- Home
- Karnataka Districts
- ಬೆಂಗಳೂರಲ್ಲಿ ಉತ್ತರ ಪ್ರದೇಶ ಬೊಲೇರೋದಲ್ಲಿ ಬಂದು ಮಕ್ಕಳ ಕಳ್ಳತನ: ಈ ಬಗ್ಗೆ ಪೊಲೀಸರಿಗಿಲ್ಲ ಮಾಹಿತಿ, ಭಯ ಬೇಡ!
ಬೆಂಗಳೂರಲ್ಲಿ ಉತ್ತರ ಪ್ರದೇಶ ಬೊಲೇರೋದಲ್ಲಿ ಬಂದು ಮಕ್ಕಳ ಕಳ್ಳತನ: ಈ ಬಗ್ಗೆ ಪೊಲೀಸರಿಗಿಲ್ಲ ಮಾಹಿತಿ, ಭಯ ಬೇಡ!
ಬೆಂಗಳೂರಿನ ಬನಶಂಕರಿ ಬಡಾವಣೆಯಲ್ಲಿ ಉತ್ತರ ಪ್ರದೇಶ ನೋಂದಣಿಯ ಬಿಳಿ ಬೊಲೆರೋ ವಾಹನವೊಂದು ಮಕ್ಕಳನ್ನು ಅಪಹರಿಸಲು ಯತ್ನಿಸುತ್ತಿದೆ ಎಂಬ ವಿಡಿಯೋ ವೈರಲ್ ಆಗಿ ಆತಂಕ ಸೃಷ್ಟಿಸಿದೆ. ಶಾಲಾ ಬಾಲಕಿಯನ್ನು ಆಶೀರ್ವಾದದ ನೆಪದಲ್ಲಿ ಮಾತನಾಡಿಸಲು ಯತ್ನಿಸಿದ್ದು, ಮುಂದೇನಾಯ್ತು? ಪೊಲೀಸರ ಮಾಹಿತಿ ಇಲ್ಲಿದೆ.
ಬನಶಂಕರಿ ಬಡಾವಣೆಯಲ್ಲಿ ಮಕ್ಕಳ ಕಳ್ಳರ ಕಾರು
ಬೆಂಗಳೂರು (ಏ.03): ಬೆಂಗಳೂರಿನ ಬನಶಂಕರಿ ಬಡಾವಣೆ ಪ್ರದೇಶದಲ್ಲಿ ಕಳೆದ ಮೂರು ದಿನಗಳಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೋವೊಂದು ಸಾರ್ವಜನಿಕರಲ್ಲಿ ಭಾರೀ ಆತಂಕ ಮೂಡಿಸಿದೆ. ಉತ್ತರ ಪ್ರದೇಶ ನೋಂದಣಿ ಸಂಖ್ಯೆ ಹೊಂದಿರುವ ಬಿಳಿ ಬಣ್ಣದ ಬೊಲೆರೋ ವಾಹನವೊಂದು ಅನುಮಾನಾಸ್ಪದವಾಗಿ ಸಂಚರಿಸುತ್ತಿದ್ದು, ಮಕ್ಕಳನ್ನು ಅಪಹರಿಸುವ ಗ್ಯಾಂಗ್ ಇದಾಗಿರಬಹುದು ಎಂಬ ಆತಂಕ ವ್ಯಕ್ತವಾಗಿದೆ.
ವೈರಲ್ ವಿಡಿಯೋದಲ್ಲೇನಿದೆ?
ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವಿಡಿಯೋದಲ್ಲಿ, ಉತ್ತರ ಪ್ರದೇಶದ (UP) ನಂಬರ್ ಪ್ಲೇಟ್ ಹೊಂದಿರುವ ಬಿಳಿ ಬಣ್ಣದ ಬೊಲೆರೋ ವಾಹನವೊಂದು ಬನಶಂಕರಿ ರಸ್ತೆಯಲ್ಲಿ ಸಂಚರಿಸುವುದು ಕಂಡುಬಂದಿದೆ. ಶಾಲಾ ಬಾಲಕಿಯೊಬ್ಬಳು ರಸ್ತೆಯಲ್ಲಿ ನಡೆದುಕೊಂಡು ಹೋಗುತ್ತಿದ್ದಾಗ, ಈ ವಾಹನವು ಮನೆಯೊಂದರ ಗೇಟ್ ಬಳಿ ನಿಂತು, ಬಾಲಕಿಯನ್ನು ನೋಡಿ ವಾಹನವನ್ನು ರಿವರ್ಸ್ ತೆಗೆದುಕೊಂಡು ಹೋಗಿದೆ.
