ಮೆಲ್ಬರ್ನ್‌(ಜ.21): ಆಸ್ಪ್ರೇಲಿಯನ್‌ ಓಪನ್‌ ಟೆನಿಸ್‌ ಗ್ರ್ಯಾಂಡ್‌ಸ್ಲಾಂ ಭಾನುವಾರ ಆಘಾತಕಾರಿ ಫಲಿತಾಂಶಗಳಿಗೆ ಸಾಕ್ಷಿಯಾಯಿತು. ಹಾಲಿ ಚಾಂಪಿಯನ್‌ ರೋಜರ್‌ ಫೆಡರರ್‌ಗೆ ಗ್ರೀಸ್‌ನ 20 ವರ್ಷದ ಸ್ಟೆಫಾನೋ ಟಿಟ್ಸಿಪಾಸ್‌ ಆಘಾತ ನೀಡಿದರೆ, ಮಹಿಳಾ ಸಿಂಗಲ್ಸ್‌ನಲ್ಲಿ ಪ್ರಶಸ್ತಿ ಭರವಸೆಯಲ್ಲಿದ್ದ ಆ್ಯಂಜಿಲಿಕ್‌ ಕೆರ್ಬರ್‌ ಹಾಗೂ ಮರಿಯಾ ಶರಪೋವಾ ಸಹ ಹೊರಬಿದ್ದರು.

7 ಆಸ್ಪ್ರೇಲಿಯನ್‌ ಓಪನ್‌ ಮೇಲೆ ಕಣ್ಣಿಟ್ಟಿದ್ದ ಸ್ವಿಜರ್‌ಲೆಂಡ್‌ನ ಟೆನಿಸ್‌ ಮಾಂತ್ರಿಕ ಫೆಡರರ್‌, ತಮಗಿಂತ 17 ವರ್ಷ ಚಿಕ್ಕವರಾದ ಟಿಟ್ಸಿಪಾಸ್‌ ವಿರುದ್ಧ ಒತ್ತಡಕ್ಕೆ ಸಿಲುಕಿದರು. 7-6, 6-7, 5-7, 6-7 ಸೆಟ್‌ಗಳಲ್ಲಿ ಸೋಲುಂಡು ಫೆಡರರ್‌ ನಿರಾಸೆ ಅನುಭವಿಸಿದರು. ಇದರೊಂದಿಗೆ ಪುರುಷ ಹಾಗೂ ಮಹಿಳಾ ಸಿಂಗಲ್ಸ್‌ನ ಹಾಲಿ ಚಾಂಪಿಯನ್‌ಗಳಿಬ್ಬರೂ ಹೊರಬಿದ್ದಂತಾಗಿದೆ. ಕ್ಯಾರೋಲಿನ್‌ ವೋಜ್ನಿಯಾಗಿ 3ನೇ ಸುತ್ತಿನಲ್ಲಿ ಸೋತು ಹೊರಬಿದ್ದಿದ್ದರು.

ನಡಾಲ್‌ಗೆ ಸುಲಭ ಜಯ: ಚೆಕ್‌ ಗಣರಾಜ್ಯದ ಥಾಮಸ್‌ ಬರ್ಡಿಚ್‌ ವಿರುದ್ಧ 6-0, 6-1, 7-6 ನೇರ ಸೆಟ್‌ಗಳಲ್ಲಿ ಗೆಲುವು ಸಾಧಿಸಿದ ಸ್ಪೇನ್‌ನ ರಾಫೆಲ್‌ ನಡಾಲ್‌ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರು. ಸೆಮಿಫೈನಲ್‌ ಪ್ರವೇಶಿಸಲು 2ನೇ ಶ್ರೇಯಾಂಕಿತ ಆಟಗಾರ ಅಮೆರಿಕದ ಫ್ರಾನ್ಸಿಸ್‌ ಟಿಯಾಫೋ ವಿರುದ್ಧ ಸೆಣಸಲಿದ್ದಾರೆ.

ಕಳೆದ ವರ್ಷದ ರನ್ನರ್‌-ಅಪ್‌ ಕ್ರೊವೇಷಿಯಾದ ಮರಿನ್‌ ಸಿಲಿಚ್‌ ಸಹ ಆಘಾತ ಅನುಭವಿಸಿದರು. 22ನೇ ಶ್ರೇಯಾಂಕಿತ ಆಟಗಾರ ಸ್ಪೇನ್‌ನ ಬಟ್ಟಿಸ್ಟಾಅಗುಟ್‌ ವಿರುದ್ಧ 7-6, 3-6, 2-6, 6-4, 4-6 ಸೆಟ್‌ಗಳಲ್ಲಿ ವೀರೋಚಿತ ಸೋಲು ಕಂಡರು.

