ಗಾಲೆ[ನ.06]: ಶ್ರೀಲಂಕಾ-ಇಂಗ್ಲೆಂಡ್ ನಡುವಿನ ಮೊದಲ ಟೆಸ್ಟ್ ಪಂದ್ಯ ರಂಗನಾ ಹೆರಾತ್ ಪಾಲಿನ ವಿದಾಯದ ಪಂದ್ಯವಾಗಿದ್ದು, ಎಡಗೈ ಸ್ಪಿನ್ನರ್ ಈ ಪಂದ್ಯವನ್ನು ಸ್ಮರಣೀಯವಾಗಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದ್ದಾರೆ.

ಗಾಲೆ ಅಂತರಾಷ್ಟ್ರೀಯ ಮೈದಾನದಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಹೆರಾತ್ ಇತಿಹಾಸ ಬರೆದಿದ್ದು, ಈ ಮೈದಾನದಲ್ಲೇ ನೂರು ವಿಕೆಟ್ ಕಬಳಿಸಿದ ಸಾಧನೆ ಮಾಡಿದ್ದಾರೆ. ಇದರೊಂದಿಗೆ ದಿಗ್ಗಜ ಕ್ರಿಕೆಟಿಗರಾದ ಮುತ್ತಯ್ಯ ಮುರುಳೀಧರನ್, ಜೇಮ್ಸ್ ಆ್ಯಂಡರ್’ಸನ್ ಬಳಿಕ ಮೈದಾನವೊಂದರಲ್ಲಿ ನೂರು ವಿಕೆಟ್ ಕಬಳಿಸಿದ ವಿಶ್ವದ ಮೂರನೇ ಬೌಲರ್ ಎನ್ನುವ ಹೆಗ್ಗಳಿಕೆಗೆ ಹೆರಾತ್ ಪಾತ್ರರಾಗಿದ್ದಾರೆ.

ಇದನ್ನು ಓದಿ: ಒಂದೇ ಔಟ್’ಗೆ ಆ್ಯಂಡರ್’ಸನ್ ಖಾತೆಗೆ 4 ದಾಖಲೆ ಸೇರ್ಪಡೆ

ಟೆಸ್ಟ್ ಕ್ರಿಕೆಟ್’ನಲ್ಲಿ 800 ವಿಕೆಟ್ ಕಬಳಿಸಿದ ಸಾಧನೆ ಮಾಡಿರುವ ಮುತ್ತಯ್ಯ ಗಾಲೆ[111], ಕ್ಯಾಂಡಿ[117] ಹಾಗೂ ಕೊಲಂಬೊ[166] ಮೈದಾನದಲ್ಲಿ ನೂರು ವಿಕೆಟ್ ಕಬಳಿಸಿದ ಸಾಧನೆ ಮಾಡಿದ್ದರೆ, ಜೇಮ್ಸ್ ಆ್ಯಂಡರ್’ಸನ್ ಲಾರ್ಡ್ಸ್[103] ಮೈದಾನದಲ್ಲಿ ನೂರು ವಿಕೆಟ್ ಕಬಳಿಸಿದ ಸಾಧನೆ ಮಾಡಿದ್ದಾರೆ. ಇದೀಗ ಈ ಪಟ್ಟಿಗೆ ರಂಗನಾ ಹೆರಾತ್[100*] ಸೇರ್ಪಡೆಯಾಗಿದ್ದಾರೆ.

ಇಂದಿನಿಂದ ಆರಂಭವಾದ ಶ್ರೀಲಂಕಾ-ಇಂಗ್ಲೆಂಡ್ ನಡುವಿನ ಮೊದಲ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಆರಂಭಿಸಿರುವ ಇಂಗ್ಲೆಂಡ್ ಊಟದ ವಿರಾಮದ ವೇಳೆಗೆ 5 ವಿಕೆಟ್ ಕಳೆದುಕೊಂಡು 113 ರನ್ ಬಾರಿಸಿದೆ.