ವಾಹನದಲ್ಲಿದ್ದ ವ್ಯಕ್ತಿಗಳು ಬಾಲಕಿಯ ಜೊತೆ ಮಾತುಕತೆ ನಡೆಸಲು ಪ್ರಯತ್ನಿಸಿದ್ದಾರೆ ಎನ್ನಲಾಗಿದೆ. ಆಗ ಕಾರಿನಲ್ಲಿದ್ದವರು ಖಾವಿ ಬಟ್ಟೆಗಳನ್ನು ಧರಿಸಿದ್ದು, ಬಾಲಕಿಯನ್ನು ಬಾ ಇಲ್ಲಿ ಆಶಿರ್ವಾದ ಮಾಡ್ತೇವೆ ಎಂದು ಕರೆದಿದ್ದಾರೆ ಎಂದು ವೈರಲ್ ವಿಡಿಯೋದಲ್ಲಿ ಹೇಳಲಾಗುತ್ತಿದೆ.
ಗೇಟಿನ ಒಳಗೆ ಹೋಗಿ ಹಿರಿಯರನ್ನ ಕರೆದ ಬಾಲಕಿ
ಇನ್ನು ಬಾಲಕಿ ಕಾರಿನಲ್ಲಿದ್ದವರು ತನನ್ನ ಕರೆದ ವೇಳೆ ಏನೋ ಅಚಾತುರ್ಯ ನಡೆಯುತ್ತಿದೆ ಎಂದು ಅನುಮಾನಗೊಂಡು ತಕ್ಷಣ ತನ್ನ ಮನೆಯವರಿಗೆ ಮಾಹಿತಿ ನೀಡಿದ್ದಾಳೆ. ಮನೆಯವರು ಹೊರಬಂದು ವಾಹನದಲ್ಲಿದ್ದವರನ್ನು ವಿಚಾರಿಸಲು ಮುಂದಾದಾಗ, ಬೊಲೆರೋ ವಾಹನದಲ್ಲಿದ್ದವರು ತಕ್ಷಣ ಅಲ್ಲಿಂದ ಪರಾರಿಯಾಗಿದ್ದಾರೆ. ಈ ಇಡೀ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಈಗ ಎಲ್ಲೆಡೆ ಹರಿದಾಡುತ್ತಿದೆ. ಆಶೀರ್ವಾದ ಮಾಡುವ ನೆಪದಲ್ಲಿ ಅಥವಾ ವಿಳಾಸ ಕೇಳುವ ನೆಪದಲ್ಲಿ ಮಕ್ಕಳನ್ನು ಸೆಳೆಯಲು ಈ ಗ್ಯಾಂಗ್ ಯತ್ನಿಸುತ್ತಿದೆ ಎಂಬ ದೂರುಗಳು ಕೇಳಿಬರುತ್ತಿವೆ.
A video circulating on social media has raised concerns after allegedly showing suspicious individuals moving around in a Bolero vehicle in the Banashankari area of Bengaluru.
According to unverified claims, the occupants of the vehicle were attempting to lure young girls under… pic.twitter.com/aOH7O1nGf7— Hate Detector 🔍 (@HateDetectors) April 2, 2026
ಪೊಲೀಸರ ಸ್ಪಷ್ಟನೆ ಏನು?
