ಅತುಲ್‌ ಸುಭಾಷ್‌ ಸಾವಿನ ಬೆನ್ನಲ್ಲೇ, ಜೀವನಾಂಶ ನಿರ್ಧಾರಕ್ಕೆ 8 ಅಂಶಗಳ ಸಲಹೆ ನೀಡಿದ ಸುಪ್ರೀಂ ಕೋರ್ಟ್!
ಪತ್ನಿ ಹಾಗೂ ಆಕೆಯ ಮನೆಯವರ ಕಿರುಕುಳಕ್ಕೆ ಬೇಸತ್ತು ಆತ್ಮಹತ್ಯೆ ಮಾಡಿಕೊಂಡ ಬೆಂಗಳೂರಿನ ಟೆಕ್ಕಿ ಪ್ರಕರಣದ ನಂತರ, ವಿಚ್ಛೇದನ ಪ್ರಕರಣಗಳಲ್ಲಿ ಜೀವನಾಂಶ ಮೊತ್ತವನ್ನು ನಿರ್ಧರಿಸಲು ಸುಪ್ರೀಂ ಕೋರ್ಟ್ ಎಂಟು ಮಾರ್ಗಸೂಚಿಗಳನ್ನು ಹೊರಡಿಸಿದೆ. ಈ ಮಾರ್ಗಸೂಚಿಗಳು ಎರಡೂ ಪಕ್ಷಗಳ ಆರ್ಥಿಕ ಸ್ಥಿತಿ, ಮಕ್ಕಳ ಅಗತ್ಯತೆಗಳು, ವೃತ್ತಿ ತ್ಯಾಗ ಮುಂತಾದ ಅಂಶಗಳನ್ನು ಪರಿಗಣಿಸುತ್ತವೆ.
 )
Followನವದೆಹಲಿ (ಡಿ.12): ಪತ್ನಿ ಹಾಗೂ ಆಕೆಯ ಮನೆಯವರ ಕಿರುಕುಳಕ್ಕೆ ಬೇಸತ್ತು, 4 ವರ್ಷದ ಪುಟ್ಟ ಮಗನಿಗೆ ಗಿಫ್ಟ್‌ ಇಟ್ಟು, 20 ಪುಟಗಳ ಡೆತ್‌ ನೋಟ್‌ ಬರೆದು ಆತ್ಮಹತ್ಯೆಗೆ ಶರಣಾಗಿದ್ದ ಬೆಂಗಳೂರಿನ ಟೆಕ್ಕಿ ಉತ್ತರ ಭಾರತ ಮೂಲದ ಅತುಲ್‌ ಸುಭಾಷ್‌ ಸಾವು ದೇಶದಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಮಹಿಳೆಯರ ರಕ್ಷಣೆಗೆ ಇರುವ ಕಾನೂನುಗಳನ್ನು ಮಹಿಳೆಯರೇ ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಇದರಲ್ಲಿ ಬದಲಾವಣೆ ಆಗಬೇಕು ಎನ್ನುವ ಮಾತುಗಳು ಕೇಳಿ ಬಂದಿವೆ. ಈ ನಡುವೆ ಸುಪ್ರೀಂ ಕೋರ್ಟ್, ವಿಚ್ಛೇದನದ ಕೇಸ್‌ಗಳಲ್ಲಿ ಜೀವನಾಂಶ ಮೊತ್ತವನ್ನು ನಿರ್ಧಾರ ಮಾಡುವಾಗ ಎಂಟು ಅಂಶಗಳನ್ನು ಪರಿಗಣನೆ ಮಾಡಬೇಕು ಎಂದು ಸಲಹೆ ನೀಡಿದೆ. ವಿಚ್ಛೇದನ ಪ್ರಕರಣಗಳಲ್ಲಿ ಶಾಶ್ವತ ಜೀವನಾಂಶದ ಮೊತ್ತವನ್ನು ನಿರ್ಧರಿಸಲು ಸುಪ್ರೀಂ ಕೋರ್ಟ್ ಎಂಟು ಪ್ರಮುಖ ಮಾನದಂಡಗಳನ್ನು ಹಾಕಿದೆ. ಬೆಂಗಳೂರು ಮೂಲದ ಸಾಫ್ಟ್‌ವೇರ್ ಇಂಜಿನಿಯರ್ ಅವರ ಸಾವಿನಿಂದ ನಡೆಯುತ್ತಿರುವ ಚರ್ಚೆಗಳ ಮಧ್ಯೆ ಈ ನಿರ್ದೇಶನ ಬಂದಿದೆ.
