Asianet Suvarna News Asianet Suvarna News

ಒಂದೇ ರೈಡ್‌ನಲ್ಲಿ ಪ್ರದೀಪ್ ನರ್ವಾಲ್‌ಗೆ 6 ಅಂಕ..!

ಪ್ರದೀಪ್ ನರ್ವಾಲ್ ಒಂದೇ ರೈಡ್‌ನಲ್ಲಿ 6 ಅಂಕ ಗಳಿಸುವ ಮೂಲಕ ಪ್ರೊ ಕಬಡ್ಡಿ ಇತಿಹಾಸದಲ್ಲಿ ಹೊಸ ದಾಖಲೆ ಬರೆದಿದ್ದಾರೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ...

Pro Kabaddi 2019 Pardeep scores 34 in Patna Pirates big win over Bengal Warriors
Author
Greater Noida, First Published Oct 7, 2019, 11:21 AM IST

ಗ್ರೇಟರ್ ನೋಯ್ಡಾ(ಅ.07): ಪಾಟ್ನಾ ಪೈರೇಟ್ಸ್‌ನ ತಾರಾ ರೈಡರ್ ಪ್ರದೀಪ್ ನರ್ವಾಲ್ ಒಂದೇ ರೈಡ್‌ನಲ್ಲಿ 6 ಅಂಕಗಳನ್ನು ಸಂಪಾದಿಸಿದ ಪ್ರೊ ಕಬಡ್ಡಿ ದಾಖಲೆ ಬರೆದಿದ್ದಾರೆ. 38ನೇ ನಿಮಿಷದಲ್ಲಿ ಪ್ರದೀಪ್ ದಾಖಲೆಯ ರೈಡ್ ಮಾಡಿದ್ದರು. ಪ್ರೊ ಕಬಡ್ಡಿ 7ನೇ ಆವೃತ್ತಿಯ ಕೊನೆಯ ಪಂದ್ಯವಾಡಿದ ಪಾಟ್ನಾ ಪರ ಮಿಂಚಿದ ಪ್ರದೀಪ್ 300 ರೈಡ್ ಅಂಕಗಳ ಮೈಲಿಗಲ್ಲು ದಾಖಲಿಸಿದರು.

PKL 7: ಪ್ಲೇ ಆಫ್‌ಗೆ ಲಗ್ಗೆಯಿಟ್ಟ ಯೋಧಾ

ಭಾನುವಾರ ಇಲ್ಲಿ ನಡೆದ ಪಂದ್ಯದಲ್ಲಿ ಈಗಾಗಲೇ ಪ್ಲೇಆಫ್ ಪ್ರವೇಶಿಸಿದ ಬೆಂಗಾಲ್ ವಾರಿಯರ್ಸ್‌ ತನ್ನ ತಾರಾ ಆಟಗಾರರಿಗೆ ವಿಶ್ರಾಂತಿ ನೀಡಿತು. ಪ್ರದೀಪ್ ಭರ್ಜರಿ ಪ್ರದರ್ಶನದಿಂದ ಪಾಟ್ನಾ 69-41ರಲ್ಲಿ ಅಮೋಘ 28 ಅಂಕಗಳಿಂದ ಜಯಿಸಿತು. ಈ ಪಂದ್ಯವೊಂದರಲ್ಲೇ ದಾಖಲೆ 110 ಅಂಕಗಳು ಹರಿದುಬಂದವು. ಬೆಂಗಾಲ್ ತಂಡವನ್ನು 4 ಬಾರಿ ಆಲೌಟ್‌ನತ್ತ ತಳ್ಳಿದ ಪಾಟ್ನಾ ಶ್ರೇಷ್ಠ ಪ್ರದರ್ಶನ ನೀಡಿತು. ಈ ಆವೃತ್ತಿಗೆ ಪಾಟ್ನಾ ಗೆಲುವಿನ ವಿದಾಯ ಹೇಳಿತು.

ಪಂದ್ಯವೊಂದರಲ್ಲೇ ಪ್ರದೀಪ್ 36 ಅಂಕಗಳನ್ನು ಸಂಪಾದಿಸಿದರು. 34 ರೈಡ್ ಹಾಗೂ 2 ಟ್ಯಾಕಲ್ ಅಂಕಗಳನ್ನೂ ಗಳಿಸಿದ್ದು, ಪವನ್ ಶೆರಾವತ್ ದಾಖಲೆ ಮುರಿಯುವಲ್ಲಿ ಎಡವಿದರು. ಮೊದಲಾರ್ಧ ಪಾಟ್ನಾ 27-17ರಲ್ಲಿ ಮುನ್ನಡೆ ಪಡೆಯಿತು. 22 ಪಂದ್ಯಗಳಲ್ಲಿ 13 ಸೋಲುಂಡಿದ್ದ ಪಾಟ್ನಾ 8 ನೇ ಜಯ ಸಾಧಿಸಿದ್ದು, 51 ಅಂಕಗಳನ್ನು ಸಂಪಾದಿಸಿತು.

4ನೇ ಸ್ಥಾನಕ್ಕೆ ಯುಪಿ ಯೋಧಾ!

ಯು.ಪಿ ಯೋಧಾ ತವರಿನ ಚರಣದಲ್ಲಿ ಸತತ 2ನೇ ಜಯ ಸಾಧಿಸಿದ್ದು, 20ನೇ ಪಂದ್ಯದಲ್ಲಿ 69 ಅಂಕಗಳೊಂದಿಗೆ 4ನೇ ಸ್ಥಾನಕ್ಕೇರಿತು. ಭಾನುವಾರ ಇಲ್ಲಿ ನಡೆದ 2ನೇ ಪಂದ್ಯದಲ್ಲಿ ಪುಣೇರಿ ಪಲ್ಟಾನ್ ವಿರುದ್ಧ 43-39ರಲ್ಲಿ ರೋಚಕ ಜಯ ಸಾಧಿಸಿತು. 

ಕಳೆದ ಪಂದ್ಯದಲ್ಲಿ ಗೆದ್ದ ಯೋಧಾ 6ನೇ ತಂಡವಾಗಿ ಪ್ರೊ ಕಬಡ್ಡಿ 7ನೇ ಆವೃತ್ತಿ ಪ್ಲೇಆಫ್ ಪ್ರವೇಶಿಸಿತ್ತು. ಕೊನೆಯ ಪಂದ್ಯವಾಡಿದ ಪುಣೇರಿ 12ನೇ ಸೋಲುಂಡು ಹೊರಬಿದ್ದಿತು.
 

Follow Us:
Download App:
  • android
  • ios