ಲಾಲ್ಬಾಗ್ ಪ್ರವೇಶಕ್ಕೆ ಜಿಎಸ್ಟಿ: ದರ ಏರಿಕೆ ಜಾರಿ
ಸಸ್ಯಕಾಶಿ ಲಾಲ್ಬಾಗ್ ಉದ್ಯಾನವನಕ್ಕೆ ಭೇಟಿ ನೀಡುವವರು ಇಂದಿನಿಂದ ಹೆಚ್ಚುವರಿ ಶುಲ್ಕ ಭರಿಸಬೇಕಾಗುತ್ತದೆ. ಎಷ್ಟಾಗಿದೆ ಫೀ..?
ಬೆಂಗಳೂರು (ಫೆ.02): ಸಸ್ಯಕಾಶಿ ಲಾಲ್ಬಾಗ್ ಉದ್ಯಾನವನಕ್ಕೆ ಭೇಟಿ ನೀಡುವವರು ಇಂದಿನಿಂದ ಸಾಮಾನ್ಯ ಪ್ರವೇಶ ದರದ ಜತೆಗೆ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ)ಯನ್ನು ಪಾವತಿಸಬೇಕಾಗುತ್ತದೆ. ಕೇಂದ್ರ ಸರ್ಕಾರ ಮನರಂಜನೆಗೂ ಜಿಎಸ್ಟಿ ಸೇರಿಸಿರುವ ಪರಿಣಾಮ ಪ್ರವೇಶ ದರಕ್ಕೆ ಜಿಎಸ್ಟಿ ಸೇರಿಸಿ ಪರಿಷ್ಕೃತ ದರ ಪಟ್ಟಿಸೇರಿಸಲಾಗಿದೆ ಎಂದು ತೋಟಗಾರಿಕೆ ಇಲಾಖೆಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಪರಿಷ್ಕೃತ ದರದ ಪ್ರಕಾರ ವಯಸ್ಕರಿಗೆ ಪ್ರವೇಶ ದರವನ್ನು 25ರಿಂದ 30 ರು. ಕ್ಕೆ ಏರಿಕೆ ಮಾಡಲಾಗಿದೆ. ಮಕ್ಕಳಿಗೆ ಈ ಹಿಂದೆ ಉಚಿತ ಪ್ರವೇಶವಿತ್ತು. ಇದೀಗ ಆರು ವರ್ಷದೊಳಗಿನ ಮಕ್ಕಳಿಗೆ ಮಾತ್ರ ಉಚಿತ ಪ್ರವೇಶ ಕಲ್ಪಿಸಲಾಗಿದ್ದು, 6ರಿಂದ 12 ವರ್ಷದೊಳಗಿನ ಮಕ್ಕಳಿಗೆ 10, 12 ವರ್ಷ ಮೇಲ್ಪಟ್ಟಮಕ್ಕಳಿಗೆ 30 ರು. ದರ ನಿಗದಿಯಾಗಿದೆ.
ಲಾಲ್ಬಾಗ್ ಕುರಿತು ನಿಮಗೆ ತಿಳಿದಿರದ 8 ಸಂಗತಿಗಳು ...
ಪ್ರವೇಶ ದರದ ಜೊತೆಗೆ ಕಾರು ಹಾಗೂ ವಾಹನಗಳ ಪ್ರವೇಶ ಶುಲ್ಕ ಸಹ 5 ರು. ಹೆಚ್ಚಳ ಮಾಡಲಾಗಿದೆ ಎಂದು ರಾಜ್ಯ ತೋಟಗಾರಿಕೆ ಇಲಾಖೆ ಉಪನಿರ್ದೇಶಕಿ(ಲಾಲ್ಬಾಗ್) ಜಿ.ಕುಸುಮಾ ತಿಳಿಸಿದರು.
ವಾಹನಗಳ ಶುಲ್ಕ ಇಂತಿದೆ : ದ್ವಿಚಕ್ರ ವಾಹನಗಳಿಗೆ 3 ಗಂಟೆ ಅವಧಿಗೆ ಸಾಮಾನ್ಯ ದಿನಗಳಲ್ಲಿ 30 ರಜಾ ದಿನಗಳಲ್ಲಿ 35 ರು. ನಿಗದಿಪಡಿಸಲಾಗಿದೆ. ಕಾರುಗಳಿಗೆ 3 ಗಂಟೆ ಅವಧಿಗೆ ಸಾಮಾನ್ಯ ದಿನಗಳಲ್ಲಿ 40 ಹಾಗೂ 50 ರು., ಟೆಂಪೊ ಟ್ರಾವೆಲರ್ಗೆ ಸಾಮಾನ್ಯ ದಿನಗಳಲ್ಲಿ 70 ಹಾಗೂ ರಜಾ ದಿನಗಳಲ್ಲಿ 80 ರು. ನಿಗದಿ ಮಾಡಲಾಗಿದೆ. ಬಸ್ಗಳಿಗೆ 110 ಹಾಗೂ 130 ರು. ನಿಗದಿಪಡಿಸಲಾಗಿದೆ. (ಹಿಂದೆ ಕ್ರಮವಾಗಿ 100 ಮತ್ತು 120 ಇತ್ತು) ಎಲ್ಲಾ ವಾಹನಗಳಿಗೂ ಪ್ರತಿ ಮೂರು ಗಂಟೆ ಅವಧಿಯ ನಂತರ ಶುಲ್ಕ ಏರಿಕೆಯಾಗಲಿದೆ. 5 ನಿಂದ 25 ರು. ವರೆಗೆ ಏರಿಕೆ ಮಾಡಲಾಗಿದೆ. ಈ ಹಿಂದೆ 2018ರಲ್ಲಿ ಶುಲ್ಕ ಏರಿಕೆ ಮಾಡಲಾಗಿತ್ತು.