ಪ್ರವೀಣ್ ಕುಮಾರ್ ಜೈನ್ ಮತ್ತು ಅಂಜು ಜೈನ್ ವಿಚ್ಛೇದನ ಪ್ರಕರಣದ ವಿಚಾರಣೆ ವೇಳೆ ನ್ಯಾಯಮೂರ್ತಿಗಳಾದ ವಿಕ್ರಮ್ ನಾಥ್ ಮತ್ತು ಪ್ರಸನ್ನ ಬಿ ವರಾಳೆ ಅವರನ್ನೊಳಗೊಂಡ ಎಸ್‌ಸಿ ಪೀಠವು ಪ್ರವೀಣ್ ಕುಮಾರ್ ಜೈನ್ ಅವರ ಪತ್ನಿಗೆ 5 ಕೋಟಿ ರೂಪಾಯಿ ಜೀವನಾಂಶ ನೀಡುವಂತೆ ಆದೇಶಿಸಿದೆ. ಮಂಗಳವಾರದ ತೀರ್ಪಿನಲ್ಲಿ ಜೀವನಾಂಶವನ್ನು ನಿರ್ಣಯಿಸಲು ನ್ಯಾಯಾಲಯವು ಎಂಟು ಅಂಶಗಳ ಮಾರ್ಗಸೂಚಿಯನ್ನು ವಿವರಿಸಿದೆ.
ಈ ಪ್ರಕರಣದಲ್ಲಿ, ಹಿಂದೂ ವಿವಾಹ ಕಾಯಿದೆಯ ವ್ಯಾಪ್ತಿಯ ಅಡಿಯಲ್ಲಿ ಮದುವೆಯು "ಸರಿ ಮಾಡಲಾಗದಂತೆ ಮುರಿದುಹೋಗಿದೆ" ಎಂದು ನ್ಯಾಯಾಲಯವು ಗಮನಿಸಿದೆ. ಪತ್ನಿಗೆ ಶಾಶ್ವತ ಜೀವನಾಂಶವನ್ನು ನಿರ್ಧರಿಸುವುದು ಪರಿಹಾರದ ಅಗತ್ಯವಿರುವ ಏಕೈಕ ಸಮಸ್ಯೆಯಾಗಿದೆ ಎಂದು ಹೇಳಿದೆ.
ಸುಪ್ರೀಂ ಕೋರ್ಟ್ ಸೂಚಿಸಿರುವ 8 ಅಂಶಗಳು
1. ಎರಡೂ ಕಡೆಯವರ ಸಾಮಾಜಿಕ ಮತ್ತು ಆರ್ಥಿಕ ಸ್ಥಿತಿ
2. ಹೆಂಡತಿ ಮತ್ತು ಅವಲಂಬಿತ ಮಕ್ಕಳ ಮೂಲಭೂತವಾದ ಅಗತ್ಯತೆಗಳು
3. ಎರಡೂ ಪಕ್ಷಗಳ ಅರ್ಹತೆಗಳು ಮತ್ತು ಉದ್ಯೋಗದ ಸ್ಥಿತಿ
4. ಅರ್ಜಿದಾರರ ಸ್ವತಂತ್ರ ಆದಾಯ ಅಥವಾ ಸ್ವತ್ತುಗಳು
5. ವಿವಾಹವಾಗಿರುವ ಮನೆಯಲ್ಲಿ ಹೆಂಡತಿ ಅನುಭವಿಸುತ್ತಿದ್ದ ಜೀವನ ಮಟ್ಟ
6. ಕುಟುಂಬದ ಜವಾಬ್ದಾರಿಗಳಿಗಾಗಿ ಸಂಗಾತಿಯಿಂದ ಮಾಡಿದ ವೃತ್ತಿ ತ್ಯಾಗ
7. ಹಾಗೇನಾದರೂ ಪತ್ನಿ ಯಾವುದೇ ಕೆಲಸದಲ್ಲಿ ಇಲ್ಲದೇ ಇದ್ದರೆ ಆಕೆಗೆ ಆಗುವ ಕೋರ್ಟ್‌ನ ವೆಚ್ಚಗಳು
8. ಗಂಡನ ಆರ್ಥಿಕ ಸಾಮರ್ಥ್ಯ, ಆದಾಯ ಮತ್ತು ಅಸ್ತಿತ್ವದಲ್ಲಿರುವ ಸಾಲಗಳು
ಇದೆಲ್ಲದರೊಂದಿಗೆ ಈ ಎಂಟು ಅಂಶಗಳು ಕಠಿಣ ನಿಯಮಗಳಲ್ಲ ಆದರೆ ಜೀವನಾಂಶವನ್ನು ನಿರ್ಧರಿಸಲು ಮಾರ್ಗಸೂಚಿಗಳಾಗಿ ಕಾರ್ಯನಿರ್ವಹಿಸುತ್ತವೆ ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.
