ಬೀಜಿಂಗ್‌/ನವದೆಹಲಿ(ಜೂ.06): ಲಡಾಖ್‌ ಹಾಗೂ ಸಿಕ್ಕಿಂ ಗಡಿ ಬಿಕ್ಕಟ್ಟಿಗೆ ಸಂಬಂಧಿಸಿದಂತೆ ಭಾರತ ಮತ್ತು ಚೀನಾ ನಡುವೆ ಲೆಫ್ಟಿನೆಂಟ್‌ ಜನರಲ್‌ ಮಟ್ಟದ ಮಹತ್ವದ ಮಾತುಕತೆ ಶನಿವಾರ ನಡೆಯಲಿದೆ.

ಲೇಹ್‌ನಲ್ಲಿನ 14 ಕೋರ್‌ ಪಡೆಯ ಮುಖ್ಯಸ್ಥ ಲೆ| ಜ| ಹರಿಂದರ್‌ ಸಿಂಗ್‌ ಅವರು ಭಾರತವನ್ನು ಪ್ರತಿನಿಧಿಸಲಿದ್ದಾರೆ. ಮಾತುಕತೆಯು ಪೂರ್ವ ಲಡಾಖ್‌ನ ಚುಶೂಲ್‌ ವಲಯದ ಮಾಲ್ಡೋದಲ್ಲಿ ಬೆಳಗ್ಗೆ 8 ಗಂಟೆಗೆ ಮಾತುಕತೆ ನಿಗದಿಯಾಗಿದೆ.

ಪಾಂಗಾಂಗ್‌ ತ್ಸೋ, ಗಲ್ವಾನ್‌ ಕಣಿವೆ ಹಾಗೂ ಡೆಮ್ಚೋಕ್‌ ಎಂಬ ಲಡಾಖ್‌ನ 3 ಭಾಗಗಳಲ್ಲಿ ಕಳೆದ ತಿಂಗಳು ಭಾರತ ಹಾಗೂ ಚೀನಾ ಪಡೆಗಳು ಚಕಮಕಿ ನಡೆಸಿದ್ದವು. ಈ ವಿಷಯದ ಬಗ್ಗೆ ಮಾತುಕತೆಯಲ್ಲಿ ಪ್ರಮುಖ ಚರ್ಚೆ ನಡೆಯಲಿದ್ದು, ಕಾದಾಟಕ್ಕೆ ಅಂತ್ಯ ಹಾಡುವ ಬಗ್ಗೆ ಗಮನ ಹರಿಸುವ ಸಾಧ್ಯತೆ ಇದೆ. ಮೂಲಗಳ ಪ್ರಕಾರ, ಭಾರತವು ಯಥಾಸ್ಥಿತಿ ಮುಂದುವರಿಸಬೇಕು ಎಂದು ಚೀನಾ ಮುಂದೆ ಪ್ರಸ್ತಾಪ ಇರಿಸುವ ಉದ್ದೇಶ ಹೊಂದಿದೆ. ಈ ಮುಂಚೆ 10 ಸುತ್ತಿನ ಮಾತುಕತೆಗಳು ನಡೆದಿದ್ದರೂ ಫಲ ನೀಡಿಲ್ಲ.

ಈ ನಡುವೆ, ಶುಕ್ರವಾರ ಪ್ರತಿಕ್ರಿಯೆ ನೀಡಿರುವ ಚೀನಾ ವಿದೇಶಾಂಗ ವಕ್ತಾರ ಗೆಂಗ್‌ ಶುವಾಂಗ್‌, ಸೂಕ್ತ ರೀತಿಯಲ್ಲಿ ಗಡಿ ವಿಚಾರ ಬಗೆಹರಿಸಿಕೊಳ್ಳಲು ಚೀನಾ ಇಚ್ಛಿಸುತ್ತದೆ ಎಂದಿದ್ದಾರೆ.

ಮಾತುಕತೆಗೆ ಪೂರಕ ವಾತಾವರಣ ಸೃಷ್ಟಿಸಲು ಉಭಯ ದೇಶಗಳ ಪಡೆಗಳು ಗಡಿಯಿಂದ ಶುಕ್ರವಾರವೇ ದೂರ ಸರಿದಿವೆ.