ಇಂಟರ್ಕಾಂಟಿನೆಂಟಲ್ ಕಪ್ ಫುಟ್ಬಾಲ್ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಭಾರತ ಕೀನ್ಯಾ ತಂಡವನ್ನ ಮಣಿಸಿ ಪ್ರಶಸ್ತಿ ಗೆದ್ದುಕೊಂಡಿದೆ. ರೋಚಕ ಫೈನಲ್ ಹಣಾಹಣಿಯಲ್ಲಿ ಭಾರತ 2-0 ಅಂತರದಲ್ಲಿ ಕೀನ್ಯಾ ತಂಡವನ್ನ ಮಣಿಸಿತು.
ಮಂಬೈ(ಜೂನ್.10): ಇಂಟರ್ಕಾಂಟಿನೆಂಟಲ್ ಕಪ್ ಫುಟ್ಬಾಲ್ ಟೂರ್ನಿಯಲ್ಲಿ ಸುನಿಲ್ ಚೆಟ್ರಿ ನಾಯಕತ್ವದ ಭಾರತ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಮುಂಬೈನ ಫುಟ್ಬಾಲ್ ಅರೀನಾ ಕ್ರೀಡಾಂಗಣದಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಭಾರತ, ಬಲಿಷ್ಠ ಕೀನ್ಯಾ ತಂಡವನ್ನ 2-0 ಅಂತರದಲ್ಲಿ ಮಣಿಸಿ ಪ್ರಶಸ್ತಿ ಗೆದ್ದುಕೊಂಡಿದೆ.
ರೋಚಕ ಫೈನಲ್ ಪಂದ್ಯದಲ್ಲಿ ಭಾರತಕ್ಕ ಸುನಿಲ್ ಚೆಟ್ರಿ 8ನೇ ನಿಮಿಷದಲ್ಲಿ ಮೊದಲ ಗೋಲು ಸಿಡಿಸೋ ಮೂಲಕ ಖಾತೆ ತೆರೆದರು. ಚೆಟ್ರಿ ಗೋಲಿನ ನೆರವಿನಿಂದ ಭಾರತ ಆರಂಭದಲ್ಲೇ 1-0 ಮುನ್ನಡೆ ಸಾಧಿಸಿತು.
ತಿರುಗೇಟು ನೀಡಲು ಕೀನ್ಯಾ ಸತತ ಪ್ರಯತ್ನ ನಡೆಸಿತು. ಆಕ್ರಮಣಕಾರಿ ಆಟಕ್ಕೆ ಮುಂದಾದ ಕೀನ್ಯಾ ತಂಡವನ್ನ ಭಾರತೀಯ ಢಿಪೆಂಡರ್ಗಳು ಸಮರ್ಥವಾಗಿ ತಡೆದರು. 29ನೇ ನಿಮಿಷದಲ್ಲಿ ಮತ್ತೆ ಸುನಿಲ್ ಚೆಟ್ರಿ ಗೋಲು ಸಿಡಿಸಿ ಭಾರತಕ್ಕೆ 2-0 ಮುನ್ನಡೆ ತಂದುಕೊಟ್ಟರು.
ಒಟ್ಟು 64 ಗೋಲು ಸಿಡಿಸಿದ ಸುನಿಲ್ ಚೆಟ್ರಿ , ಅರ್ಜೆಂಟೀನಾದ ಸ್ಟಾರ್ ಪ್ಲೇಯರ್ ಲಿಯೋನಲ್ ಮೆಸ್ಸಿ ದಾಖಲೆ ಸರಿಗಟ್ಟಿದರು. ಇಷ್ಟೇ ಅಲ್ಲ ಟೂರ್ನಿಯೊಂದರಲ್ಲೇ 8 ಗೋಲು ಸಿಡಿಸಿ ಭಾರತದ ಪರ ಗರಿಷ್ಠ ಗೋಲು ಸಿಡಿಸಿದ ದಾಖಲೆ ಬರೆದರು.
ದ್ವಿತಿಯಾರ್ಧದಲ್ಲಿ ಭಾರತ ಎಚ್ಚರಿಕೆಯ ಆಟಕ್ಕೆ ಮುಂದಾಯಿತು. ಆದರೆ ಕೀನ್ಯಾ ಗೋಲಿಗಾಗಿ ಕಠಿಣ ಹೋರಾಟ ನಡೆಸಿತು. ಅಂತ್ಯದಲ್ಲಿ ಭಾರತ 2-0 ಅಂತರದಿಂದ ಕೀನ್ಯಾ ತಂಡವನ್ನ ಸೋಲಿಸಿ ಪ್ರಶಸ್ತಿ ಬಾಚಿಕೊಂಡಿತು.
