ಬೀದರ್‌ ಅಭ್ಯರ್ಥಿಗಳ ಹಣೆಬರಹ ನಿರ್ಧರಿಸಲಿರುವ ಓಲ್ಡ್‌ ಸಿಟಿ ಮತದಾರರು
ಬೀದರ್‌ ವಿಧಾನಸಭಾ ಕ್ಷೇತ್ರದಲ್ಲಿ ಮಳೆ, ಗಾಳಿ, ಬಿಸಿಲೆನ್ನದೆ ಅಭ್ಯರ್ಥಿಗಳು ಪ್ರಚಾರದ ಭರಾಟೆಯಲ್ಲಿ ಬ್ಯುಸಿಯಾಗಿದ್ದರೆ ಕ್ಷೇತ್ರದ ಮೂಲೆ ಮೂಲೆಗಳಲ್ಲಿ ಗೆಲ್ಲುವ, ಸೋಲುವ ಕುದರೆಗಿಂತ ಸೋಲಿಸುವವರ, ಜಾತಿ, ಮತ ಪಂಥಗಳ ಮತದಾರರ ಸವಾರಿಯದ್ದೇ ಜೋರ್ದಾರ್‌ ಚರ್ಚೆ.
Followಅಪ್ಪಾರಾವ್‌ ಸೌದಿ
ಬೀದರ್‌ (ಮೇ.05): ಬೀದರ್‌ ವಿಧಾನಸಭಾ ಕ್ಷೇತ್ರದಲ್ಲಿ ಮಳೆ, ಗಾಳಿ, ಬಿಸಿಲೆನ್ನದೆ ಅಭ್ಯರ್ಥಿಗಳು ಪ್ರಚಾರದ ಭರಾಟೆಯಲ್ಲಿ ಬ್ಯುಸಿಯಾಗಿದ್ದರೆ ಕ್ಷೇತ್ರದ ಮೂಲೆ ಮೂಲೆಗಳಲ್ಲಿ ಗೆಲ್ಲುವ, ಸೋಲುವ ಕುದರೆಗಿಂತ ಸೋಲಿಸುವವರ, ಜಾತಿ, ಮತ ಪಂಥಗಳ ಮತದಾರರ ಸವಾರಿಯದ್ದೇ ಜೋರ್ದಾರ್‌ ಚರ್ಚೆ. ಅಷ್ಟಕ್ಕೂ ಮುಸ್ಲಿಂ ಬಾಹುಳ್ಯದ ಓಲ್ಡ್‌ಸಿಟಿ ಮತದಾನದ ಪ್ರಮಾಣವು ಬೀದರ್‌ ಕ್ಷೇತ್ರದ ಫಲಿತಾಂಶ ನಿರ್ಣಯಿಸಬಲ್ಲದು ಎಂಬುದು ಈ ಚುನಾವಣೆಯ ಪ್ರಮುಖ ಚರ್ಚಾ ವಸ್ತು.
