ಮಸೀದಿಯಲ್ಲಿ ಧ್ವನಿವರ್ಧಕ: ರಾಜ್ ಠಾಕ್ರೆ ವಾರ್ನಿಂಗ್ ಬೆನ್ನಲ್ಲೇ ಮಹತ್ವದ ತೀರ್ಪು ಕೈಗೊಂಡ ಉದ್ಧವ್ ಸರ್ಕಾರ!
* ಮಹಾರಾಷ್ಟ್ರದಲ್ಲಿ ಮಸೀದಿಯಲ್ಲಿ ಧ್ವನಿವರ್ಧಕ ಬ್ಯಾನ್ ಮಾಡುವಂತೆ ಕೋರಿದ್ದ ರಾಜ್ ಠಾಕ್ರೆ
* ಧ್ವನಿವರ್ಧಕ ಬ್ಯಾನ್ ಮಾಡದಿದ್ದರೆ ಕಠಿಣ ಕ್ರಮ ಕೈಗೊಳ್ಳುವ ಎಚ್ಚರಿಕೆ
* ರಾಜ್ ಠಾಕ್ರೆ ವಾರ್ನಿಂಗ್ ಬೆನ್ನಲ್ಲೇ ಮಹತ್ವದ ತೀರ್ಪು ಕೈಗೊಂಡ ಉದ್ಧವ್ ಸರ್ಕಾರ
ಮುಂಬೈ(ಏ.18): ಮಸೀದಿಗಳ ಧ್ವನಿವರ್ಧಕಗಳಿಂದ ಹೊರಹೊಮ್ಮುವ ಆಜಾನ್ ವಿಚಾರ ಇಡೀ ದೇಶದಲ್ಲಿ ಸದ್ದು ಮಾಡುತ್ತಿದೆ. ಈ ವಿಚಾರವಾಗಿ ಮಹಾರಾಷ್ಟ್ರದಲ್ಲಿ, ಮಹಾರಾಷ್ಟ್ರ ನವನಿರ್ಮಾಣ ಸೇನಾ ಮುಖ್ಯಸ್ಥ ರಾಜ್ ಠಾಕ್ರೆ ಇದನ್ನು ನಿರ್ಬಂಧಿಸುವಂತೆ ಎಚ್ಚರಿಕೆ ನೀಡಿದ ನಂತರ, ಈ ವಿಚಾರ ಮತ್ತಷ್ಟು ವೇಗ ಪಡೆಯಿತು. ಏತನ್ಮಧ್ಯೆ, ರಾಜ್ ಠಾಕ್ರೆ ಬೆದರಿಕೆಯ ನಡುವೆ, ಮಹಾರಾಷ್ಟ್ರ ಸರ್ಕಾರದ ಗೃಹ ಇಲಾಖೆ ಮಹತ್ವದ ನಿರ್ಧಾರವನ್ನು ತೆಗೆದುಕೊಂಡಿದೆ. ಇದರ ಅನ್ವಯ ಇನ್ಮುಂದೆಲ್ಲಿ ಈಗ ಯಾವುದೇ ಧಾರ್ಮಿಕ ಸ್ಥಳದಲ್ಲಿ ಅನುಮತಿ ಇಲ್ಲದೆ ಧ್ವನಿವರ್ಧಕಗಳನ್ನು ಅಳವಡಿಸುವುದನ್ನು ನಿಷೇಧಿಸಲಾಗಿದೆ.
