5ನೇ ಏಷ್ಯಾ ಚಿನ್ನದ ಪದಕಕ್ಕೆ ಪಂಚ್ ಕೊಟ್ಟ ಮೇರಿ ಕೋಮ್; ತೋಳಲ್ಲಿನ್ನು ಶಕ್ತಿಯಿದೆ ಎಂದ ಮೂರು ಮಕ್ಕಳ ತಾಯಿ
‘ಪ್ರತಿ ಪದಕವೂ ನಾನು ಕ್ರಮಿಸಿದ ಕಠಿಣ ಹಾದಿಗೆ ಸಿಕ್ಕ ಪ್ರತಿಫಲವಾಗಿದೆ. ನನ್ನ ತೋಳುಗಳಲ್ಲಿ ಇನ್ನೂ ಶಕ್ತಿ ಇದೆ. ನನ್ನ ಅಂತಾರಾಷ್ಟ್ರೀಯ ವೃತ್ತಿಬದುಕು ಮುಗಿಯಿತು ಎಂದು ಹಲವರು ಹೇಳಿದ್ದರು. ಅವರಿಗೆಲ್ಲಾ ಈ ಚಿನ್ನದ ಪದಕವೇ ಉತ್ತರ ಎಂದು ಹೇಳಲು ಇಚ್ಛಿಸುತ್ತೇನೆ’ ಎಂದು ಮೇರಿ ಹೇಳಿದರು. 2016ರ ರಿಯೋ ಒಲಿಂಪಿಕ್ಸ್‌'ಗೆ ಅರ್ಹತೆ ಪಡೆಯಲು ವಿಫಲರಾದ ಬಳಿಕ ಮೇರಿ, ನಿವೃತ್ತಿ ಘೋಷಿಸಬೇಕು ಎಂದು ಹಲವರು ಅಭಿಪ್ರಾಯಪಟ್ಟಿದ್ದರು.
ವಿಯೆಟ್ನಾಂ(ನ.09): ಐದು ಬಾರಿ ವಿಶ್ವ ಚಾಂಪಿಯನ್, ಮೂರು ಮಕ್ಕಳ ತಾಯಿ, ಭಾರತದ ಮೇರಿ ಕೋಮ್ ಏಷ್ಯಾ ಬಾಕ್ಸಿಂಗ್ ಚಾಂಪಿಯನ್'ಶಿಪ್'ನ 48 ಕೆಜಿ ವಿಭಾಗದಲ್ಲಿ ಚಿನ್ನದ ಪದಕ ಗೆದ್ದಿದ್ದಾರೆ. ಫೈನಲ್‌ನಲ್ಲಿ ಉ.ಕೊರಿಯಾದ ಕಿಮ್ ಹ್ಯಾಂಗ್ ಮಿ ವಿರುದ್ಧ ಮೇರಿ 5-0 ಅಂತರದ ಸುಲಭ ಗೆಲುವು ದಾಖಲಿಸಿದರು.
ಈ ಚಾಂಪಿಯನ್'ಶಿಪ್'ನಲ್ಲಿ ಮೇರಿ ಎದುರಿಸಿದ ಅತ್ಯಂತ ಕಠಿಣ ಎದುರಾಳಿ ಕಿಮ್. ಆದರೂ ತಮ್ಮ ಅನುಭವದ ಬಲದೊಂದಿಗೆ ಭಾರತೀಯ ಬಾಕ್ಸಿಂಗ್ ತಾರೆ, ನಿರಾಯಾಸವಾಗಿ ಗೆಲುವು ಸಾಧಿಸಿದರು. ಏಷ್ಯಾಚಾಂಪಿಯನ್‌'ಶಿಪ್'ನಲ್ಲಿ ಇದು ಅವರ 5ನೇ ಚಿನ್ನ ಹಾಗೂ 6ನೇ ಪದಕವಾಗಿದೆ. ಈ ಮೊದಲು ಮೇರಿ, 2003,2005, 2010, 2012ರಲ್ಲಿ ಚಿನ್ನ ಗೆದ್ದಿದ್ದರು.
