ವಾಯೇಜರ್ ಡಿಸ್ಕ್ ಏಲಿಯನ್ ಪಾಲಾದರೆ ಸರ್ವನಾಶ?

ವಾಷಿಂಗ್ಟನ್(ಮೇ 28): ಸೌರ ಮಂಡಲದ ಅಧ್ಯಯನಕ್ಕಾಗಿ 1977 ರಲ್ಲಿ ಉಡಾವಣೆ ಮಾಡಿದ್ದ ವಾಯೇಜರ್ ಸರಣಿಯ ಎರಡೂ ನೌಕೆಗಳು ಇದೀಗ ನಮ್ಮ ಸೌರ ಮಂಡಲವನ್ನೇ ದಾಟಿ ಮುನ್ನುಗ್ಗುತ್ತಿವೆ. ಮನುಷ್ಯ ನಿರ್ಮಿತ ಯಂತ್ರವೊಂದು ಸೌರವ್ಯೂಹದ ಗಡಿ ದಾಟಿ ಮತ್ತೊಂದು ಜಗತ್ತಿಗೆ ಕಾಲಿಡುತ್ತಿರುವುದು ಐತಿಹಾಸಿಕವೇ ಸರಿ.

ಇನ್ನು ವಾಯೇಜರ್-1 ನೌಕೆಯಲ್ಲಿ ಗೋಲ್ಡನ್ ಡಿಸ್ಕ್ ವೊಂದನ್ನು ಅಳವಡಿಸಲಾಗಿದ್ದು, ಇದರಲ್ಲಿ ಮನುಷ್ಯನೂ ಸೇರಿದಂತೆ ಭೂಮಿಯ ಮೇಲೆ ವಾಸಿಸುವ ಎಲ್ಲ ಪ್ರಾಣಿ-ಪಕ್ಷಿಗಳ, ನೈಸರ್ಗಿಕ ಸಂಪತ್ತಿನ,[ಕಾಡು, ನದಿ, ಸಮುದ್ರ ಇತ್ಯಾದಿ] ವಿವಿಧ ನಾಗರಿಕತೆಗಳ ಸಂಸ್ಕೃತಿ, ಕಲೆ, ಸಂಗೀತ ಹೀಗೆ ವಿವಿಧ ಬಗೆಯ ಮಾಹಿತಿ ಒಳಗೊಂಡಿರುವ ಫೊಟೋ ಮತ್ತು ಆಡಿಯೋ ಮಾಹಿತಿ ಇದೆ.

ನಾಸಾ ಈ ಗೋಲ್ಡನ್ ಡಿಸ್ಕ್ ನಲ್ಲಿ ಈ ಎಲ್ಲ ಮಾಹಿತಿಗಳನ್ನು ಹಾಕಿರುವುದು  ಬ್ರಹ್ಮಾಂಡದಲ್ಲಿ ಇರಬಹುದಾದ ಏಲಿಯನ್ ಜಗತ್ತು ಈ ಮಾಹಿತಿ ಕಲೆ ಹಾಕಿ ಭೂಮಿಯನ್ನು ಸಂಪರ್ಕಿಸಲು ಸಾಧ್ಯವಾಗಲಿ ಎಂದು. ಅಂದರೆ ಒಂದು ವೇಳೆ ಅನ್ಯಗ್ರಹ ಜೀವಿಗಳು ಇರುವುದು ನಿಜವಾದರೆ, ಖಗೋಳದಲ್ಲಿ ಸಂಚರಿಸುತ್ತಿರುವ ವಾಯೇಜರ್-1 ನೌಕೆಯಲ್ಲಿರುವ ಈ ಮಾಹಿತಿ ಸಂಗ್ರಹಿಸಲಿವೆ.

ಆದರೆ ಬರೋಬ್ಬರಿ 42 ವರ್ಷಗಳ ಬಳಿಕ ನಾಸಾದ ಈ ಯೋಜನೆಗೆ ಇದೀಗ ಭಾರೀ ಅಪಸ್ವರ ಕೇಳಿ ಬರುತ್ತಿದೆ. ಕಾರಣ ಒಂದು ವೇಳೆ ಈ ಡಿಸ್ಕ್ ಪರಗ್ರಹ ಜೀವಿಗಳ ಪಾಲಾದರೆ ಬ್ರಹ್ಮಾಂಡದಲ್ಲಿ ಭೂಮಿಯ  ಸ್ಥಾನದ ಮಾಹಿತಿ ಪಡೆದು ಅವು ದಾಳಿ ನಡೆಸುವ ಸಾಧ್ಯತೆ ಹೆಚ್ಚು ಎಂದು ಕೆಲವು ಖಗೋಳ ವಿಜ್ಞಾನಿಗಳು ವಾದಿಸಿದ್ದಾರೆ. ಒಳ್ಳೆಯ ಉದ್ದೇಶಕ್ಕೆ ಈ ಡಿಸ್ಕ್ ಅಳವಡಿಸಲಾಗಿದೆಯಾದರೂ ಏಲಿಯನ್ ಜಗತ್ತು ಇದನ್ನು ನಕಾರಾತ್ಮಕ ರೀತಿಯಲ್ಲಿ ಸ್ವೀಕರಿಸಿದರೆ ಮಾನವ ಜನಾಂಗ ಸಂಕಷ್ಟಕ್ಕೆ ಸಿಲುಕಲಿದೆ ಎಂದು ಎಚ್ಚರಿಸಿದ್ದಾರೆ.