ಗೃಹ ಸಚಿವರು ಶೀಘ್ರದಲ್ಲೇ ಉನ್ನತ ಮಟ್ಟದ ಸಭೆ ನಡೆಸಲಿದ್ದಾರೆ
ಧಾರ್ಮಿಕ ಸ್ಥಳಗಳಲ್ಲಿ ಧ್ವನಿವರ್ಧಕಗಳನ್ನು ನಿಷೇಧಿಸುವ ಕುರಿತು ಮಹಾರಾಷ್ಟ್ರ ಗೃಹ ಸಚಿವ ದಿಲೀಪ್ ವಾಲ್ಸೆ ಪಾಟೀಲ್ ಅವರು ಶೀಘ್ರದಲ್ಲೇ ಉನ್ನತ ಮಟ್ಟದ ಸಭೆ ನಡೆಸಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಇದರಲ್ಲಿ ರಾಜ್ಯದ ಡಿಜಿಪಿ, ಹಿರಿಯ ಪೊಲೀಸ್ ಅಧಿಕಾರಿಗಳು ಉಪಸ್ಥಿತರಿರುತ್ತಾರೆ. ಆಡಳಿತದ ಅನುಮತಿ ಪಡೆಯದೆ ಧ್ವನಿವರ್ಧಕಗಳನ್ನು ಬಳಸಿದರೆ ಅಂತಹವರ ವಿರುದ್ಧ ಕಾನೂನು ಕ್ರಮ ಜರುಗಿಸಲಾಗುವುದು ಎಂದು ಸಭೆಯಲ್ಲಿ ತೀರ್ಮಾನಿಸಲಾಗಿದೆ.
ತೀರ್ಪಿನ ನಂತರ ಕಾರ್ಯಪ್ರವೃತ್ತರಾದ ನಾಸಿಕ್ ಪೊಲೀಸರು
ಅದೇ ಸಮಯದಲ್ಲಿ, ನಾಸಿಕ್ ಪೊಲೀಸರು ಈ ಆದೇಶವನ್ನು ಜಾರಿಗೆ ತರಲು ಸಜ್ಜಾಗಿದ್ದಾರೆ. ನಾಸಿಕ್ ಪೊಲೀಸ್ ಕಮಿಷನರ್ ಈ ನಿಟ್ಟಿನಲ್ಲಿ ನಗರದಲ್ಲಿ ಆದೇಶಗಳನ್ನು ಸಹ ಹೊರಡಿಸಿದ್ದಾರೆ. ಅದರ ಪ್ರಕಾರ ಯಾವುದೇ ಧಾರ್ಮಿಕ ಸಂಸ್ಥೆ ಅಥವಾ ಸಂಘಟನೆ ಧ್ವನಿವರ್ಧಕಗಳನ್ನು ಅಳವಡಿಸಲು ಬಯಸಿದರೆ, ಮೊದಲು ಪೊಲೀಸರಿಂದ ಅನುಮತಿ ಪಡೆಯಬೇಕು. ಇದೇ ವೇಳೆ ಯಾರಾದರೂ ಅನುಮತಿ ಇಲ್ಲದೆ ಧ್ವನಿವರ್ಧಕ ಅಳವಡಿಸಿದರೆ ಅಂತಹವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದಿದ್ದಾರೆ.