ಏಷ್ಯನ್ ಗೇಮ್ಸ್ ಬಳಿಕ ಮೊದಲ ಚಿನ್ನ: 2014ರ ಏಷ್ಯನ್ ಗೇಮ್ಸ್'ನಲ್ಲಿ ಚಿನ್ನದ ಪದಕ ಗೆದ್ದಿದ್ದ ಮೇರಿ ಕೋಮ್, ಆ ನಂತರ ಅಂತರಾಷ್ಟ್ರೀಯ ಕೂಟದಲ್ಲಿ ಜಯಿಸುತ್ತಿರುವ ಮೊದಲ ಚಿನ್ನ ಇದಾಗಿದೆ. ಅಲ್ಲದೇ ಕಳೆದೊಂದು ವರ್ಷದಲ್ಲಿ ಅವರು ಗೆಲ್ಲುತ್ತಿರುವ ಮೊದಲ ಪದಕವಿದು. ಇತ್ತೀಚೆಗಷ್ಟೇ 51 ಕೆಜಿಯಿಂದ 48 ಕೆಜಿ ವಿಭಾಗಕ್ಕೆ ಕಾಲಿಟ್ಟಿದ್ದ ಮೇರಿ, ಈ ವಿಭಾಗದಲ್ಲಿ ಗೆಲ್ಲುತ್ತಿರುವ ಮೊದಲ ಅಂತರಾಷ್ಟ್ರೀಯ ಪದಕ ಎನ್ನುವುದು ಮತ್ತೊಂದು ವಿಶೇಷವಾಗಿದೆ.
ಸೋನಿಯಾಗೆ ಬೆಳ್ಳಿ: 57 ಕೆಜಿ ವಿಭಾಗದ ಫೈನಲ್ ಪ್ರವೇಶಿಸಿದ್ದ ವಿಶ್ವ ಚಾಂಪಿಯನ್'ಶಿಪ್ ಬೆಳ್ಳಿ ಪದಕ ವಿಜೇತೆ ಸೋನಿಯಾ ಲಾಥರ್, ಚೀನಾದ ಯಿನ್ ಜುನ್ಹ ವಿರುದ್ಧ ಸೋತು ಬೆಳ್ಳಿಗೆ ತೃಪ್ತಿಪಟ್ಟರು. ಇದರೊಂದಿಗೆ ಭಾರತ 1 ಚಿನ್ನ, 1 ಬೆಳ್ಳಿ ಹಾಗೂ 5 ಕಂಚಿನೊಂದಿಗೆ ಕೂಟಕ್ಕೆ ವಿದಾಯ ಹೇಳಿತು. 2015ರ ಆವೃತ್ತಿಯಲ್ಲಿ ಭಾರತ ಒಟ್ಟು 6 ಪದಕ ಗಳಿಸಿತ್ತು.
‘ನನ್ನ ತೋಳುಗಳಲ್ಲಿ ಇನ್ನೂ ಶಕ್ತಿಯಿದೆ’:
35 ವರ್ಷದ ಮೇರಿ, ಚಿನ್ನ ಗೆಲ್ಲುತ್ತಲೇ ಭಾವುಕರಾದರು. ಬಳಿಕ, ಪ್ರತಿಕ್ರಿಯೆ ನೀಡಿದ ಅವರು ‘ಪ್ರತಿ ಪದಕವೂ ನಾನು ಕ್ರಮಿಸಿದ ಕಠಿಣ ಹಾದಿಗೆ ಸಿಕ್ಕ ಪ್ರತಿಫಲವಾಗಿದೆ. ನನ್ನ ತೋಳುಗಳಲ್ಲಿ ಇನ್ನೂ ಶಕ್ತಿ ಇದೆ. ನನ್ನ ಅಂತಾರಾಷ್ಟ್ರೀಯ ವೃತ್ತಿಬದುಕು ಮುಗಿಯಿತು ಎಂದು ಹಲವರು ಹೇಳಿದ್ದರು. ಅವರಿಗೆಲ್ಲಾ ಈ ಚಿನ್ನದ ಪದಕವೇ ಉತ್ತರ ಎಂದು ಹೇಳಲು ಇಚ್ಛಿಸುತ್ತೇನೆ’ ಎಂದು ಮೇರಿ ಹೇಳಿದರು. 2016ರ ರಿಯೋ ಒಲಿಂಪಿಕ್ಸ್‌'ಗೆ ಅರ್ಹತೆ ಪಡೆಯಲು ವಿಫಲರಾದ ಬಳಿಕ ಮೇರಿ, ನಿವೃತ್ತಿ ಘೋಷಿಸಬೇಕು ಎಂದು ಹಲವರು ಅಭಿಪ್ರಾಯಪಟ್ಟಿದ್ದರು.
