ತವರಿನಲ್ಲಿ ಚೆನ್ನೈಯಿನ್'ಗೆ ಜಯದ ಸಿಹಿ
ಹಾಲೆಂಡ್ ಮೂಲದ ಮಿಡ್ಫೀಲ್ಡರ್ ಹಾನ್ಸ್ ಮುಲ್ಡರ್ ಹಾಗೂ ಡಿಫೆಂಡರ್ ಮೆಹ್ರಾಜುದ್ದೀನ್ ವಾಡೂ ದಾಖಲಿಸಿದ ತಲಾ ಒಂದೊಂದು ಗೋಲಿನ ನೆರವಿನಿಂದ ಕ್ರಿಕೆಟಿಗ ಮಹೇಂದ್ರ ಸಿಂಗ್ ಧೋನಿ ಮಾಲೀಕತ್ವದ ಚೆನ್ನೈಯಿನ್ ಎಫ್ಸಿ ತಂಡ, ಇಂದು ನಡೆದ ಇಂಡಿಯನ್ ಸೂಪರ್ ಲೀಗ್ ಪಂದ್ಯದಲ್ಲಿ ಗೋವಾ ಎಫ್ಸಿ ವಿರುದ್ಧ 2-0 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿತು.
ಚೆನ್ನೈ(ಅ.13): ಹಾಲೆಂಡ್ ಮೂಲದ ಮಿಡ್ಫೀಲ್ಡರ್ ಹಾನ್ಸ್ ಮುಲ್ಡರ್ ಹಾಗೂ ಡಿಫೆಂಡರ್ ಮೆಹ್ರಾಜುದ್ದೀನ್ ವಾಡೂ ದಾಖಲಿಸಿದ ತಲಾ ಒಂದೊಂದು ಗೋಲಿನ ನೆರವಿನಿಂದ ಕ್ರಿಕೆಟಿಗ ಮಹೇಂದ್ರ ಸಿಂಗ್ ಧೋನಿ ಮಾಲೀಕತ್ವದ ಚೆನ್ನೈಯಿನ್ ಎಫ್ಸಿ ತಂಡ, ಇಂದು ನಡೆದ ಇಂಡಿಯನ್ ಸೂಪರ್ ಲೀಗ್ ಪಂದ್ಯದಲ್ಲಿ ಗೋವಾ ಎಫ್ಸಿ ವಿರುದ್ಧ 2-0 ಗೋಲುಗಳ ಅಂತರದಲ್ಲಿ ಜಯ ಸಾಧಿಸಿತು.
ಇಲ್ಲಿನ ಜವಾಹರಲಾಲ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ನೀಡಿದ ಚೆನ್ನೈಯಿನ್ ಪಡೆ ಎದುರಾಳಿಗಳ ಎಲ್ಲಾ ತಂತ್ರಗಾರಿಕೆಗಳನ್ನೂ ಸಮರ್ಥವಾಗಿ ಹತ್ತಿಕ್ಕುವಲ್ಲಿ ಯಶಸ್ವಿಯಾಯಿತು. ಹನ್ಸ್ ಮುಲ್ಡರ್ ಅವರು ಪಂದ್ಯದ 15ನೇ ನಿಮಿಷದಲ್ಲಿ ಗೋಲು ದಾಖಲಿಸಿ ತಮ್ಮ ತಂಡಕ್ಕೆ 1-0 ಗೋಲಿನ ಮುನ್ನಡೆ ಒದಗಿಸಿಕೊಟ್ಟರು. ಇನ್ನು, ಪಂದ್ಯದ ಪ್ರಥಮಾರ್ಧ ಮುಗಿಯಲು ಇನ್ನು ಕೆಲವೇ ನಿಮಿಷಗಳು ಬಾಕಿಯಿದ್ದಾಗ (26ನೇ ನಿಮಿಷ) ಮೆಹ್ರಾಜುದ್ದೀನ್ ಅವರು, ಎದುರಾಳಿಗಳ ರಕ್ಷಣಾ ಪಡೆ ಬೇಧಿಸಿ ಚೆನ್ನೈಯಿನ್ ಪಡೆಗೆ ಎರಡನೇ ಗೋಲು ತಂದುಕೊಟ್ಟರು.
ಕಳೆದ ಪಂದ್ಯದಲ್ಲಿ ಡೆಲ್ಲಿ ಡೈನಮೋಸ್ ತಂಡದ ವಿರುದ್ಧ 1-3 ಗೋಲುಗಳ ಅಂತರದಲ್ಲಿ ಸೋತಿದ್ದ ಚೆನ್ನೈಯಿನ್ ತಂಡವು, ಗೋವಾ ವಿರುದ್ಧದ ಪಂದ್ಯಕ್ಕಾಗಿ ತನ್ನಲ್ಲಿ ಐದು ಬದಲಾವಣೆಗಳನ್ನು ಮಾಡಿಕೊಂಡಿತ್ತು. ಡುವಾಯ್ನೆ ಕೆರ್, ಡುಡು ಒಮಾಗ್ಬೆಮಿ, ಜೆಜೆ ಲಾಲ್ಪೆಕ್ಲುವಾ, ಬರ್ನಾರ್ಡ್ ಮೆಂಡಿ ಹಾಗೂ ನಲ್ಲಪ್ಪಾನ್ ಮೋಹನ್ರಾಜ್ ಅವರ ಬದಲಿಗೆ ಕಾರಂಜೀತ್ ಸಿಂಗ್, ಮ್ಯನುಯೆಲೆ ಬ್ಲಾಸಿ, ಡೇವಿಡ್ ಸುಕ್ಕಿ, ಎಲಿ ಸಬಿಯಾ ಹಾಗೂ ಜೆರ್ರಿ ಲಾಲ್ರಿಂಜುವೆಲಾ ಅವರಿಗೆ ಅವಕಾಶ ಕಲ್ಪಿಸಲಾಗಿತ್ತು. ಈ ಪ್ರಯೋಗ ಫಲ ನೀಡಿ ಚೆನ್ನೈಯಿನ್ಗೆ ಜಯ ಒಲಿದು ಬಂದಿದೆ.