ಬೀಜಿಂಗ್‌[ಮೇ.15]: ಯಾರು ವಾರದ ಆರೂ ದಿನ ಬೆಳಗ್ಗೆ 9ರಿಂದ ರಾತ್ರಿ 9 ಗಂಟೆಯವರೆಗೆ ಕೆಲಸ ಮಾಡಲು ಉತ್ಸುಕತೆ ಹೊಂದಿದ್ದೀರೋ ಅವರು ಮಾತ್ರವೇ ನಮ್ಮ ಕಂಪನಿಯಲ್ಲಿ ಕೆಲಸ ಕೇಳಿಕೊಂಡು ಬನ್ನಿ ಎಂದು ಇತ್ತೀಚೆಗಷ್ಟೇ ಸಲಹೆ ನೀಡಿದ್ದ ಚೀನಾದ ಅಲಿಬಾಬಾ ಕಂಪನಿ ಮುಖ್ಯಸ್ಥ ಜಾಕ್‌ ಮಾ, ಇದೀಗ ತಮ್ಮ ಸಿಬ್ಬಂದಿಗೆ ವಾರಕ್ಕೆ 6 ದಿನವೂ ಸೆಕ್ಸ್‌ ಮಾಡಿ ಎಂದು ಸಲಹೆ ನೀಡಿದ್ದಾರೆ.

ಕಂಪನಿಯ ಸಿಬ್ಬಂದಿಯ ಸಾಮೂಹಿಕ ವಿವಾಹ ಕಾರ್ಯಕ್ರಮದಲ್ಲಿ ಭಾಗಿಯಾಗಿದ್ದ ಜಾಕ್‌ ಮಾ, ಜೀವನದ ಗುಣಮಟ್ಟಸುಧಾರಿಸಲು ಕಚೇರಿಗಳಲ್ಲಿ ವಾರಕ್ಕೆ ಆರೂ ದಿನ ಬೆಳಗ್ಗೆ 9 ರಿಂದ ರಾತ್ರಿ 9 ಗಂಟೆಯವರೆಗೆ ಕೆಲಸ ಮಾಡಬೇಕು. ಅದೇ ರೀತಿ ಮನೆಯಲ್ಲಿ ವಾರಕ್ಕೆ ಆರೂ ದಿನ 6 ಬಾರಿ ಲೈಂಗಿಕ ಚಟುವಟಿಕೆ ನಡೆಸಬೇಕು ಎಂದು ಪುಕ್ಕಟೆ ಸಲಹೆ ನೀಡಿದ್ದಾರೆ. ಈ ಮೂಲಕ ಕಚೇರಿಯಲ್ಲಿ 996 ನೀತಿ ಮತ್ತು ಮನೆಯಲ್ಲಿ 669 ನೀತಿ ಪಾಲಿಸಿ ಎಂದು ಹೇಳಿದ್ದಾರೆ. ಜಾಕ್‌ರ ಈ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್‌ ಆಗಿದೆ. ಅಷ್ಟುಮಾತ್ರವಲ್ಲ ಅವರ ಹೇಳಿಕೆ ಕುರಿತು ವ್ಯಂಗ್ಯ, ಟೀಕೆ ಕೂಡಾ ವ್ಯಕ್ತವಾಗಿದೆ.

ಪ್ರತಿ ವರ್ಷ ಮೇ 10ರಂದು ಅಲಿಬಾಬಾ ಕಂಪನಿಯ ಸಿಬ್ಬಂದಿಯ ಸಾಮೂಹಿಕ ವಿವಾಹ ಕಾರ್ಯಕ್ರಮವನ್ನು ಕಂಪನಿಯ ಮುಖ್ಯ ಕಚೇರಿಯಲ್ಲಿ ಆಚರಿಸಲಾಗುತ್ತದೆ. ಆ ದಿನವನ್ನು ಅಲಿ ಡೇ ಎಂದು ಕರೆಯಲಾಗುತ್ತದೆ.