ಕಾಂಗ್ರೆಸ್‌ನ ಚಾಣಕ್ಯ ಇನ್ನಿಲ್ಲ, ಕುಟುಂಬಕ್ಕೆ ಬಿಟ್ಟು ಹೋದ್ರು ಇಷ್ಟು ಆಸ್ತಿ!
ಕಾಂಗ್ರೆಸ್ ಹಿರಿಯ ನಾಯಕ ಹಾಗೂ ಸೋನಿಯಾ ಗಾಂಧಿ ಸಲಹೆಗಾರರಾಗಿದ್ದ ಅಹ್ಮದ್ ಪಟೇಲ್ ಬುಧವಾರ ಮುಂಜಾನೆ ಬಹು ಅಂಗಾಂಗ ವೈಫಲ್ಯದಿಂದ ಕೊನೆಯುಸಿರೆಳೆದಿದ್ದಾರೆ. ಅವರಿಗೆ ಕಳೆದ ತಿಂಗಳು ಕೊರೋನಾ ಸೋಂಕು ತಗುಲಿರುವುದೂ ದೃಢಪಟ್ಟಿತ್ತು. ಹೀಗಾಗಿ ಅವರನ್ನು ಮೇದಾಂತ ಆಸ್ಪತ್ರೆಗೆ ಶಿಫ್ಟ್‌ ಮಾಡಲಾಗಿತ್ತು. ಅಹ್ಮದ್ ಪಟೇಲ್‌ರನ್ನು ಕಾಂಗ್ರೆಸ್‌ನ ಚಾಣಕ್ಯ ಎಂದೂ ಕರೆಯಲಾಗುತ್ತದೆ. ಅದರಲ್ಲೂ ವಿಶೇಷವಾಗಿ ರಾಜೀವ್ ಗಾಂಧಿ ಹತ್ಯೆ ಬಳಿಕ ಸೋನಿಯಾ ಗಾಂಧಿಯನ್ನು ರಾಜಕೀಯದಲ್ಲಿ ಬಲವಾಗಿ ಬೇರೂರುವಂತೆ ಮಾಡಿದ ಶ್ರೇಯಸ್ಸು ಇವರಿಗೇ ಸಲ್ಲುತ್ತದೆ.
ಅಹ್ಮದ್ ಪಟೇಲ್ ಗುಜರಾಥ್ ಕಾಂಗ್ರೆಸ್‌ನ ರಾಜ್ಯಸಭಾ ಸದಸ್ಯರಾಗಿದ್ದರು. ಅಲ್ಲದೇ ಅವರು ಕಾಂಗ್ರೆಸ್‌ನ ಖಜಾಂಜಿಯಾಗಿಯೂ ಕಾರ್ಯ ನಿರ್ವಹಿಸಿದ್ದರು. ಹಾಗಾದ್ರೆ ಅಹ್ಮದ್ ಪಟೇಲ್ ಬಳಿ ಇದ್ದ ಆಸ್ತಿ ಎಷ್ಟು? ಮುಂದಿದೆ ವಿವರ
myneta.info ಅನ್ವಯ ಅಹ್ಮದ್ ಪಟೇಲ್ ಆಸ್ತಿ 2011 ರಿಂದ 2017ವರೆಗೆ ಶೇ 23ರಷ್ಟು ಹೆಚ್ಚಳವಾಗಿತ್ತು. ಚುನಾವಣಾ ಆಯೋಗಕ್ಕೆ ನೀಡಿದ್ದ ಅಫಿಡವಿಟ್‌ನಲ್ಲಿ ಅಹ್ಮದ್ ಪಟೇಲ್ ತಮ್ಮ ವಾರ್ಷಿಕ ಆದಾಯ 15,10,147ರೂ. ಎಂದು ತಿಳಿಸಿದ್ದರು. ಇನ್ನು ಅವರ ಪತ್ನಿ ಮೈಮೂನಾರವರ ಆದಾಯ 20,15,900 ರೂ. ಎಂದು ತಿಳಿಸಿದ್ದರು. ಅಂದರೆ ಇಬ್ಬರ ಒಟ್ಟು ಆದಾಯ 35,26,047 ರೂ. ಆಗಿತ್ತು.
ಇನ್ನು ಆಸ್ತಿ ಏನೇನಿತ್ತು ಎಂದು ನೋಡುವುದಾದರೆ, ಅಹ್ಮದ್ ಪಟೇಲ್ ಬಳಿಕ 6,51,09,803 ರೂ. ಮೌಲ್ಯದ ಆಸ್ತಿ ಜಮೀನಿತ್ತು. ಅಲ್ಲದೇ ಅವರ ಬಳಿ ಒಂದು ಕೋಟಿಗೂ ಹೆಚ್ಚು ಮೊತ್ತ ಉಳಿತಾಯವಿತ್ತು.
ಹ್ಮದ್ ಪಟೇಲ್ 1949 ಆಗಸ್ಟ್ 21ರಂದು ಜನಿಸಿದ ಭರೂಚ್‌ನ ಪಿರಾಮಣ್ ಹಳ್ಳಿಯಲ್ಲಿ ಜನಿಸಿದ್ದರು. ಅವರು 1977 ರಿಂದ 1989 ವರೆಗೆ ಮೂರು ಬಾರಿ ಲೋಕಸಭಾ ಸಂಸದರಾಗಿ ಆಯ್ಕೆಯಾಗಿದ್ದರು. ಅಲ್ಲದೇ 1993ರಿಂದ 2020ರವರೆಗೆ ಐದು ಬಾರಿ ರಾಜ್ಯಸಭಾ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದಾರೆ.
ಅಹ್ಮದ್ ಪಟೇಲ್ 1977ರಲ್ಲಿ ಮೊದಲ ಬಾರಿ ಭರೂಚ್ ಕ್ಷೇತ್ರದಿಂದ ಮೊದಲ ಬಾರಿ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದರು. 28 ವರ್ಷದ ಅವರು ಅಂದು ಅವರು 62 ಸಾವಿರಕ್ಕೂ ಅಧಿಕ ಮತಗಳ ಅಂತರದಿಂದ ಗೆದ್ದಿದ್ದರು. ಇದಾದ ಬಳಿಕ ಅವರು ಅದೇ ಕ್ಷೇತ್ರದಿಂದ 1980 ಹಾಗೂ 1984 ರಲ್ಲೂ ಗೆದ್ದಿದ್ದಾರೆ.
ಅಹ್ಮದ್ ಪಟೇಲ್ 1986 ರಲ್ಲಿ ಗುಜರಾತ್ ಕಾಂಗ್ರೆಸ್‌ನ ಅಧ್ಯಕ್ಷರಾದರು. 1977 ರಿಂದ 1982ರವರೆಗೆ ಕಾಂಗ್ರೆಸ್ ಯೂತ್ ಕಮಿಟಿಯ ಅಧ್ಯಕ್ಷರಾಗಿಯೂ ಕಾರ್ಯ ನಿರ್ವಹಿಸಿದ್ದಾರೆ. 2001ರಿಂದ ಅವರು ಸೋನಿಯಾ ಗಾಂಧಿಯವರ ರಾಜಕೀಯ ಸಲಹೆಗಾರರಾಗಿದ್ದರು.
