ಪಾಕ್‌ಗೆ ರಹಸ್ಯ ಮಾಹಿತಿ ರವಾನೆ: HAL ಉದ್ಯೋಗಿ ಅರೆಸ್ಟ್‌!
ಪಾಕ್‌ಗೆ ರಹಸ್ಯ ಮಾಹಿತಿ ರವಾನೆ| ಎಚ್ಎಎಲ್ ಉದ್ಯೋಗಿ ಅರೆಸ್ಟ್‌| ಮಹಾರಾಷ್ಟ್ರದಲ್ಲಿ ಬಂಧನ| 10 ದಿನ ಎಟಿಎಸ್‌ ವಶ
ಮುಂಬೈ(ಅ.10): ಪಾಕಿಸ್ತಾನದ ಗುಪ್ತಚರ ಸಂಸ್ಥೆ ‘ಐಎಸ್‌ಐ’ಗೆ ಭಾರತದ ಯುದ್ಧವಿಮಾನದ ರಹಸ್ಯ ಮಾಹಿತಿಯನ್ನು ಕಳಿಸಿದ ಆರೋಪದ ಮೇರೆಗೆ ಸಾರ್ವಜನಿಕ ಸ್ವಾಮ್ಯದ ಹಿಂದುಸ್ತಾನ್‌ ಏರೋನಾಟಿಕ್ಸ್‌ ಲಿಮಿಟೆಡ್‌ (ಎಚ್ಎಎಲ್) ಕಂಪನಿಯ ಒಬ್ಬ ಉದ್ಯೋಗಿಯನ್ನು ಮಹಾರಾಷ್ಟ್ರ ಪೊಲೀಸರು ಶುಕ್ರವಾರ ಬಂಧಿಸಿದ್ದಾರೆ.
‘ಈ ವ್ಯಕ್ತಿ ಯುದ್ಧವಿಮಾನದ ಹಾಗೂ ಅದರ ಉತ್ಪಾದನಾ ಘಟಕದ ರಹಸ್ಯ ಮಾಹಿತಿಯನ್ನು ಐಎಸ್‌ಐಗೆ ರವಾನಿಸುತ್ತಿದ್ದ. ಈತ ಐಎಸ್‌ಐ ಜತೆ ನಿರಂತರ ಸಂಪರ್ಕ ಹೊಂದಿರುವ ಬಗ್ಗೆ ಮಹಾರಾಷ್ಟ್ರ ಭಯೋತ್ಪಾದಕ ನಿಗ್ರಹ ದಳದ ನಾಸಿಕ್‌ ಘಟಕಕ್ಕೆ ಗುಪ್ತಚರ ಮಾಹಿತಿ ಲಭಿಸಿತ್ತು’ ಎಂದು ಪೊಲೀಸ್‌ ಪ್ರಕಟಣೆ ತಿಳಿಸಿದೆ.
‘ನಾಸಿಕ್‌ ಸಮೀಪದ ಓಝಾರ್‌ ಎಂಬಲ್ಲಿನ ಎಚ್‌ಎಎಲ್‌ನ ವಿಮಾನ ಉತ್ಪಾದನಾ ಘಟಕ, ವಾಯುನೆಲೆ ಹಾಗೂ ಉತ್ಪಾದನಾ ಘಟಕದ ನಿರ್ಬಂಧಿತ ವಲಯದಲ್ಲಿನ ರಹಸ್ಯ ಮಾಹಿತಿಗಳು, ವಿಮಾನದ ಹಾಗೂ ಇತರ ರಹಸ್ಯ ಮಾಹಿತಿಗಳನ್ನು ಐಎಸ್‌ಐಗೆ ಹಸ್ತಾಂತರಿಸುತ್ತಿದ್ದ ಸಂಬಂಧ 41 ವರ್ಷದ ಉದ್ಯೋಗಿಯನ್ನು ನಾಸಿಕ್‌ನ ಆತನ ಮನೆಯಲ್ಲೇ ಬಂಧಿಸಲಾಗಿದೆ. ಬಂಧಿತನ ವಿರುದ್ಧ ‘ಕಚೇರಿ ರಹಸ್ಯ ಕಾಯ್ದೆ’ಯ ಅಡಿ ಪ್ರಕರಣ ದಾಖಲಿಸಲಾಗಿದೆ. ಕೋರ್ಟು ಆತನನ್ನು 10 ದಿನ ಎಟಿಎಸ್‌ ವಶಕ್ಕೆ ಒಪ್ಪಿಸಿದೆ’ ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಬಂಧಿತನಿಂದ 3 ಮೊಬೈಲ್‌ ಹ್ಯಾಂಡ್‌ಸೆಟ್‌, 5 ಸಿಮ್‌ ಕಾರ್ಡ್‌, 2 ಮೆಮೊರಿ ಕಾರ್ಡ್‌ ವಶಪಡಿಸಿಕೊಳ್ಳಲಾಗಿದೆ. ಫೋನು ಹಾಗೂ ಸಿಮ್‌ ಕಾರ್ಡನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಪರಿಶೀಲನೆಗೆ ಕಳಿಸಲಾಗಿದೆ.
ಘಟಕದ ವಿಶೇಷತೆ:
ಎಚ್ಎಎಲ್ ವಿಮಾನ ಘಟಕವನ್ನು 1964ರಲ್ಲಿ ನಾಸಿಕ್‌ನಿಂದ 24 ಕಿ.ಮೀ. ದೂರದ ಓಝಾರ್‌ನಲ್ಲಿ ಆರಂಭಿಸಲಾಗಿದೆ. ಇದರಲ್ಲಿ ಮಿಗ್‌-21ಎಫ್‌ಎಲ್‌ ಯುದ್ಧವಿಮಾನಗಳು ಹಾಗೂ ಕೆ-13 ಕ್ಷಿಪಣಿಗಳನ್ನು ಆರಂಭದಲ್ಲಿ ತಯಾರಿಸಲಾಗುತ್ತಿತ್ತು. ಬಳಿಕ ಇಲ್ಲಿ ಮಿಗ್‌-21 ಎಂ, ಮಿಗ್‌-21 ಬಿಐಎಸ್‌, ಮಿಗ್‌-27 ಎಂ ಹಾಗೂ ಅತ್ಯಾಧುನಿಕ ಸುಖೋಯ್‌-3- ಎಂಕೆಐ ಯುದ್ಧವಿಮಾನಗಳನ್ನು ಉತ್ಪಾದಿಸಲಾಗಿದೆ. ಮಿಗ್‌ ಹಾಗೂ ಸುಖೋಯ್‌ನ ರಿಪೇರಿ ಹಾಗೂ ನವೀಕರಣವೂ ಇಲ್ಲಿ ನಡೆಯುತ್ತದೆ.