ರಾಜ್ ಠಾಕ್ರೆ ಮೇ 3ರವರೆಗೆ ಅಂತಿಮ ಗಡುವು ನೀಡಿದ್ದಾರೆ
ಮೇ 3 ರೊಳಗೆ ಎಲ್ಲಾ ಮಸೀದಿಗಳಿಂದ ಧ್ವನಿವರ್ಧಕಗಳನ್ನು ತೆಗೆದುಹಾಕುವಂತೆ ಮಹಾ ವಿಕಾಸ್ ಅಘಾಡಿ ಸರ್ಕಾರಕ್ಕೆ MNS ಮುಖ್ಯಸ್ಥ ರಾಜ್ ಠಾಕ್ರೆ ಎಚ್ಚರಿಕೆ ನೀಡಿದ್ದಾರೆ. ಇದನ್ನು ಮಾಡದಿದ್ದರೆ ಎಂಎನ್‌ಎಸ್ ಕಾರ್ಯಕರ್ತರು ಮಸೀದಿಯ ಹೊರಗೆ ಸ್ಪೀಕರ್‌ಗಳನ್ನು ಹಾಕುತ್ತಾರೆ ಮತ್ತು ಹನುಮಾನ್ ಚಾಲೀಸಾವನ್ನು ಪಠಿಸುತ್ತಾರೆ. ಇದೇ ವೇಳೆ ದೇಶಾದ್ಯಂತ ಇರುವ ಹಿಂದೂಗಳು ಇದೇ 3ರ ವರೆಗೆ ಸನ್ನದ್ಧರಾಗಿರಲು ನಾನು ವಿನಂತಿಸುತ್ತೇನೆ ಎಂದು ಠಾಕ್ರೆ ಹೇಳಿದ್ದಾರೆ. ಈ ವಿಚಾರದಲ್ಲಿ ಹಿಂದೆ ಸರಿಯುವುದಿಲ್ಲ ಎಂದರು. ಈ ಪ್ರಾರ್ಥನೆಯು ನಿಮ್ಮದು, ಆದ್ದರಿಂದ ನಾವು ಅದನ್ನು ಮೈಕ್ ಮೂಲಕ ಏಕೆ ಕೇಳಬೇಕು ಎಂದು ಹೇಳಿದರು. ನೀವು ಏನು ಮಾಡಬೇಕೆಂದು ಬಯಸುತ್ತೀರೋ ಅದನ್ನು ಮನೆಯಲ್ಲಿಯೇ ಮಾಡಿ. ಎಲ್ಲರಿಗೂ ನೋವಾಗುವಂತಾಗಬಾರದು. ಇತರ ಧರ್ಮಗಳಿಗೆ ನೋವುಂಟು ಮಾಡುವ ಧರ್ಮ ಯಾವುದಾದರೂ ಇದೆಯಾ? ಎಂದು ಪ್ರಶ್ನಿಸಿದರು.
ಧ್ವನಿವರ್ಧಕದ ವಿರುದ್ಧ ಪ್ರತಿಭಟನೆಯಲ್ಲಿ ಹನುಮಾನ್ ಚಾಲೀಸಾ
- ಮಸೀದಿಗಳಿಂದ ಧ್ವನಿವರ್ಧಕಗಳನ್ನು ತೆಗೆದುಹಾಕುವಂತೆ ಎಚ್ಚರಿಸಿದ ನಂತರ ಎರಡು ದಿನಗಳ ಹಿಂದೆ ಮಹಾರಾಷ್ಟ್ರ ನವನಿರ್ಮಾಣ ಸೇನಾ ಕಾರ್ಯಕರ್ತರೊಂದಿಗೆ ಪುಣೆಯಲ್ಲಿ ಹನುಮಾನ್ ಚಾಲೀಸಾವನ್ನು ಓದಿದರು. ಈ ಸಂದರ್ಭದಲ್ಲಿ, ಖಾಲ್ಕರ್ ಚೌಕ್‌ನಲ್ಲಿರುವ ಮಾರುತಿ ದೇವಸ್ಥಾನದ ಹೊರಗೆ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಅವರ ಸಾವಿರಾರು ಬೆಂಬಲಿಗರು ಭಾಗವಹಿಸಿದ್ದರು. ಎಲ್ಲರೂ ಸೇರಿ ಮಹಾ ಆರತಿ ಕೂಡ ಮಾಡಿದ್ದಾರೆ.
ಇದೇ ವೇಳೆ ಮಹಾರಾಷ್ಟ್ರದ ಅಮರಾವತಿಯಲ್ಲಿ ಸಂಸದ ನವನೀತ್ ರಾಣಾ ಅವರು ಹನುಮಾನ್ ಚಾಲೀಸಾ ಪಠಿಸಿದರು. ಈ ವೇಳೆ ನವನೀತ್ ರಾಣಾ ಸಂಪೂರ್ಣ ಬಲದಿಂದ ಹೊರಬಂದರು ಮತ್ತು ನೂರಾರು ಮಹಿಳೆಯರು ಅವರೊಂದಿಗೆ ಇದ್ದರು.
