ಹುಣಸೋಡು ಬ್ಲಾಸ್ಟ್‌: ಸ್ಫೋಟಕ ಪೂರೈಸಿದ ಮಾಲೀಕ ಶ್ರೀರಾಮುಲು ಅರೆಸ್ಟ್‌
ಆಂಧ್ರದಿಂದ ಪೂರೈಕೆಯಾಗಿದ್ದ ಸ್ಫೋಟಕ| ಆಂಧ್ರದ ಶ್ರೀರಾಮುಲು, ಈತನ ಪುತ್ರ ಸೆರೆ| ಪ್ರಕರಣಕ್ಕೆ ಸಂಬಂಧಿಸಿ ಈವರೆಗೆ 8 ಮಂದಿ ಸೆರೆ|
ಶಿವಮೊಗ್ಗ(ಫೆ.06): ಹುಣಸೋಡು ಸ್ಫೋಟ ಪ್ರಕರಣಕ್ಕೆ ಸಂಬಂಧಿಸಿ ಒಂದಿಷ್ಟು ಟ್ವಿಸ್ಟ್‌ ಸಿಕ್ಕಿವೆ. ಇಲ್ಲಿ ಬಳಕೆಯಾದ ಸ್ಫೋಟಕ ವಸ್ತುಗಳು ಆಂಧ್ರಪ್ರದೇಶದಿಂದ ಪೂರೈಕೆಯಾಗಿದ್ದು, ಇದರ ಮಾಲೀಕ ಶ್ರೀರಾಮುಲು ಎಂದು ಪತ್ತೆ ಹಚ್ಚಲಾಗಿದೆ. ಈತ ಸೇರಿ ಪ್ರಕರಣ ಸಂಬಂಧ ಈವರೆಗೆ 8 ಮಂದಿಯನ್ನು ಬಂಧಿಸಲಾಗಿದೆ.
ಪತ್ರಿಕಾಗೋಷ್ಠಿಯಲ್ಲಿ ಶುಕ್ರವಾರ ಈ ವಿಚಾರ ತಿಳಿಸಿದ ಜಿಲ್ಲಾ ರಕ್ಷಣಾಧಿಕಾರಿ ಕೆ.ಎಂ. ಶಾಂತರಾಜು, ಹುಣಸೋಡು ಸ್ಫೋಟ ಪ್ರಕರಣದ ತನಿಖೆಗಾಗಿ 6 ಮಂದಿ ತಂಡ ರಚಿಸಲಾಗಿತ್ತು. ತುಂಗಾನಗರ ಪಿಐ ದೀಪಕ್‌, ಸೊರಬದ ಸಿಪಿಐ ಮರಳಸಿದ್ದಪ್ಪ ಅವರು ಆಂಧ್ರಪ್ರದೇಶದ ಅನಂತಪುರಕ್ಕೆ ತೆರಳಿ ನಡೆಸಿದ ತನಿಖೆಯಲ್ಲಿ ಇದೆಲ್ಲ ಪತ್ತೆಯಾಯಿತು. ಆಂಧ್ರದ ರಾಯದುರ್ಗದಲ್ಲಿ ಈ ಸ್ಫೋಟಕ ಸಂಗ್ರಹಿಸಲಾಗಿತ್ತು ಎಂದರು.
ಹುಣಸೋಡು ಸ್ಫೋಟ ಪ್ರಕರಣ : ಕ್ರಷರ್‌ ಪರವಾನಗಿ ರದ್ದು
ಸ್ಫೋಟ ನಡೆಯುತ್ತಿದ್ದಂತೆ ಸ್ಫೋಟಕ ಪೂರೈಸಿದ್ದ ಶ್ರೀರಾಮಲು ಮತ್ತು ಪುತ್ರ ಮಂಜುನಾಥ್‌ ಸಾಯಿ ಮುಂಬೈಗೆ ಪರಾರಿಯಾಗಿದ್ದರು. ಅಲ್ಲೇ ಅವರನ್ನು ಬಂಧಿಸಲಾಗಿದೆ. ಇವರ ರಾಯದುರ್ಗದ ಗೋದಾಮಿನಲ್ಲಿ ಸ್ಫೋಟಕ ಸಂಗ್ರಹಕ್ಕೆ ಪರವಾನಗಿ ಇದ್ದರೂ ಅದರ ಸಾಗಣೆಗೆ ಪರವಾನಗಿ ಇರಲಿಲ್ಲ. ಈ ಹಿನ್ನೆಲೆæಯಲ್ಲಿ ವಾಹನದಲ್ಲಿ ಸ್ಫೋಟಕ ಅಕ್ರಮ ಸಾಗಣೆ ಮತ್ತು ಸಂಗ್ರಹ ಹಿನ್ನೆಲೆಯಲ್ಲಿ ಸ್ಥಳೀಯ ಪೊಲೀಸರ ನೆರವಿನೊಂದಿಗೆ ಆಂಧ್ರದಲ್ಲಿ ಪ್ರಕರಣ ದಾಖಲಿಸಲಾಗಿದೆ.