ಬೀದರ್‌ ವಿಧಾನಸಭಾ ಕ್ಷೇತ್ರದ ಚುನಾವಣಾ ಅಖಾಡಾದಲ್ಲಿ ಕಾಂಗ್ರೆಸ್‌ ಅಭ್ಯರ್ಥಿಯಾಗಿ ಹಾಲಿ ಶಾಸಕ ರಹೀಮ್‌ ಖಾನ್‌, ಕೊನೇ ಕ್ಷಣದಲ್ಲಿ ಬಿಜೆಪಿ ಟಿಕೆಟ್‌ ವಂಚಿತರಾಗಿ ಜಾತ್ಯತೀತ ಜನತಾದಳದಿಂದ ಅಭ್ಯರ್ಥಿಯಾಗಿರುವ ಮಾಜಿ ಸಚಿವ ದಿ.ಗುರುಪಾದಪ್ಪ ನಾಗಮಾರಪಳ್ಳಿ ಪುತ್ರ ಸೂರ್ಯಕಾಂತ ನಾಗಮಾರಪಳ್ಳಿ ಹಾಗೂ ಬಿಜೆಪಿಯಿಂದ ಹಿಂದೂ ಸಂಘಟನಾ ಚತುರ ಈಶ್ವರಸಿಂಗ್‌ ಠಾಕೂರ್‌ ವಿಧಾನಸೌಧ ಪ್ರವೇಶಿಸಲು ಹವಣಿಸುತ್ತಿದ್ದಾರೆ. ಆಮ್‌ ಆದ್ಮಿ ಪಾರ್ಟಿಯಿಂದ ಸೈಯದ್‌ ಗುಲಾಂ ಅಲಿ, ರಿಪಬ್ಲಿಕನ್‌ ಪಾರ್ಟಿಯಿಂದ ಮಹೇಶ್‌ ಗೋರ್ನಾಳಕರ್‌, ಬಿಎಸ್ಪಿಯಿಂದ ಅನಿಲ್‌ ಕುಮಾರ್‌,
ಎಚ್‌ಕೆಪಾ, ಸಿಸಿಪಾ, ಕಳಕಪ್ಪರಿಂದ ರಂಗೇರಿರುವ ಗದಗ ಎಲೆಕ್ಷನ್ ಅಖಾಡ
ಸಾರ್ವಜನಿಕ ಆದರ್ಶ ಸೇನಾ ಪಾರ್ಟಿಯಿಂದ ಅಶೋಕ್‌ ಕುಮಾರ್‌ ಕರಂಜಿ, ಕರ್ನಾಟಕ ರಾಷ್ಟ್ರ ಸಮಿತಿ ಪಾರ್ಟಿಯಿಂದ ಹಣಮಂತ ಹಾಗೂ ಸ್ವತಂತ್ರ ಅಭ್ಯರ್ಥಿಗಳಾಗಿ ಗುಂಡೋಜಿ, ಶಶಿಕುಮಾರ್‌ ಪಾಟೀಲ್‌, ಜ್ಞಾನೇಶ್ವರ ಹೊಸಮನಿ ತಾವೇನು ಕಮ್ಮಿಯಿಲ್ಲ ಎಂದು ಕಣಕ್ಕೆ ಧುಮುಕಲು ನಾಮಪತ್ರ ಸಲ್ಲಿಸಿದ್ದಾರೆ. ಸುಮಾರು 2.27ಲಕ್ಷ ಮತದಾರರನ್ನು ಹೊಂದಿರುವ ಬೀದರ್‌ನ ಈ ಹಿಂದಿನ ನಾಲ್ಕೈದು ಚುನಾವಣೆಗಳನ್ನು ಅವಲೋಕಿಸಿದರೆ ಕಾಂಗ್ರೆಸ್‌ ಹಾಗೂ ಬಿಜೆಪಿ ಮಧ್ಯೆ ನೇರ ಸ್ಪರ್ಧೆ ಇದ್ದರೂ ಆಗೊಮ್ಮೆ, ಈಗೊಮ್ಮೆ ಜೆಡಿಎಸ್‌ ತನ್ನ ಪ್ರಾಬಲ್ಯ ತೋರಿಸಿದ್ದೂ ಇದೆ. ಆದರೆ ಅಂತಿಮವಾಗಿ ಫಲಿತಾಂಶ ಜಾತಿಯಾಧಾರಿತ, ವ್ಯಕ್ತಿಯಾಧಾರಿತ ಮತ ವಿಭಜನೆ ಲೆಕ್ಕಾಚಾರಕ್ಕೆ ಮುಗಿಬಿದ್ದಿದೆ.
ಮತ ವಿಭಜನೆ ಚರ್ಚೆ: ಬೀದರ್‌ ವಿಧಾನಸಭಾ ಕ್ಷೇತ್ರ ಮುಸ್ಲಿಂ ಮತದಾರರ ಬಾಹುಳ್ಯದ ಕ್ಷೇತ್ರ. ಹಾಗೆಯೇ ಇಲ್ಲಿ ಲಿಂಗಾಯತ ಮತದಾರರು ನಿರ್ಣಾಯಕ. ಎಸ್ಸಿ, ಎಸ್ಟಿ, ಕ್ರಿಶ್ಚಿಯನ್‌ ಸೇರಿ ಮತ್ತಿತರ ಸಣ್ಣ ಪುಟ್ಟಜಾತಿ ಸಮುದಾಯಗಳ ಮತಗಳನ್ನೂ ನಿರ್ಲಕ್ಷಿಸುವಂತಿಲ್ಲ.
