ಪ್ರೇಯಸಿಗೂ ನಕಲಿ ವಜ್ರದ ಉಂಗುರ ನೀಡಿದ್ದ ಚೋಕ್ಸಿ!
* ಪ್ರೇಯಸಿಗೂ ನಕಲಿ ವಜ್ರದ ಉಂಗುರ ನೀಡಿದ್ದ ಚೋಕ್ಸಿ!
* ಚೋಕ್ಸಿ ಅಪಹರಣದಲ್ಲಿ ತನ್ನ ಪಾತ್ರವೇ ಇಲ್ಲ: ಜರಾಬಿಕಾ
* ಚೋಕ್ಸಿ ಕುಟುಂಬಸ್ಥರು, ವಕೀಲರಿಂದ ನನ್ನ ತೇಜೋವಧೆ
* ವಜ್ರೋದ್ಯಮಿ ಮೆಹುಲ್ ಚೋಕ್ಸಿ ಸ್ನೇಹಿತೆ ಜರಾಬಿಕಾ ಕಿಡಿ
ನವದೆಹಲಿ(ಜೂ.09): ಪಿಎನ್‌ಬಿ ಬಹುಕೋಟಿ ವಂಚನೆ ಪ್ರಕರಣದ ಆರೋಪಿ ವಜ್ರೋದ್ಯಮಿ ಮೆಹುಲ್ ಚೋಕ್ಸಿ ತನ್ನ ಪ್ರಿಯತಮೆಗೂ ನಕಲಿ ವಜ್ರದ ಉಂಗುರಗಳು ಮತ್ತು ಬ್ರೇಸ್ಲೇಟ್ಗಳನ್ನು ನೀಡಿ ವಂಚಿಸಿದ್ದ ಎಂಬ ವಿಚಾರ ತಿಳಿದುಬಂದಿದೆ. ಈ ಕುರಿತು ಚೋಕ್ಸಿ ಅವರ ಪ್ರೇಯಸಿ ಎನ್ನಲಾದ ಬರ್ಬರಾ ಜರಾಬಿಕಾ ಅವರೇ ನೇರ ಆರೋಪ ಮಾಡಿದ್ದಾರೆ.
ಈ ಸಂಬಂಧ ಆಂಗ್ಲ ಮಾಧ್ಯಮವೊಂದಕ್ಕೆ ಮಂಗಳವಾರ ಸಂದರ್ಶನ ನೀಡಿದ ಜರಾಬಿಕಾ, ಕಳೆದ ವರ್ಷ ಆ್ಯಂಟಿಗುವಾಗೆ ತೆರಳಿದ್ದಾಗ ನನ್ನನ್ನು ಭೇಟಿ ಮಾಡಿದ್ದ ಚೋಕ್ಸಿ ತನ್ನನ್ನು ರಾಜ್‌ ಎಂದು ಪರಚಯಿಸಿಕೊಂಡಿದ್ದ. ಆ ಬಳಿಕ ನಾವು ಆತ್ಮೀಯ ಸ್ನೇಹಿತರಾಗಿದ್ದು, ನನಗೆ ಆತ ಹಲವು ವಜ್ರದ ಉಂಗುರಗಳು ಮತ್ತು ಬ್ರೇಸ್ಲೆಟ್ಗಳನ್ನು ಉಡುಗೊರೆಯಾಗಿ ನೀಡಿದ್ದ. ಆದರೆ ಅವೆಲ್ಲವೂ ನಕಲಿ ಎಂದು ತಡವಾಗಿ ತಿಳಿಯಿತು ಎಂದು ದೂರಿದ್ದಾರೆ. ಜೊತೆಗೆ ಆ್ಯಂಟಿಗುವಾದಿಂದ ಡೊಮಿನಿಕಾಗೆ ತನ್ನ ಅಪಹರಣ ಕೃತ್ಯದಲ್ಲಿ ತನ್ನ ಪ್ರೇಯಸಿಯೂ ಭಾಗಿಯಾಗಿದ್ದಳು ಎಂಬ ಚೋಕ್ಸಿ ಆರೋಪವನ್ನು ಜರಾಬಿಕಾ ನಿರಾಕರಿಸಿದರು.
ಚೋಕ್ಸಿ ಅಪಹರಣದಲ್ಲಿ ತನ್ನದು ಯಾವುದೇ ಪಾತ್ರ ಇಲ್ಲ. ಆದಾಗ್ಯೂ, ಚೋಕ್ಸಿಯ ವಕೀಲರು ಮತ್ತು ಕುಟುಂಬ ಸದಸ್ಯರು ನನ್ನ ಹೆಸರನ್ನು ಎಳೆದು ತಂದಿದ್ದಾರೆ. ನಾನು ಮತ್ತು ನನ್ನ ಕುಟುಂಬ ತುಂಬಾ ಒತ್ತಡದಲ್ಲಿದೆ ಎಂದು ಹೇಳಿದರು.
