ಢಾಕಾ(ಸೆ.30): ಆಟ ಮುಗಿಯವ ಕೊನೇ ಕ್ಷಣದಲ್ಲಿ ಅಭಿಷೇಕ್‌ ದಾಖಲಿಸಿದ ಏಕೈಕ ಗೋಲಿನ ನೆರವಿನಿಂದ ಶುಕ್ರವಾರ ಮುಕ್ತಾಯ ಕಂಡ ಹದಿನೆಂಟು ವರ್ಷದೊಳಗಿನವರ ಹಾಕಿ ಚಾಂಪಿಯನ್‌ಶಿಪ್‌ ಪಂದ್ಯಾವಳಿಯಲ್ಲಿ ಭಾರತ ಆತಿಥೇಯ ಬಾಂಗ್ಲಾದೇಶವನ್ನು 5-4 ಗೋಲುಗಳಿಂದ ಮಣಿಸಿ ಚಾಂಪಿಯನ್ ಎನಿಸಿತು.
ಕಿಕ್ಕಿರಿದು ನೆರೆದಿದ್ದ ಕ್ರೀಡಾಂಗಣದಲ್ಲಿ 4-4ರಿಂದ ಸಮಬಲ ಸಾಧಿಸಿದ್ದ ಇತ್ತಂಡಗಳು ಫಲಿತಾಂಶಕ್ಕಾಗಿ ಪೆನಾಲ್ಟಿಶೂಟೌಟ್‌ಗೆ ಮೊರೆಹೋಗುವ ಸಾಧ್ಯತೆಗಳಿತ್ತು. ಆದರೆ, ಪಂದ್ಯ ಮುಗಿಯಲು ಇನ್ನು ಕೇವಲ 20 ಸೆಕೆಂಡುಗಳಿವೆ ಎನ್ನುವಾಗ ಭಾರತ ದಾಖಲಿಸಿದ ಮಿಂಚಿನ ಗೋಲು ಆತಿಥೇಯ ಬಾಂಗ್ಲಾವನ್ನು ನಿರಾಸೆಯ ಕಡಲೊಳಗೆ ಮುಳುಗಿಸಿತು.
ಶುರುವಿನಿಂದಲೇ ಆಕ್ರಮಣಕಾರಿ ಆಟಕ್ಕೆ ಇಳಿದ ಭಾರತದ ವಿರುದ್ಧ ಬಾಂಗ್ಲಾ ಕೂಡ ದಿಟ್ಟಆಟವನ್ನೇ ಆಡಿತು. 6ನೇ ನಿಮಿಷದಲ್ಲಿ ಸಿಕ್ಕ ಪೆನಾಲ್ಟಿಅವಕಾಶವನ್ನು ಭಾರತ ಗೋಲಾಗಿ ಪರಿವರ್ತಿಸಲಿಲ್ಲ. ಆದರೆ, ಇದರ ಬೆನ್ನಿಗೇ ರೋಮನ್‌ ಸರ್ಕಾರ್‌ ಬಾರಿಸಿದ ಗೋಲು ಆತಿಥೇಯರಿಗೆ ಮುನ್ನಡೆ ತಂದಿತ್ತಿತು. ಆದರೆ ಇದಕ್ಕೆ ಪ್ರತಿಯಾಗಿ ಭಾರತ ಕೂಡ ಶಿವಂ ಆನಂದ್‌ ದಾಖಲಿಸಿದ ಗೋಲಿನಿಂದ ತಿರುಗೇಟ ನೀಡಿತು. ಹೀಗಾಗಿ ಪ್ರಥಮಾರ್ಧದ ಮುಕ್ತಾಯದ ಹಂತಕ್ಕೆ ಇತ್ತಂಡಗಳೂ 1-1ರಿಂದ ಸಮಬಲ ಸಾಧಿಸಿದವು. ಆದರೆ, ದ್ವಿತೀಯಾರ್ಧದಲ್ಲಿನ ಹೋರಾಟ ಇನ್ನಷ್ಟುಹೊಳಪುಗಟ್ಟಿತು. ಹೆಜ್ಜೆ ಹೆಜ್ಜೆಗೂ ಅತೀವ ಕೌತುಕ ಹಾಗೂ ಕುತೂಹಲದಿಂದ ಸಾಗಿದ ಪಂದ್ಯದಲ್ಲಿ ಮೊಹಮದ್‌ ಮೊಹ್ಸಿನ್‌ ಆಕರ್ಷಕ ಗೋಲು ಬಾರಿಸಿದ್ದು ಬಾಂಗ್ಲಾ 2-1 ಮುನ್ನಡೆಗೆ ಕಾರಣವಾದರು. ಬಳಿಕ ಹಾರ್ದಿಕ್‌ ಸಿಂಗ್‌ ದಾಖಲಿಸಿದ ಪೆನಾಲ್ಟಿಗೋಲು ಮತ್ತೆ ಸಮಬಲ ತಂದರೆ, ಇದರ ಬೆನ್ನಿಗೇ ದಿಲಿ್ೊ್ರೕತ್‌ ಸಿಂಗ್‌ ಗೋಲು ಹೊಡೆದು ಭಾರತಕ್ಕೆ 3-2 ಮುನ್ನಡೆ ತಂದಿತ್ತರು. ಪಂದ್ಯದ 60ನೇ ನಿಮಿಷದಲ್ಲಿ ಮೊಹಮದ್‌ ಅಶ್ರಫುಲ್‌ ಗೋಲು ಬಾರಿಸಿ ಮತ್ತೆ ಸಮಬಲ ಸಾಧಿಸಿದರು.
ಪಂದ್ಯ ರೋಚಕತೆಯ ಮಜಲು ಮುಟ್ಟಿದ್ದೇ ಈ ಘಳಿಗೆಯಲ್ಲಿ. ಇಬುಂಗೊ ಸಿಂಗ್‌ ಗಳಿಸಿದ ಗೋಲು ಭಾರತಕ್ಕೆ ಮತ್ತೆ ಜಯದ ಆಸೆ ಹೊಮ್ಮಿಸಿದರೆ, ಬಾಂಗ್ಲಾ ಪರ 64ನೇ ನಿಮಿಷದಲ್ಲಿ ಮೆಹಬೂಬ್‌ ಹುಸೇನ್‌ ಬಾರಿಸಿದ ಗೋಲು 4-4 ಸಮಬಲಕ್ಕೆ ಕಾರಣವಾಯಿತು. ಆದರೆ, ಈ ಹಂತದಲ್ಲಿ ಅಭಿಷೇಕ್‌ ಮಿಂಚಿನಂತೆ ಎರಗಿದ್ದು ಬಾಂಗ್ಲಾಗೆ ಆಘಾತ ನೀಡಿತು.
ಫೈನಲ್‌ನಲ್ಲಿ ಮನೋಜ್ಞ ಆಟವಾಡಿದ ಹಾರ್ದಿಕ್‌ ಸಿಂಗ್‌ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರೆ, ಪಂಕಜ್‌ ಕುಮಾರ್‌ ರಜಾಕ್‌ ಅತ್ಯುತ್ತಮ ಗೋಲ್‌ಕೀಪರ್‌ ಎನಿಸಿದರು.
