PKL 2019: ಗೆಲುವಿನ ಸಿಹಿ ಕಂಡ ಗುಜರಾತ್, ಯು ಮುಂಬಾ!
ಪ್ರೊ ಕಬಡ್ಡಿ ಲೀಗ್ ಟೂರ್ನಿಯಲ್ಲಿ ಸೋಲನ್ನೇ ಹಾಸು ಹೊದ್ದು ಮಲಗಿದ್ದ ಗುಜರಾತ್ ಫಾರ್ಚೂನ್ಜೈಂಟ್ಸ್ ಕೊನೆಗೂ ಗೆಲುವು ಸಾಧಿಸಿದೆ. ಇತ್ತ ಹಲವು ಏರಿಳಿತ ಕಂಡಿದ್ದ ಯು ಮುಂಬಾ ಮತ್ತೆ ಗೆಲುವಿನ ಲಯಕ್ಕೆ ಮರಳಿದೆ.
ಚೆನ್ನೈ(ಆ.24): ಪ್ರೊ ಕಬಡ್ಡಿ 7ನೇ ಆವೃತ್ತಿಯಲ್ಲಿ ಸತತ 6 ಸೋಲುಗಳಿಂದ ಕಂಗೆಟ್ಟಿದ್ದ 2 ಬಾರಿ ರನ್ನರ್‌-ಅಪ್‌ ಗುಜರಾತ್ ಫಾರ್ಚೂನ್ಜೈಂಟ್ಸ್, ಕೊನೆಗೂ ಗೆಲುವಿನ ಸಿಹಿಯುಂಡಿದೆ. ಶುಕ್ರವಾರ ಇಲ್ಲಿ ನಡೆದ ಪಂದ್ಯದಲ್ಲಿ 3 ಬಾರಿ ಚಾಂಪಿಯನ್‌ ಪಾಟ್ನಾ ಪೈರೇಟ್ಸ್ ವಿರುದ್ಧ 29-26 ಅಂಕಗಳ ರೋಚಕ ಗೆಲುವು ಸಾಧಿಸಿತು. ಪಾಟ್ನಾಗಿದು ಈ ಆವೃತ್ತಿಯಲ್ಲಿ 7ನೇ ಸೋಲಾಗಿದ್ದು, ತಂಡ ಪ್ಲೇ-ಆಫ್‌ಗೇರುವುದು ಅನುಮಾನ ಎನಿಸುತ್ತಿದೆ. ಮೊದಲಾರ್ಧದ ಮುಕ್ತಾಯಕ್ಕೆ 15-11ರಿಂದ ಮುಂದಿದ್ದ ಪಾಟ್ನಾ, ದ್ವಿತೀಯಾರ್ಧದಲ್ಲಿ ಮಂಕಾಯಿತು. ನಾಯಕ ಪ್ರದೀಪ್‌(09) ಅಂಕ ಗಳಿಸಿದರೂ ಪಾಟ್ನಾ ಗೆಲ್ಲಲಿಲ್ಲ. ರೋಹಿತ್ (10 ಅಂಕ) ಗುಜರಾತ್ ಗೆಲುವಿಗೆ ನೆರವಾದರು.
ಇದನ್ನೂ ಓದಿ: ಬೆಂಗಳೂರು ಬುಲ್ಸ್ ತಂಡದಲ್ಲಿ ಬಾಕಿ ಹಗರಣ; ಮಾಲೀಕರ ವಿರುದ್ಧ ಅಸಮಧಾನ!
ಮುಂಬಾಗೆ ಭರ್ಜರಿ ಜಯ
ಶುಕ್ರವಾರ ನಡೆದ 2ನೇ ಪಂದ್ಯದಲ್ಲಿ ತಮಿಳ್‌ ತಲೈವಾಸ್‌ ವಿರುದ್ಧ ಯು ಮುಂಬಾ 00-00 ಅಂತರದಲ್ಲಿ ಗೆಲುವು ಸಾಧಿಸಿತು. ಈ ಗೆಲುವಿನೊಂದಿಗೆ ಮುಂಬಾ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿತು. ತವರಿನ ಚರಣವನ್ನು ತಲೈವಾಸ್‌ ಒಂದೂ ಗೆಲುವು ಕಾಣದೆ ಮುಕ್ತಾಯಗೊಳಿಸಿತು. ಆಡಿದ 4 ಪಂದ್ಯಗಳಲ್ಲಿ 3ರಲ್ಲಿ ಸೋತರೆ ಮತ್ತೊಂದು ಪಂದ್ಯ ಟೈ ಆಗಿತ್ತು. ಶನಿವಾರದಿಂದ ದೆಹಲಿ ಚರಣ ಆರಂಭಗೊಳ್ಳಲಿದ್ದು, ದಬಾಂಗ್‌ ಡೆಲ್ಲಿ ತಂಡ ತನ್ನ ತವರಿನ ಪಂದ್ಯಗಳನ್ನು ಆಡಲಿದೆ.
