ನಕಲಿ ಇಮೇಲ್‌, ವೆಬ್‌ಸೈಟ್‌ ಸೃಷ್ಟಿಸಿ ವಂಚಿಸಿದ್ದವರ ಬಂಧನ
ಕಂಪನಿಗಳಿಗೆ ಕೋಟ್ಯಂತರ ರು. ನಷ್ಟಮಾಡುತ್ತಿದ್ದ ಆರೋಪಿಗಳು
ಬೆಂಗಳೂರು (ನ.16): ಪ್ರತಿಷ್ಠಿತ ಕಂಪನಿಗಳ ನಕಲಿ ಇ-ಮೇಲ್‌ ಐಡಿ ಹಾಗೂ ವೆಬ್‌ಸೈಟ್‌ಗಳನ್ನು ಸೃಷ್ಟಿಸಿ ಲಕ್ಷಾಂತರ ರುಪಾಯಿ ವಂಚಿಸುತ್ತಿದ್ದ ಇಬ್ಬರು ಆರೋಪಿಗಳನ್ನು ವಿಜಯನಗರ ಪೊಲೀಸರು ಬಂಧಿಸಿದ್ದಾರೆ.
ರಾಜಸ್ಥಾನದ ಜೈಪುರ ನಿವಾಸಿ ವಿವೇಕ್‌ (31) ಮತ್ತು ನವದೆಹಲಿಯ ಜಂಗ್‌ಪುರ ನಿವಾಸಿ ಸುಶಾಂತ (23) ಬಂಧಿತರು. ಆರೋಪಿಗಳು ದೆಹಲಿಯ ಮಾರ್ಕ್ಸ್ಕಾ್ಯನ್‌ ಡಾಟ್‌ ಕೋ. ಡಾಟ್‌ ಇನ್‌ ಎಂಬ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದರು. ಆ ಕಂಪನಿಯ ಮಾಲೀಕ, ನಿವೃತ್ತ ಐಪಿಎಸ್‌ ಅಧಿಕಾರಿ ಪುತ್ರ ಅಭಿಷೇಕ್‌ ಜತೆ ಸೇರಿ ಪ್ರತಿಷ್ಠಿತ ಕಂಪನಿಗಳ ನಕಲಿ ವೈಬ್‌ಸೈಟ್‌ ಹಾಗೂ ಇ-ಮೇಲ್‌ ಐಡಿಗಳನ್ನು ಸೃಷ್ಟಿಸಿ ಕಂಪನಿಗಳ ಷೇರುದಾರರಿಗೆ ನೋಟಿಸ್‌ ಹಾಗೂ ತಪ್ಪು ಸಂದೇಶ ನೀಡುತ್ತಿದ್ದರು. ಜತೆಗೆ ತಮ್ಮ ಕಂಪನಿ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತಿದೆ. ಕೋಟ್ಯಂತರ ರು. ಗಳಿಸಬಹುದು ಎಂದು ಆಕರ್ಷಿಸುತ್ತಿದ್ದರು. ಇದರಿಂದ ಇತರ ಕಂಪನಿಗಳಿಗೆ ಕೋಟ್ಯಂತರ ರು.ನಷ್ಟವಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
ಏನಿದು ಪ್ರಕರಣ?: ಆರೋಪಿ ಸುಶಾಂತ 3 ವರ್ಷಗಳ ಹಿಂದೆ ಬೆಂಗಳೂರಿನ ಐಪ್ಲೆಕ್ಸ್‌ ಡಾಟ್‌.ಆ್ಯಂಟಿ ಪೈರಸಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದು, ಇತ್ತೀಚೆಗೆ ದೆಹಲಿಯ ಮಾರ್ಕ್ಸ್ಕಾ್ಯನ್‌ ಡಾಟ್‌ ಕೋ.ಡಾಟ್‌ ಇನ್‌ ಎಂಬ ಕಂಪನಿ ಸೇರಿದ್ದ. ಈ ವೇಳೆ ಮೊದಲ ಆರೋಪಿ ವಿವೇಕ್‌ ಪರಿಚಯವಾಗಿದ್ದಾನೆ. ಕಂಪನಿಯ ಮಾಲೀಕ ಅಭಿಷೇಕ್‌ ಈ ಇಬ್ಬರು ಆರೋಪಿಗಳಿಗೆ ತಲಾ ರೂ.80 ಸಾವಿರ ಹಣದ ಆಸೆ ತೋರಿಸಿದ್ದಾನೆ. ಆಸೆಗೆ ಬಿದ್ದ ಆರೋಪಿ ಸುಶಾಂತ, ವಿವೇಕ್‌ ಜತೆ ಸೇರಿ ತನ್ನ ಹಿಂದಿನ ಕಂಪನಿಯ www.aiplex.com ವೆಬ್‌ಸೈಟ್‌ಅನ್ನು www.aiplex.us ಆಗಿ ಬದಲಾಯಿಸಿ ಕಂಪನಿಯ ಷೇರುದಾರರಿಗೆ ಇ-ಮೇಲ್‌ ಸಂದೇಶ ಕಳುಹಿಸಿ, ಬಳಿಕ ನೋಟಿಸ್‌ ನೀಡುತ್ತಿದ್ದರು. ಇದರಿಂದ ಗಾಬರಿಗೊಂಡು ಷೇರುದಾರರು ಕಂಪನಿಯಲ್ಲಿರುವ ಷೇರುಗಳನ್ನು ವಾಪಸ್‌ ನೀಡುವಂತೆ ಒತ್ತಾಯ ಮಾಡುತ್ತಿದ್ದರು. ಇದರಿಂದ ಕಂಪನಿಗೆ ಲಕ್ಷಾಂತರ ರುಪಾಯಿ ನಷ್ಟವಾಗಿದೆ. ಈ ಸಂಬಂಧ ಐಪ್ಲೆಕ್ಸ್‌ ಕಂಪನಿ ಮಾಲೀಕರು ವಿಜಯನಗರ ಠಾಣೆಗೆ ದೂರು ನೀಡಿದ್ದರು. ತನಿಖೆ ನಡೆಸಿದ ಪೊಲೀಸರು, ಸೈಬರ್‌ ಕ್ರೈಂ ಸಿಬ್ಬಂದಿ ಸಹಾಯ ಪಡೆದು ಆರೋಪಿಗಳನ್ನು ರಾಜಸ್ಥಾನ, ದೆಹಲಿಯಲ್ಲಿ ಬಂಧಿಸಿದ್ದರು. ಅಲ್ಲದೆ, ಆರೋಪಿಗಳು ಸಾಮಾಜಿಕ ಜಾಲತಾಣಗಳಾದ ಯುಟ್ಯೂಬ್‌, ಗೂಗಲ್‌, ಟ್ವಿಟರ್‌ಗಳ ಕೆಲ ವಿಡಿಯೋ ಚಿತ್ರಣಗಳನ್ನು ನಿಷ್ಕ್ರಿಯಗೊಳಿಸುತ್ತಿದ್ದರು. ಎಂಬುದು ವಿಚಾರಣೆ ವೇಳೆ ತಿಳಿದುಬಂದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
