ಬೆಂಗಳೂರು(ಅ.4): ನಾರಿಮನ್ ವೈಫಲ್ಯದ ಬಗ್ಗೆ ರಾಜ್ಯಸಭಾ ಸದಸ್ಯ ರಾಜೀವ್ ಚಂದ್ರಶೇಖರ್ ಟ್ವೀಟ್ ಮಾಡಿದ್ದಾರೆ.'ರಾಜ್ಯದ ಪರ ಸುಪ್ರೀಂಕೋರ್ಟ್‌ನಲ್ಲಿ ವಾದ ಮಂಡಿಸುತ್ತಿರುವ ಕರ್ನಾಟಕ ಪರ ವಕೀಲರ ತಂಡ ರಾಜ್ಯದ ರೈತರ ಹಿತ ಕಾಪಾಡುವಲ್ಲಿ ವಿಫಲವಾಗಿದ್ದು ನೈತಿಕ ಹೊಣೆ ಹೊತ್ತು ತಕ್ಷಣವೇ ರಾಜಿನಾಮೆ ನೀಡಬೇಕು. ಈ ವಕೀಲರಿಗೆ ನೀಡಲು ಉಪಯೋಗಿಸಿರುವುದು ಸಾರ್ವಜನಿಕರ ಹಣವಾಗಿದ್ದು, ಈ ಎಲ್ಲ ಮೊತ್ತವನ್ನೂ ಸರ್ಕಾರಕ್ಕೆ ಹಿಂದಿರುಗಿಸಬೇಕು ಅಥವಾ ಬೆಳೆ ನಷ್ಟಹೊಂದಿದ ರೈತರಿಗೆ ದಾನ ಮಾಡಬೇಕು'. 'ಕಾವೇರಿ ಕೊಳ್ಳದ ರೈತರಿಗೆ ಆರ್ಥಿಕ ಪರಿಹಾರವನ್ನೂ ಸರ್ಕಾರ ಘೋಷಣೆ ಮಾಡಬೇಕು. ಕರ್ನಾಟಕ ಸರ್ಕಾರ ಮತ್ತು ಕಾನೂನು ತಂಡ ಕಾನೂನಾತ್ಮಕವಾಗಿ ನಿರ್ಲಕ್ಷ್ಯ ಮಾಡಿದ್ದು ಈ ಸ್ಥಿತಿಗೆ ಕಾರಣವಾಗಿದೆ. ಬೆಂಗಳೂರಿನ ಉಕ್ಕಿನ ಮೇಲ್ಸೆತುವೆ ಯೋಜನೆ ಅನುಷ್ಠಾನ ಹಾಗೂ ಭ್ರಷ್ಟಅಧಿಕಾರಿಗಳನ್ನು ಬಿಟ್ಟು ಅಮಾಯಕ ಬೆಂಗಳೂರಿಗರ ಒತ್ತುವರಿ ತೆರವು ಕಾರ್ಯಾಚರಣೆಗೆ ಸರ್ಕಾರ ತೋರಿಸಿದ ತರಾತುರಿ ಮತ್ತು ಕಾಳಜಿಯನ್ನು ಇಲ್ಲೂ ತೋರಿಸಬೇಕಿದೆ’’ ಎಂದು ತಿಳಿಸಿದ್ದಾರೆ.