ಸಂಬಳ ಕಡಿತ ಅಂತ್ಯ: ಹಿಮಾಚಲ ಶಾಸಕರಿಗೆ ಇನ್ನು ಪೂರ್ಣ ವೇತನ
ಕೊರೋನಾ ಕಾರಣ ಸಂಬಳ ಕಡಿತ| ಹಿಮಾಚಲ ಶಾಸಕರಿಗೆ ಇನ್ನು ಪೂರ್ಣ ವೇತನ| ಏಪ್ರಿಲ್ 1ರಿಂದಲೇ ಪೂರ್ತಿ ವೇತನ ಹಾಗೂ ಪೂರ್ತಿ ಪ್ರಮಾಣದ ಶಾಸಕರ ನಿಧಿ ಲಭ್ಯ
ಶಿಮ್ಲಾ(ಮಾ.07): ಕೊರೋನಾ ಕಾರಣ ಸಂಬಳ ಕಡಿತ ಅನುಭವಿಸಿದ್ದ ಹಿಮಾಚಲ ಪ್ರದೇಶದ ಶಾಸಕರಿಗೆ ಶುಭ ಸುದ್ದಿ. ರಾಜ್ಯದ ಎಲ್ಲಾ ಶಾಸಕರಿಗೆ ಏಪ್ರಿಲ್ 1ರಿಂದಲೇ ಪೂರ್ತಿ ವೇತನ ಹಾಗೂ ಪೂರ್ತಿ ಪ್ರಮಾಣದ ಶಾಸಕರ ನಿಧಿ ಲಭ್ಯವಾಗಲಿದೆ.
ಶುಕ್ರವಾರ ವಿಧಾನಸಭೆ ಅಧಿವೇಶನದಲ್ಲಿ 2021-22ರ ಬಜೆಟ್ ಮಂಡನೆ ವೇಳೆ ಹಿಮಾಚಲ ಪ್ರದೇಶ ಮುಖ್ಯಮಂತ್ರಿ ಜೈರಾಮ್ ಠಾಕೂರ್ ಅವರು ಈ ವಿಚಾರ ತಿಳಿಸಿದ್ದಾರೆ.
ಕೊರೋನಾ ಲಾಕ್ಡೌನ್ ಹಾಗೂ ಕೊರೋನಾ ಸೋಂಕಿನ ವಿರುದ್ಧದ ಹೋರಾಟಕ್ಕೆ ಹಣದ ಸಂಗ್ರಹಕ್ಕಾಗಿ ಕಳೆದ ವರ್ಷ ಶಾಸಕರ ವೇತನದ ಪೈಕಿ ಶೇ.30ರಷ್ಟುಕಡಿತಗೊಳಿಸಲಾಗಿತ್ತು ಹಾಗೂ 2 ವರ್ಷಗಳಿಗೆ ಅನ್ವಯಿಸುವಂತೆ ಶಾಸಕರ ನಿಧಿಯನ್ನು ಅಮಾನತಿನಲ್ಲಿಡಲಾಗಿತ್ತು.