ಹಿಂದುತ್ವದ ಬೆನ್ನೇರಿರುವ ಠಾಕೂರ್‌: ಇದೀಗ ಬಿಜೆಪಿ ಟಿಕೆಟ್‌ ವಂಚಿತರಾಗಿ ಜೆಡಿಎಸ್‌ ಸೇರಿರುವ ಸೂರ್ಯಕಾಂತ ನಾಗಮಾರಪಳ್ಳಿ ದಳದ ಅಭ್ಯರ್ಥಿ. ಬಿಜೆಪಿ ಟಿಕೆಟ್‌ ನೀಡದ ಕಾರಣ ಕ್ಷೇತ್ರದಲ್ಲಿ ಕೊಂಚ ಅನುಕಂಪ ಅವರ ಪರ ಹರಿದಾಡುತ್ತಿದೆ. ಮೂಲ ಬಿಜೆಪಿಗರ ಪೈಕಿ ಹಲವು ನಾಯಕರು ಬಿಜೆಪಿ ಅಭ್ಯರ್ಥಿ ಪರ ಪ್ರಚಾರದಿಂದ ದೂರವುಳಿದು ದಳಕ್ಕೆ ಪರೋಕ್ಷ ಸಹಕಾರ ನೀಡುತ್ತಿರುವುದು ಕ್ಷೇತ್ರದಲ್ಲಿ ಬಹುಚರ್ಚಿತ ವಿಚಾರ. ಒಂದು ದಶಕದಿಂದ ಚುನಾವಣಾ ಅಖಾಡಾದಲ್ಲಿ ಆಟವಾಡಿರುವ ಸೂರ್ಯಕಾಂತ್‌ಗೆ ಪ್ರಬಲ ಲಿಂಗಾಯತ ಅಷ್ಟೇ ಅಲ್ಲ ಮುಸ್ಲಿಂ, ಪರಿಶಿಷ್ಟ ಪಂಗಡಗಳ ಜೊತೆ ವಿವಿಧ ಸಮಾಜಗಳ ಸಂಘಟನೆಗಳೂ ಕೈಜೋಡಿಸಿದ್ದು, ಹಿರಿಯ ಸಹೋದರ ಡಿಸಿಸಿ ಬ್ಯಾಂಕ್‌ ಅಧ್ಯಕ್ಷ ಉಮಾಕಾಂತ ನಾಗಮಾರಪಳ್ಳಿ ಅವರ ಭುಜ ಬಲ ಪ್ಲಸ್‌ ಪಾಯಿಂಟ್‌. ಚುನಾವಣಾ ಅಖಾಡ ಹೊಸದಾದರೂ ಬಿಜೆಪಿ ಅಭ್ಯರ್ಥಿ ಈಶ್ವರ ಸಿಂಗ್‌ ಠಾಕೂರ್‌ ತಮ್ಮ ಕಟ್ಟಾ ಬಿಜೆಪಿ ಮತದಾರರನ್ನು ಹಿಡಿದಿಟ್ಟುಕೊಂಡಿದ್ದಾರೆ ಎಂಬುದು ಸುಳ್ಳಲ್ಲ. ಪ್ರಮುಖ ನಾಯಕರ ಅಘೋಷಿತ ಅಸಹಕಾರದ ಮಧ್ಯೆಯೇ ಹಿಂದುತ್ವದ ಜಾಡು ಹಿಡಿದು ಅವರು ಮತದಾರನ ಮನೆ, ಮನೆಗಳಿಗೆ ಲಗ್ಗೆಯಿಡುತ್ತಿದ್ದು, ತ್ರಿಕೋನ ಸ್ಪರ್ಧೆಯಲ್ಲಿ ತಾವೇನೂ ಕಮ್ಮಿ ಇಲ್ಲ ಎಂಬ ಸುಳಿವು ನೀಡಲಾರಂಭಿಸಿದ್ದಾರೆ.
