ಐಎಸ್ಎಲ್: ಬಿಎಫ್‌ಸಿಗೆ ಸತತ 2ನೇ ಜಯ
ಸುನಿಲ್ ಚೆಟ್ರಿ ನೇತೃತ್ವದ ಬೆಂಗಳೂರು ಎಫ್‌ ಸಿ ತಂಡವು 7ನೇ ಆವೃತ್ತಿಯ ಇಂಡಿಯನ್ ಸೂಪರ್ ಲೀಗ್ ಟೂರ್ನಿಯಲ್ಲಿ ಸತತ ಎರಡನೇ ಗೆಲುವು ದಾಖಲಿಸಿದೆ. ಈ ಕುರಿತಾದ ಒಂದು ರಿಪೋರ್ಟ್ ಇಲ್ಲಿದೆ ನೋಡಿ.
ಬಾಂಬೋಲಿಮ್(ಡಿ.18): 7ನೇ ಆವೃತ್ತಿಯ ಇಂಡಿಯನ್ ಸೂಪರ್ ಲೀಗ್ (ಐಎಸ್ಎಲ್) ಫುಟ್ಬಾಲ್ ಟೂರ್ನಿಯಲ್ಲಿ ಬೆಂಗಳೂರು ಎಫ್‌ಸಿ ಸತತ 2ನೇ ಗೆಲುವು ದಾಖಲಿಸಿದೆ. ಈ ಜಯದೊಂದಿಗೆ ಅಜೇಯವಾಗಿ ಉಳಿದಿದೆ. ಬಿಎಫ್‌ಸಿ ಟೂರ್ನಿಯಲ್ಲಿ ಆಡಿರುವ 6 ಪಂದ್ಯಗಳಲ್ಲಿ ತಲಾ 3 ಗೆಲುವು ಹಾಗೂ ಡ್ರಾ ಸಾಧಿಸಿದ್ದು, 12 ಅಂಕಗಳಿಸಿ ಪಟ್ಟಿಯಲ್ಲಿ 3ನೇ ಸ್ಥಾನಕ್ಕೆ ಜಿಗಿದಿದೆ. ಗುರುವಾರ ಇಲ್ಲಿ ನಡೆದ ಪಂದ್ಯದಲ್ಲಿ ಬಿಎಫ್‌ಸಿ, ಒಡಿಶಾ ಎಫ್‌ಸಿ ವಿರುದ್ಧ 2-1 ಗೋಲುಗಳಿಂದ ಗೆಲುವು ಸಾಧಿಸಿತು.
ಪಂದ್ಯದ ಆರಂಭದಿಂದಲೇ ಮಿಂಚಿನ ಆಟದ ಮೂಲಕ ಗಮನಸೆಳೆದ ಬಿಎಫ್‌ಸಿ ಆಟಗಾರರು ಮೊದಲಾರ್ಧದಲ್ಲಿ ಮೇಲುಗೈ ಸಾಧಿಸಿದರು. ಪಂದ್ಯದ 38ನೇ ನಿಮಿಷದಲ್ಲಿ ನಾಯಕ ಸುನಿಲ್ ಚೆಟ್ರಿ, ಒಡಿಶಾ ಭದ್ರಕೋಟೆಯ ಒಳನುಗ್ಗಿ ಆಕರ್ಷಕ ಗೋಲುಗಳಿಸಿದರು. ಈ ಮೂಲಕ ಬಿಎಫ್‌ಸಿ ಗೋಲಿನ ಖಾತೆ ತೆರೆಯಿತು. ಮೊದಲಾರ್ಧದ ಅಂತ್ಯಕ್ಕೆ ಬಿಎಫ್‌ಸಿ 1-0 ಮುನ್ನಡೆ ಸಾಧಿಸಿತು.
ಐಎಸ್ಎಲ್: ಬಿಎಫ್‌ಸಿಗೆ ಮತ್ತೊಂದು ಜಯದ ನಿರೀಕ್ಷೆ
ಇನ್ನು ದ್ವಿತೀಯಾರ್ಧದ ಆಟದಲ್ಲಿ ಒಡಿಶಾ ತಂಡದ ಮೇಲೆ ಹೆಚ್ಚಿನ ಹೊರೆ ಬಿತ್ತು. ಒಡಿಶಾ ತಂಡದ ಸ್ಟೀವನ್‌ ವಿನ್ಸೆಂಟ್‌ ಟೇಲರ್‌ (71ನೇ ನಿ.) ಗೋಲುಗಳಿಸಿ 1-1ರಿಂದ ಸಮಬಲ ಸಾಧಿಸಿದರು. ಇದಾಗಿ 8 ನಿಮಿಷಗಳ ಬಳಿಕ ಕ್ಲೇಟನ್‌ ಆಗಸ್ಟೊ(79ನೇ ನಿ.) ಗೋಲುಗಳಿಸಿ ಮುನ್ನಡೆ ನೀಡಿದರು. ಅಂತಿಮ ಅವಧಿವರೆಗೂ ಇದೇ ಅಂತರ ಕಾಯ್ದುಕೊಂಡ ಬಿಎಫ್‌ಸಿ ಜಯದ ನಗೆ ಬೀರಿತು.
ಇಂದಿನ ಪಂದ್ಯ: ನಾರ್ತ್ ಈಸ್ಟ್‌ ಎಫ್‌ಸಿ-ಜೆಮ್ಶೆಡ್‌ಪುರ ಎಫ್‌ಸಿ
ಸ್ಥಳ: ತಿಲಕ್‌ ಮೈದಾನ,
ಪಂದ್ಯ ಆರಂಭ: ರಾತ್ರಿ 7.30ಕ್ಕೆ