ನಿರ್ಮಾಣ ಹಂತದ ಮನೆಯ 15 ಲಕ್ಷ ಮೌಲ್ಯದ ಸಾಮಗ್ರಿ ಕದ್ದು ಪಾನ್‌ ಶಾಪ್‌ನಲ್ಲಿ ಮಾರುತ್ತಿದ್ದ ಮಹಿಳೆ ಅರೆಸ್ಟ್‌!
ಪ್ರವೀಣ್ ಕುಮಾರ್ ಜೈನ್-ಅಂಜು ಜೈನ್ ವಿಚ್ಛೇದನ ಪ್ರಕರಣ: ಸುಪ್ರೀಂ ಕೋರ್ಟ್ ತನ್ನ ತೀರ್ಪಿನಲ್ಲಿ, ಪ್ರವೀಣ್ ಕುಮಾರ್ ಜೈನ್ ಅವರ ವಯಸ್ಕ ಮಗನ ಆರ್ಥಿಕ ಭದ್ರತೆಗಾಗಿ 1 ಕೋಟಿ ರೂಪಾಯಿ ಮೀಸಲಿಡುವಂತೆ ತಿಳಿಸಿದೆ. ದಂಪತಿಗಳು ಆರು ವರ್ಷಗಳ ಕಾಲ ಒಟ್ಟಿಗೆ ವಾಸಿಸುತ್ತಿದ್ದರು ಮತ್ತು ನಂತರದ ಎರಡು ದಶಕವನ್ನು ದೂರವಿದ್ದೇ ಕಳೆದಿದ್ದಾರೆ.ಸಾಮರಸ್ಯದ ಆರೋಪಗಳು ಮತ್ತು ಹಳಸಿದ ಸಂಬಂಧಗಳು ಅವರ ಮದುವೆಯನ್ನು ಹಾಳುಮಾಡಿದವು. ಅಂಜು ತನ್ನ ಕುಟುಂಬದ ಬಗ್ಗೆ ಅತಿಸೂಕ್ಷ್ಮ ಮತ್ತು ಅಸಡ್ಡೆ ಹೊಂದಿದ್ದಾಳೆ ಎಂದು ಪ್ರವೀಣ್ ಆರೋಪಿಸಿದರೆ, ಅಂಜು ತನ್ನೊಂದಿಗೆ ಪ್ರವೀಣ್ ವರ್ತನೆಯು ಸಮಸ್ಯಾತ್ಮಕವಾಗಿದೆ ಎಂದು ಆರೋಪಿಸಿದರು. ದೀರ್ಘಕಾಲ ಪ್ರತ್ಯೇಕವಾಗಿ ವಾಸವಿರುವ ಕಾರಣ ದಂಪತಿಗಳಿಗೆ ತಮ್ಮ ವೈವಾಹಿಕ ಜವಾಬ್ದಾರಿಗಳನ್ನು ಪೂರೈಸಲು ಯಾವುದೇ ಸ್ಥಳಾವಕಾಶವನ್ನು ನೀಡಲಿಲ್ಲ, ಸಂಬಂಧವು ಸಂಪೂರ್ಣವಾಗಿ ಮುರಿದುಹೋಗಿದೆ ಎಂದು ನ್ಯಾಯಾಲಯವು ತೀರ್ಮಾನಿಸಿತು. ನಿರ್ದಿಷ್ಟ ಆರ್ಥಿಕ ಪರಿಸ್ಥಿತಿಗಳೊಂದಿಗೆ ವಿಚ್ಛೇದನವನ್ನು ನೀಡಲಾಗಿದೆ.
Bengaluru : ಕರ್ನಾಟಕದಲ್ಲಿ ಗರಿಷ್ಠ ಆದಾಯ ತರುವ ಟೋಲ್‌ ಪ್ಲಾಜಾ ಇದು, ಒಂದೇ ವರ್ಷದಲ್ಲಿ 308 ಕೋಟಿ ಕಲೆಕ್ಷನ್‌!