ಬುಕ್ಕಿಗಳ ಫೇವರಿಟ್‌ ಕೆರ್ಬರ್‌ ಹೊರಕ್ಕೆ: ಬುಕ್ಕಿಗಳ ಪ್ರಕಾರ ಪ್ರಶಸ್ತಿ ಗೆಲ್ಲುಬಹುದಾದ ನೆಚ್ಚಿನ ಆಟಗಾರ್ತಿ ಎನಿಸಿದ್ದ 2016ರ ಚಾಂಪಿಯನ್‌ ಆ್ಯಂಜಿಲಿಕ್‌ ಕೆರ್ಬರ್‌ ಮಹಿಳಾ ಸಿಂಗಲ್ಸ್‌ 4ನೇ ಸುತ್ತಿನಲ್ಲಿ ಅಮೆರಿಕದ ಶ್ರೇಯಾಂಕ ರಹಿತ ಡೇನಿಯಲ್‌ ಕಾಲಿನ್ಸ್‌ ವಿರುದ್ಧ 0-6, 2-6 ಸೆಟ್‌ಗಳಲ್ಲಿ ಹೀನಾಯ ಸೋಲು ಅನುಭವಿಸಿದರು. ಅಮೆರಿಕದ ಕಾಲೇಜ್‌ ಟೆನಿಸ್‌ ಟೂರ್ನಿಗಳಲ್ಲಿ ಆಡಿಕೊಂಡಿದ್ದ ಕಾಲಿನ್ಸ್‌, ಇದೇ ಮೊದಲ ಬಾರಿಗೆ ಆಸ್ಪ್ರೇಲಿಯನ್‌ ಓಪನ್‌ನಲ್ಲಿ ಕಣಕ್ಕಿಳಿದಿದ್ದಾರೆ. ಈ ಟೂರ್ನಿಗೂ ಮೊದಲು ಅವರು ಗ್ರ್ಯಾಂಡ್‌ಸ್ಲಾಂನಲ್ಲಿ ಒಂದೂ ಪಂದ್ಯ ಗೆದ್ದಿರಲಿಲ್ಲ. ಇದೀಗ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ್ದು, ಪ್ರಶಸ್ತಿ ಮೇಲೆ ಕಣ್ಣಿಟ್ಟಿದ್ದಾರೆ.

ಕ್ರಿಕೆಟ್‌ ಆಟಗಾರ್ತಿಯೂ ಆಗಿರುವ ಆಸ್ಪ್ರೇಲಿಯಾದ ನಂ.1 ಆಶ್ಲೆ ಬಾರ್ಟಿ, ಮಾಜಿ ಚಾಂಪಿಯನ್‌ ರಷ್ಯಾದ ಮರಿಯಾ ಶರಪೋವಾರನ್ನು ಹೊರದಬ್ಬಿದರು. ಅತ್ಯುತ್ತಮ ಲಯದಲ್ಲಿದ್ದ ಶರಪೋವಾ 6-4, 1-6, 4-6 ಸೆಟ್‌ಗಳಲ್ಲಿ ಪರಾಭವಗೊಂಡರು. 10 ವರ್ಷಗಳಲ್ಲಿ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದ ಆಸ್ಪ್ರೇಲಿಯಾದ ಮೊದಲ ಆಟಗಾರ್ತಿ ಎನ್ನುವ ಹಿರಿಮೆಗೆ ಪಾತ್ರರಾದರು. 8ನೇ ಶ್ರೇಯಾಂಕಿತೆ ಪೆಟ್ರಾ ಕ್ವಿಟೋವಾ ಕ್ವಾರ್ಟರ್‌ ಫೈನಲ್‌ ಪ್ರವೇಶಿಸಿದರೆ, 5ನೇ ಶ್ರೇಯಾಂಕಿತೆ ಅಮೆರಿಕದ ಸ್ಲೋನ್‌ ಸ್ಟೀಫನ್ಸ್‌ ಆಘಾತ ಅನುಭವಿಸಿದರು.