ಬೆಂಗ​ಳೂ​ರು [ಫೆ.28]:  ಈವರೆಗೆ ವಾರಕ್ಕೆ ಒಂದು ದಿನ ಲಭ್ಯವಿದ್ದ ‘ಶಿವ​ಮೊಗ್ಗ ಟೌನ್‌-ಚೆನ್ನೈ ತತ್ಕಾಲ್‌ ಎಕ್ಸ್‌​ಪ್ರೆಸ್‌’ ರೈಲು ಸೇವೆ ಇನ್ನುಮುಂದೆ ವಾರಕ್ಕೆ ಎರಡು ದಿನ ಸಿಗಲಿದೆ.

ಬೆಂಗ​ಳೂ​ರಿನ ರೈಲ್ವೆ ಇಲಾಖೆ ವಿಭಾ​ಗೀಯ ಕಚೇ​ರಿ​ಯಲ್ಲಿ ಗುರು​ವಾರ ನಡೆದ ​ಸಮಾ​ರಂಭ​ದಲ್ಲಿ ಮುಖ್ಯ​ಮಂತ್ರಿ ಬಿ.ಎ​ಸ್‌.​ಯ​ಡಿ​ಯೂ​ರಪ್ಪ ಹಾಗೂ ಕೇಂದ್ರ ರೈಲ್ವೆ ಖಾತೆ ರಾಜ್ಯ ಸಚಿವ ಸುರೇ​ಶ್‌.ಸಿ. ಅಂಗಡಿ ವಿಡಿಯೋ ಕಾನ್ಫ​ರೆನ್ಸ್‌ ಮೂಲಕ ಹಸಿರು ನಿಶಾನೆ ತೋರಿಸಿ ಚಾಲನೆ ನೀಡಿ​ದರು.

ಈ ವೇಳೆ ಮುಖ್ಯ​ಮಂತ್ರಿ ಬಿ.ಎಸ್‌.ಯಡಿ​ಯೂ​ರಪ್ಪ ಮಾತ​ನಾಡಿ, ಶಿವ​ಮೊ​ಗ್ಗ​-ಚೆನ್ನೈ ರೈಲು ಸೇವೆ ವಾರ​ದಲ್ಲಿ ಒಂದು ದಿನ ಮಾತ್ರ ಇತ್ತು. ಶಿವ​ಮೊಗ್ಗ, ಭದ್ರಾ​ವತಿ ಮತ್ತು ಬೀರೂರು ಪ್ರದೇ​ಶದ ಜನರು ಹಾಗೂ ಶಿವ​ಮೊಗ್ಗ ಸಂಸದ ಬಿ.ವೈ.ರಾಘ​ವೇಂದ್ರ ಬೇಡಿಕೆ ಮೇರೆಗೆ ಇದೀಗ ಎರಡು ದಿನಕ್ಕೆ ವಿಸ್ತ​ರಿ​ಸ​ಲಾ​ಗಿದೆ ಎಂದು ಹೇಳಿ​ದರು.

ಹುಬ್ಬಳ್ಳಿ - ಬೆಂಗಳೂರು ಸೂಪರ್‌ಫಾಸ್ಟ್‌ ಎಕ್ಸಪ್ರೆಸ್‌ LHB ಮೇಲ್ದರ್ಜೆಗೆ ಯಾವಾಗ?...

ರೈಲ್ವೆ ಖಾತೆ ರಾಜ್ಯ ಸಚಿವ ಸುರೇ​ಶ್‌ ಸಿ ಅಂಗಡಿ ಮಾತನಾಡಿ, ರಾಜ​ಧಾನಿ ಸಂಚಾರ ಸಮ​ಸ್ಯೆಗೆ ಕೇಂದ್ರ ಸರ್ಕಾರ ಸಬ್‌ ಅರ್ಬನ್‌ ರೈಲು ಯೋಜನೆ ಘೋಷಿ​ಸಿ​ದೆ. ಇದರ ಜಾರಿಗೆ ಕೇಂದ್ರ ಆರ್ಥಿಕ ವ್ಯವ​ಹಾರ ಸಂಪುಟ ಸಮಿ​ತಿ​ಯಿಂದ ಶೀಘ್ರವೇ ಒಪ್ಪಿಗೆ ದೊರೆ​ಯ​ಲಿದೆ. ರಾಜ್ಯ ಸರ್ಕಾ​ರವೂ ತನ್ನ ಪಾಲಿನ ಅನು​ದಾನ ನೀಡಿದರೆ ಯೋಜ​ನೆ ತ್ವರಿ​ತ​ಗ​ತಿ​ಯಲ್ಲಿ ಅನು​ಷ್ಠಾ​ನವಾ​ಗ​ಲಿದೆ ಎಂದರು.

ಇದೇ ವೇಳೆ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ರೈಲು ನಿಲ್ದಾಣದಲ್ಲಿ ಅಳವಡಿಸಲಾದ ರೈಲು ಪ್ರದರ್ಶನಾ ಜಾಲ, ನಿರೀಕ್ಷಣಾ ಆವರಣ, ಪಲ್ಸ್‌ ಆ್ಯಕ್ಟಿವ್‌ ಸ್ಟೇಷನ್‌ ಕಿಯೋಸ್ಕ್‌, ಸ್ನಾ್ಯಕ್‌ ಫೀಸ್ಟ್‌ ಕಿಯೋಸ್ಕ್‌ಗಳನ್ನು ಉದ್ಘಾ​ಟಿ​ಸ​ಲಾ​ಯಿತು. ಸಂಸದ ಬಿ.ವೈ. ರಾಘವೇಂದ್ರ ಇದ್ದರು.
  
ಹೊಸ ವೇಳಾಪಟ್ಟಿ

ಶಿವ​ಮೊಗ್ಗ ಟೌನ್‌-ಚೆನ್ನೈ ತತ್ಕಾಲ್‌ ದ್ವೈ ಸಾಪ್ತಾ​ಹಿಕ ಎಕ್ಸ್‌​ಪ್ರೆಸ್‌ ರೈಲು ಶಿವಮೊಗ್ಗದಿಂದ ಪ್ರತಿ ಸೋಮವಾರ ಮತ್ತು ಶುಕ್ರವಾರ ರಾತ್ರಿ 11.55ಕ್ಕೆ ಹೊರಟು ಮಂಗಳವಾರ ಮತ್ತು ಶನಿವಾರ ಬೆಳಗ್ಗೆ 11.45ಕ್ಕೆ ಚೆನ್ನೈ ತಲುಪಲಿದೆ. ಇನ್ನು ಚೆನ್ನೈ​ನಿಂದ ಪ್ರತಿ ಮಂಗ​ಳ​ವಾರ ಹಾಗೂ ಶನಿ​ವಾರ ಹೊರಟು ಕ್ರಮ​ವಾಗಿ ಮರು​ದಿನ ಶಿವ​ಮೊಗ್ಗ ತಲು​ಪ​ಲಿದೆ.