್ರೀಯ ಚಾಂಪಿಯನ್‌, ಕರ್ನಾಟಕದ ಮಿಥುನ್‌ ಮಂಜುನಾಥ್‌ ಸೋಲನಭವಿಸಿದರು. ಲಕ್ಷ್ಯ ಸೇನ್‌ ಮೊದಲ ಸುತ್ತಲ್ಲೇ ಸೋತು ಹೊರಬಿದ್ದಿದ್ದರು.
ಶೂಟಿಂಗ್‌ ವಿಶ್ವಕಪ್‌: ಮತ್ತೆ 2 ಪದಕ ಗೆದ್ದ ಭಾರತೀಯರು
ಭೋಪಾಲ್‌: ಐಎಸ್‌ಎಸ್‌ಎಫ್‌ ಪಿಸ್ತೂಲ್‌/ರೈಫಲ್‌ ವಿಶ್ವಕಪ್‌ನಲ್ಲಿ ಭಾರತ ಮತ್ತೆರಡು ಪದಕ ಬಾಚಿಕೊಂಡಿದೆ. ಗುರುವಾರ 10 ಮೀ. ಏರ್‌ ಪಿಸ್ತೂಲ್‌ ಮಿಶ್ರ ತಂಡ ವಿಭಾಗದಲ್ಲಿ ವರುಣ್‌ ತೋಮರ್‌-ರಿಧಂ ಸಂಗ್ವಾನ್‌ ಬೆಳ್ಳಿ ಪದಕ ಗೆದ್ದರೆ, 10 ಮೀ. ಏರ್‌ ರೈಫಲ್‌ ಮಿಶ್ರ ತಂಡ ವಿಭಾಗದಲ್ಲಿ ರುದ್ರಾಂಕ್‌್ಷ ಪಾಟೀಲ್‌ ಹಾಗೂ ನರ್ಮದಾ ನಿತಿನ್‌ ಕಂಚು ತಮ್ಮದಾಗಿಸಿಕೊಂಡರು. ಬುಧವಾರ ಭಾರತ ಒಂದು ಚಿನ್ನ, ಕಂಚು ಗೆದ್ದಿತ್ತು.
ಐಪಿಎಲ್ ಟೂರ್ನಿಯಲ್ಲಿ ನಡೆದ ಈ ಕಾಂಟ್ರೊವರ್ಸಿಗಳು ನಿಮಗೆ ನೆನಪಿವೆಯಾ..?
ಇಂದಿನಿಂದ ಬೆಂಗಳೂರಲ್ಲಿ ವೇಟ್‌ಲಿಫ್ಟಿಂಗ್‌
ಬೆಂಗಳೂರು: 4ನೇ ಆವೃತ್ತಿಯ ಖೇಲೋ ಇಂಡಿಯಾ ರಾಷ್ಟ್ರೀಯ ಮಹಿಳಾ ರಾರ‍ಯಂಕಿಂಗ್‌ ವೇಟ್‌ಲಿಫ್ಟಿಂಗ್‌ ಚಾಂಪಿಯನ್‌ಶಿಪ್‌ ಶುಕ್ರವಾರ ಬೆಂಗಳೂರಿನ ಕಂಠೀರವ ಕ್ರೀಡಾಂಗಣದಲ್ಲಿ ಆರಂಭಗೊಳ್ಳಲಿದೆ. ಈಗಾಗಲೇ ಗುರುವಾರ ತೂಕ ಪರೀಕ್ಷೆ ನಡೆದಿದ್ದು, ಸ್ಪರ್ಧೆಗಳು ಶುಕ್ರವಾರ ಆರಂಭಗೊಳ್ಳಲಿದೆ. ಮಾ.29ಕ್ಕೆ ಕೂಟ ಮುಕ್ತಾಯಗೊಳ್ಳಲಿದೆ.
ಕೂಟದ ಉದ್ಘಾಟನಾ ಸಮಾರಂಭ ಬೆಳಗ್ಗೆ 11.30ಕ್ಕೆ ನಡೆಯಲಿದೆ. ಫಿಬಾ ಏಷ್ಯಾ ಅಧ್ಯಕ್ಷ ಡಾ.ಕೆ.ಗೋವಿಂದರಾಜು, ಕರ್ನಾಟಕ ರಾಜ್ಯ ವೇಟ್‌ಲಿಫ್ಟಿಂಗ್‌ ಸಂಸ್ಥೆ ಅಧ್ಯಕ್ಷ ದಯಾನಂದ ಪೈ, ಕ್ರೀಡಾ ಇಲಾಖೆ ಆಯುಕ್ತ ಮುಲ್ಲೈ ಮುಹಿಲನ್‌ ಸೇರಿದಂತೆ ಪ್ರಮುಖರು ಪಾಲ್ಗೊಳ್ಳಲಿದ್ದಾರೆ. ಟೂರ್ನಿಯಲ್ಲಿ 600ಕ್ಕೂ ಹೆಚ್ಚು ವೇಟ್‌ಲಿಫ್ಟರ್‌ಗಳು ಪಾಲ್ಗೊಳ್ಳಲಿದ್ದಾರೆ.
ಟೋಕಿಯೋ ಒಲಿಂಪಿಕ್ಸ್‌ ಬೆಳ್ಳಿ ವಿಜೇತೆ ಮೀರಾಬಾಯಿ ಚಾನು, ಕಾಮನ್‌ವೆಲ್ತ್‌ ಗೇಮ್ಸ್‌ ಬೆಳ್ಳಿ ವಿಜೇತೆ ಬಿಂದ್ಯಾರಾಣಿ, ವಿಶ್ವ ಕಿರಿಯರ ಚಾಂಪಿಯನ್‌ಶಿಪ್‌ನ ಪದಕ ವಿಜೇತೆ ಆಕಾಂಕ್ಷ, ರಾಜ್ಯದ ಬಿ.ಎನ್‌.ಉಷಾ ಪ್ರಮುಖ ಆಕರ್ಷಣೆಯಾಗಿದ್ದಾರೆ.
