ಭಾರತಕ್ಕೆ ಎಸ್ಟಿಎ-1ಸವಲತ್ತು ನೀಡಿದ ಅಮೆರಿಕ! ಚೀನಾಗೆ ಸೆಡ್ಡು ಹೊಡೆಯಲು ಅಮೆರಿಕ ರಣತಂತ್ರ! ಎಸ್ಟಿಎ-1 ಸವಲತ್ತು ಪಡೆದ ಏಷ್ಯಾದ ಮೂರನೇ ರಾಷ್ಟ್ರ! ದ.ಕೊರಿಯಾ, ಜಪಾನ್ಗೆ ನೀಡಿದ್ದ ವಿಶೇಷ ಸವಲತ್ತು! ಅತ್ಯಾಧುನಿಕ ರಕ್ಷಣಾ ಉಪಕರಣ ಮಾರಾಟಕ್ಕೆ ಅಸ್ತು
ವಾಷಿಂಗ್ಟನ್(ಆ.4): ಅಮೆರಿಕ ಏಷ್ಯಾದ ತನ್ನ ಮಿತ್ರ ರಾಷ್ಟ್ರಗಳಾದ ದಕ್ಷಿಣ ಕೊರಿಯಾ ಹಾಗೂ ಜಪಾನ್ಗೆ ನೀಡಿದ ವಿಶೇಷ ಸಹಕಾರವನ್ನು ಭಾರತಕ್ಕೂ ವಿಸ್ತರಿಸಿದೆ. ದ.ಕೊರಿಯಾ ಮತ್ತು ಜಪಾನ್ಗೆ ನೀಡಿದ ಎಸ್ಟಿಎ-1ಸವಲತ್ತನ್ನು ಭಾರತಕ್ಕೂ ನೀಡಲಾಗಿದೆ.
ಈ ಮೂಲಕ ಅಮರಿಕದಿಂದ ಎಸ್ಟಿಎ-1 ಸವಲತ್ತು ಪಡೆದ ಏಷ್ಯಾದ ಮೂರನೇ ರಾಷ್ಟ್ರ ಎಂಬ ಹೆಗ್ಗಳಿಕಗೆ ಭಾರತ ಪಾತ್ರವಾಗಿದೆ.ಅಮೆರಿಕ ಸರ್ಕಾರ ಭಾರತಕ್ಕೆ ಎಸ್ಟಿಎ-1 ಗೆ ಅನುಮತಿ ನೀಡಿ ನೋಟಿಫಿಕೇಷನ್ ಹೊರಡಿಸಿದೆ. ಈ ಮೂಲಕ ದಕ್ಷಿಣ ಏಷ್ಯಾದಲ್ಲಿ ಚೀನಾ ಪ್ರಾಬಲ್ಯಕ್ಕೆ ತಡೆಯೊಡ್ಡಲು ದೊಡ್ಡಣ್ಣ ವ್ಯವಸ್ಥಿತವಾದ ಚಕ್ರವ್ಯೂಹ ಹೆಣೆದಿದೆ.
ಅತ್ಯಾಧುನಿಕ ತಂತ್ರಜ್ಞಾನದ ಉಪಕರಣ ಹಾಗೂ ಇತರೆ ರಕ್ಷಣಾ ವಸ್ತುಗಳನ್ನು ಖರೀದಿಸಲು ಈ ಸ್ಟ್ಯಾಟರ್ಜಿಕ್ ಟ್ರೇಡ್ ಆಥರೈಜೇಷನ್ ಅನುಮತಿಯಿಂದ ಸಾಧ್ಯವಾಗಲಿದೆ. ಅದರಲ್ಲೂ ವಿಶೇಷವಾಗಿ ಭಾರತಕ್ಕೆ ಬಾಹ್ಯಾಕಾಶ ರಕ್ಷಣಾ ಕ್ಷೇತ್ರದ ಉಪಕರಣಗಳ ಮಾರಾಟಕ್ಕೆ ಹಾದಿ ಮಾಡಿಕೊಟ್ಟಿದೆ.
ಈ ಕುರಿತು ಟ್ರಂಪ್ ಅಡ್ಮಿನಿಸ್ಟ್ರೇಷನ್ ಫೇಡರಲ್ ನೋಟಿಫಿಕೇಷನ್ ಹೊರಡಿಸಿದ್ದು, ಅಚ್ಚರಿಯ ವಿಷಯ ಅಂದರೆ ಭಾರತ ಇನ್ನು ಎನ್ಎಸ್ಜಿಯ ಸದಸ್ಯತ್ವ ಪಡೆಯದೇ ಈ ಸವಲತ್ತು ಪಡೆಯುತ್ತಿರುವ ಏಕೈಕ ರಾಷ್ಟ್ರವಾಗಿದೆ. ಅಮೆರಿಕ ಎನ್ಎಸ್ಜಿ ಸದಸ್ಯತ್ವ ಪಡೆದ ರಾಷ್ಟ್ರಗಳಿಗೆ ಮಾತ್ರ ಉನ್ನತ ತಂತ್ರಜ್ಞಾನದ ಉಪಕರಣಗಳನ್ನ ಮಾರಾಟ ಮಾಡುತ್ತದೆ.
ಎಸ್ಟಿಎ-1 ಸವಲತ್ತು ಪಡೆಯಲು ಕ್ಷಿಪಣಿ ತಂತ್ರಜ್ಞಾನ ನಿಯಂತ್ರಣ ನಿಯಮ (MTCR), ವಾಸ್ಸೆನರ್ ಅರೇಂಜ್ಮೆಂಟ್ (WA) ಆಸ್ಟ್ರೇಲಿಯಾ ಗ್ರೂಪ್ (AG) ಮತ್ತು ಎನ್ಎಸ್ಜಿ ಈ ನಾಲ್ಕರ ಸದಸ್ಯತ್ವ ಪಡೆದಿರಬೇಕಾಗುತ್ತದೆ. ಇದರಿಂದ ಭಾರತ ವಿನಾಯಿತಿ ಪಡೆದಿದೆ. ಈ ಮೂಲಕ ಭಾರತ ನಾಟೋ ಸಮಾನವಾದ ಸ್ಥಾನವನ್ನ ಪಡೆದಿದೆ.
ಈ ಮೊದಲು ಎನ್ಎಸ್ಜಿ ಸದಸ್ಯತ್ವ ಪಡೆಯಲು ಭಾರತ ಭಾರಿ ಪ್ರಯತ್ನ ಮಾಡಿತ್ತು. ಅಮೆರಿಕ ಸೇರಿದಂತೆ ಇತರ ಎಲ್ಲ ರಾಷ್ಟ್ರಗಳು ಭಾರತದ ನೆರವಿಗೆ ನಿಂತಿದ್ದವು. ಆದರೆ, ಚೀನಾ ತನ್ನ ವೀಟೋ ಬಳಸಿ ಭಾರತಕ್ಕೆ ಎನ್ಎಸ್ಜಿ ಸದಸ್ಯತ್ವ ಪಡೆಯಲು ಅಡ್ಡಗಾಲು ಹಾಕಿತ್ತು. ಹೀಗಾಗಿಯೇ ಅಮೆರಿಕ ಭಾರತಕ್ಕೆ STA-1 ಪಟ್ಟಿಯಲ್ಲಿ ಸ್ಥಾನ ನೀಡಿ ಅನುಮತಿಸಿದೆ. ಈ ಮೂಲಕ ಚೀನಾಕ್ಕೆ ಭರ್ಜರಿ ಟಾಂಗ್ ನೀಡಿದೆ.