ಈ ವೈರಲ್ ವಿಡಿಯೋ ಮತ್ತು ಸಾರ್ವಜನಿಕರ ಆತಂಕದ ಬಗ್ಗೆ ಬನಶಂಕರಿ ಪೊಲೀಸರು ತೀವ್ರ ನಿಗಾ ವಹಿಸಿದ್ದಾರೆ. ವಿಡಿಯೋದಲ್ಲಿರುವ ವಾಹನ ಮತ್ತು ವ್ಯಕ್ತಿಗಳ ಬಗ್ಗೆ ಪ್ರಾಥಮಿಕ ತನಿಖೆ ಆರಂಭಿಸಲಾಗಿದೆ. ಆದರೆ, ಈ ಬಗ್ಗೆ ಇದುವರೆಗೆ ಯಾವುದೇ ಅಧಿಕೃತ ದೂರು ದಾಖಲಾಗಿಲ್ಲ ಅಥವಾ ಯಾರೂ ನೇರವಾಗಿ ಪೊಲೀಸರಿಗೆ ಮಾಹಿತಿ ನೀಡಿಲ್ಲ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
'ನಾವು ವೈರಲ್ ವಿಡಿಯೋವನ್ನು ಪರಿಶೀಲಿಸುತ್ತಿದ್ದೇವೆ. ಆ ಪ್ರದೇಶದ ಸಿಸಿಟಿವಿ ದೃಶ್ಯಾವಳಿಗಳನ್ನು ಕೂಡ ಗಮನಿಸುತ್ತಿದ್ದೇವೆ. ಆದರೆ ಪ್ರಸ್ತುತ ಇದು ಊಹಾಪೋಹದ ಸುದ್ದಿಯಾಗಿಯೂ ಇರಬಹುದು. ಸಾರ್ವಜನಿಕರು ಭಯಪಡುವ ಅಗತ್ಯವಿಲ್ಲ, ಆದರೆ ಜಾಗರೂಕರಾಗಿರಬೇಕು. ಯಾವುದೇ ಅನುಮಾನಾಸ್ಪದ ವ್ಯಕ್ತಿಗಳು ಅಥವಾ ವಾಹನಗಳು ಕಂಡುಬಂದಲ್ಲಿ ಕೂಡಲೇ ಪೊಲೀಸ್ ನಿಯಂತ್ರಣ ಕೊಠಡಿಗೆ ಕರೆ ಮಾಡಿ ಮಾಹಿತಿ ನೀಡಿ' ಎಂದು ಪೊಲೀಸರು ಮನವಿ ಮಾಡಿದ್ದಾರೆ.
ಊಹಾಪೋಹಗಳಿಗೆ ಕಿವಿಗೊಡಬೇಡಿ:
ಸಾಮಾಜಿಕ ಜಾಲತಾಣಗಳಲ್ಲಿ ಹರಡುವ ಪ್ರತಿಯೊಂದು ಸುದ್ದಿಯೂ ಸತ್ಯವಾಗಿರುವುದಿಲ್ಲ. ಕೆಲವೊಮ್ಮೆ ಹಳೆಯ ವಿಡಿಯೋಗಳನ್ನು ಅಥವಾ ಬೇರೆ ಉದ್ದೇಶದ ವಿಡಿಯೋಗಳನ್ನು ಕಿಡ್ನ್ಯಾಪ್ ಗ್ಯಾಂಗ್ ಎಂದು ತಪ್ಪಾಗಿ ಬಿಂಬಿಸುವ ಸಾಧ್ಯತೆ ಇರುತ್ತದೆ. ಹೀಗಾಗಿ, ಅಧಿಕೃತ ಮಾಹಿತಿ ಸಿಗುವವರೆಗೆ ಸಾರ್ವಜನಿಕರು ಗಾಬರಿಯಾಗಬಾರದು ಎಂದು ವಿನಂತಿಸಲಾಗಿದೆ. ಆದರೂ, ಶಾಲಾ ಮಕ್ಕಳು ಮತ್ತು ಹೆಣ್ಣುಮಕ್ಕಳು ಅಪರಿಚಿತರೊಂದಿಗೆ ಮಾತನಾಡುವಾಗ ಅಥವಾ ಒಂಟಿಯಾಗಿ ಸಂಚರಿಸುವಾಗ ಎಚ್ಚರಿಕೆ ವಹಿಸುವುದು ಒಳಿತು.
