ಪುರಸಭೆ ಸದಸ್ಯೆಯಾಗಿ ವಿದ್ಯಾರ್ಥಿನಿ ಸುಮಿತ್ರಾ ಆಯ್ಕೆ!
ಪುರಸಭೆ ಸದಸ್ಯೆಯಾಗಿ ವಿದ್ಯಾರ್ಥಿನಿ ಸುಮಿತ್ರಾ ಆಯ್ಕೆ! ಮಾಲೂರು ಪುರಸಭೆ 27ನೇ ವಾರ್ಡ್ನಿಂದ ಆಯ್ಕೆಯಾದ ಬಿಜೆಪಿ ಅಭ್ಯರ್ಥಿ
ಮಾಲೂರು (ಜೂ. 01): ಇಲ್ಲಿನ ಪುರಸಭೆ ಚುನಾವಣೆಯಲ್ಲಿ ಕಾಲೇಜು ವಿದ್ಯಾರ್ಥಿನಿಯೊಬ್ಬಳು ಸದಸ್ಯೆಯಾಗಿ ಆಯ್ಕೆಯಾಗಿದ್ದಾಳೆ. ಪಟ್ಟಣದ 27ನೇ ವಾರ್ಡ್ನಲ್ಲಿ ಬಿಜೆಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಸುಮಿತ್ರಾ ಪಿ.(19) ಜಯಗಳಿಸಿದ ವಿದ್ಯಾರ್ಥಿನಿ.
ಈಕೆ ಇಲ್ಲಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಬಿಎ ಅಂತಿಮ ವರ್ಷದಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ತಂದೆ ಪಚ್ಚಪ್ಪ ಪ್ರತಿನಿಧಿಸುತ್ತಿದ್ದ ವಾರ್ಡ್ನಲ್ಲಿ 534 ಮತಗಳನ್ನು ಪಡೆದು ಎದುರಾಳಿ ಗಾಯತ್ರಿ ಸಂದೀಪ್ ಎಂಬವರನ್ನು 121 ಮತಗಳ ಅಂತರದಿಂದ ಸೋಲಿಸಿದ್ದಾರೆ.
ಸೇವೆ, ಶಿಕ್ಷಣ ಮುಂದುವರಿಸುವೆ:
ಈ ಸಾಧನೆ ಬಗ್ಗೆ ‘ಕನ್ನಡಪ್ರಭ’ದೊಂದಿಗೆ ಸಂತಸ ಹಂಚಿಕೊಂಡ ಸುಮಿತ್ರಾ, ತನ್ನ ತಂದೆ ಪಚ್ಚಪ್ಪ ಅವರು ಪುರಸಭೆ ಸದಸ್ಯರಾಗಿ ಸಲ್ಲಿಸಿದ ಸಮಾಜ ಸೇವೆ ನನ್ನನ್ನು ಸೆಳೆದಿತ್ತು. ಅದಕ್ಕಾಗಿ ಈಗ ನಾನೇ ಚುನಾವಣೆಗೆ ನಿಂತು ಗೆದ್ದಿದ್ದೇನೆ, ತಂದೆಗೆ ತಕ್ಕ ಮಗಳಾಗಿದ್ದೇನೆ. ಮುಂದೆ ಶಿಕ್ಷಣ ಹಾಗೂ ಪುರಸಭೆ ಸದಸ್ಯತ್ವದ ಕರ್ತವ್ಯಗಳೆರಡನ್ನೂ ತಂದೆ ಸಹಕಾರದಿಂದ ನಿರ್ವಹಿಸುವುದಾಗಿ ತಿಳಿಸಿದರು. ನಿಯಮದ ಪ್ರಕಾರ ಪುರಸಭೆ ಸದಸ್ಯರಾಗಲು ಕನಿಷ್ಠ ವಯೋಮಾನ 21 ಆಗಿರಬೇಕು. ಆದರೆ ನಾಮಪತ್ರ ಪರಿಶೀಲನೆಯಲ್ಲಿ ಲೋಪ ಹೇಗೆ ಆಯಿತು ಎಂಬ ಪ್ರಶ್ನೆಗೆ ಇನ್ನಷ್ಟೇ ಉತ್ತರ ಸಿಗಬೇಕಿದೆ.