ರಹೀಮ್‌ ಖಾನ್‌ ಲೆಕ್ಕಾಚಾರ ಏನು?: ಇನ್ನು ಈಗಾಗಲೇ ಮೂರು ಬಾರಿ ಗೆದ್ದು ನಾಲ್ಕನೇ ಗೆಲುವಿಗಾಗಿ ಕಾಂಗ್ರೆಸ್‌ ಅಭ್ಯರ್ಥಿ ರಹೀಮ್‌ ಖಾನ್‌ ಪರಂಪರಾಗತ ಮುಸ್ಲಿಂ ಮತಗಳು, ಎಸ್ಸಿ, ಎಸ್ಟಿಅಲ್ಲದೆ ತಮ್ಮ ಮಾತಿನ ಕೌಶಲ್ಯ, ಸ್ವಭಾವ ಮುಂದಿಟ್ಟುಕೊಂಡು ಲಿಂಗಾಯತ, ಗೊಂಡ ಕುರುಬ ಸೇರಿ ಇತರ ಹಿಂದೂ ಮತಗಳಿಕೆಯ ಲೆಕ್ಕಾಚಾರದಲ್ಲಿದ್ದಾರೆ. ಆದರೆ ಮುಸ್ಲಿಂ ಮತಗಳ ಕೇಂದ್ರವಾಗಿರುವ ಓಲ್ಡ್‌ ಸಿಟಿಯ ಮತದಾನ ಪ್ರಮಾಣದ ಮೇಲೆ ಈ ಬಾರಿಯ ಚುನಾವಣಾ ಫಲಿತಾಂಶ ನಿರ್ಧಾರವಾಗುತ್ತದೆ ಎಂಬುದು ರಾಜಕೀಯ ತಜ್ಞರ ಅಂಬೋಣ. 2018ರಲ್ಲಿ ನಡೆದ ಸಾರ್ವತ್ರಿಕ ಚುನಾವಣೆಯಲ್ಲಿ ರಹೀಮ್‌ ಖಾನ್‌ ಕಾಂಗ್ರೆಸ್‌ನಿಂದ ಸ್ಪರ್ಧಿಸಿ 73,270 ಮತ ಪಡೆದರೆ, ಬಿಜೆಪಿಯಿಂದ ಸ್ಪರ್ಧಿಸಿದ್ದ ಸೂರ್ಯಕಾಂತ ನಾಗಮಾರಪಳ್ಳಿ 63,025 ಮತ ಪಡೆದು 10,245 ಮತಗಳ ಅಂತರದಿಂದ ಸೋಲುಂಡಿದ್ದರು. ಇನ್ನು ಕರ್ನಾಟಕದಲ್ಲಿ ಒಂದೇ ಹಂತದಲ್ಲಿ ಮೇ 10ರಂದು ಮತದಾನ ನಡೆಯಲಿದ್ದು, ಮೇ 13ಕ್ಕೆ ಮತ ಎಣಿಕೆ ನಡೆಯಲಿದೆ. ಏಪ್ರಿಲ್ 13ಕ್ಕೆ ಚುನಾವಣೆ ಅಧಿಸೂಚನೆ ಹೊರಡಿಸಲಾಗಿತ್ತು.
ಕಾಂಗ್ರೆಸ್‌ ಭದ್ರಕೋಟೆ ಚಾಮರಾಜನಗರದಲ್ಲಿ ಸೋಮಣ್ಣರಿಂದ ಬಿಜೆಪಿ ರಣಕಹಳೆ
ಜಾತಿ ಮತಗಳು
ಮುಸ್ಲಿಂ-58,000
ಲಿಂಗಾಯತ-68,000
ಎಸ್ಸಿ,ಎಸ್ಟಿ- 46,000
ಮರಾಠಾ- 10,000
ಕ್ರಿಶ್ಚಿಯನ್‌-8,000
ಬ್ರಾಹ್ಮಣ- 7,000
ಇತರರು- 29,000
