ಗಂಡನ ಮೇಲಿನ ಹುಚ್ಚು ಪ್ರೀತಿಯಿಂದ 38ನೇ ವಯಸ್ಸಲ್ಲಿ ದುರಂತ ಅಂತ್ಯ ಕಂಡನಟಿ, ಈಕೆಯ ಜೀವನ ಪ್ರೀತಿಯೊಂದು ಪಾಠ!

ಜೀವನದಲ್ಲಿ ಹಣ, ಸಂಪತ್ತು, ಖ್ಯಾತಿ ಮತ್ತು ಉತ್ತಮ ಹೆಂಡತಿ ಎಲ್ಲವೂ ಆತನಿಗೆ ಸಿಕ್ಕಿತ್ತು, ಆದರೆ ತನ್ನ ಅಹಂ ಮತ್ತು ಸ್ವಾರ್ಥವು ಪ್ರಾಬಲ್ಯ ಸಾಧಿಸಿದಾಗ ಖ್ಯಾತ ನಟಿಯ ಜೀವನ ಟ್ರಾಜಿಡಿಯಾಗಿ ಬದಲಾಯಿತು. ನಾವಿಲ್ಲಿ ಹೇಳ್ತಾ ಇರೋದು ಹಿಂದಿ ಚಲನಚಿತ್ರೋದ್ಯಮಕ್ಕೆ ಒಂದು ಕಾಲದಲ್ಲಿ ಹಿಟ್ ಸಿನಿಮಾಗಳನ್ನು ನೀಡಿದ್ದ ಕಮಲ್ ಅಮ್ರೋಹಿ ಕುರಿತು. ಹಿಂದಿ ಚಿತ್ರ ರಂಗದ ಖ್ಯಾತ ನಟಿ ಟ್ರಾಜಿಡಿ ಕ್ವೀನ್ ಎಂದೇ ಜನಪ್ರಿಯತೆ ಗಳಿಸಿದ ಮೀನಾ ಕುಮಾರಿ (Meena Kumari) ಜೀವನ ನರಕಯಾತನೆಯಾಗಿ ಕೊನೆಗೊಳ್ಳೋದಕ್ಕೆ ಕಾರಣ ಅವರ ಪತಿ ಕಮಲ್ ಅಮ್ರೋಹಿ (Kamal Amrohi). ಇವರ ದಾಂಪತ್ಯ ಜೀವನ ನೋಡಿದ್ರೆ ಕಮಲ್ ಅಮ್ರೋಹಿಯಂತ ಗಂಡ ಯಾರಿಗೂ ಸಿಗಬಾರದು ಎನ್ನುವಿರಿ. 
 

15 ವರ್ಷಕ್ಕಿಂತ ಚಿಕ್ಕವಳಾದ ಮೀನಾ ಕುಮಾರಿ ಜೊತೆ ಮದುವೆ
ಕಮಲ್ ಅಮ್ರೋಹಿಗೆ ಈಗಾಗಲೇ ಮದುವೆಯಾಗಿ, ಮೂರು ಮಕ್ಕಳಿದ್ದರೂ, ತನಗಿಂತ 15 ವರ್ಷಕ್ಕಿಂತ ಚಿಕ್ಕವಳಾದ ಮೀನಾ ಕುಮಾರಿಯನ್ನು ಸೀಕ್ರೆಟ್ ಆಗಿ ಮದುವೆಯಾಗಿದ್ದರು. ನಂತರ ಪ್ರೀತಿಯ ಹೆಸರಲ್ಲಿ ಆಕೆಯ ಜೀವನವನ್ನು ನರಕವಾಗಿಸಿದರು. ಟಾಕ್ಸಿಕ್ ರಿಲೇಶನ್’ಶಿಪ್ (toxic relationship) ಅಂದ್ರೇನು ಅನ್ನೋದಕ್ಕೆ ಇದುವೆ ಬೆಸ್ಟ್ ಉದಾಹರಣೆ. ಇಂತಹ ಸಂಬಂಧದಲ್ಲಿ ನೀವೂ ಇದ್ರೆ, ಇವತ್ತೆ ಅಂತ ಸಂಬಂಧದಿಂದ ಹೊರ ಬನ್ನಿ. ಇಲ್ಲಾಂದ್ರೆ ನಿಮ್ಮ ಜೀವನವೂ ಮೀನಾ ಕುಮಾರಿ ಜೀವನದಂತೆ ಅಂತ್ಯವಾಗುತ್ತೆ. 

ಪ್ರೀತಿಯ ಹೆಸರಲ್ಲಿ ಮದುವೆ, ನಂತರ ಹೆಂಡತಿ ಕೈಗೊಂಬೆಯಾಗಿಸಿದ ಕಮಲ್
ಕಮಲ್ ಮನೆಯಲ್ಲಿಯೇ ಇರುವ ಮತ್ತು ತನ್ನನ್ನು ನೋಡಿಕೊಳ್ಳುವ ಹೆಂಡತಿಯನ್ನು ಬಯಸಿದ್ದರು. ಆದರೆ ಮೀನಾ ಕಮಲ್ ನಿರೀಕ್ಷೆಗಳಿಗೆ ತಕ್ಕಂತೆ ಬದುಕಲಿಲ್ಲ ಎಂಬುದು ಎಲ್ಲರಿಗೂ ತಿಳಿದಿದೆ. ಅವರು ಚಿಕ್ಕ ವಯಸ್ಸಿನಲ್ಲಿಯೇ ಉದ್ಯಮಕ್ಕೆ ಕಾಲಿಟ್ಟ ಪ್ರಸಿದ್ಧ ನಟಿ. ಮೀನಾ ಕುಮಾರಿಯನ್ನು ಹುಚ್ಚರಂತೆ ಪ್ರೀತಿಸುತ್ತಾ ನಂಬಿಕೆ ಗಳಿಸೋ ಮೂಲಕ ಮದುವೆಯಾದ ಕಮಲ್, ಮದುವೆಯ ನಂತರ ಅವಳ ಜೀವನವನ್ನು ನಿಯಂತ್ರಿಸಲು ಪ್ರಾರಂಭಿಸಿದ್ದ.

ಮೀನಾ ಕೆಲಸ ಮಾಡಲು ಬಯಸಿದ್ದರು, ಆದರದು ಕಮಲ್‌ಗೆ ಇಷ್ಟವಾಗಲಿಲ್ಲ. ಹೇಗೋ ಕೊನೆಗೆ ಒಪ್ಪಿ ಅನುಮತಿ ನೀಡಿದರು. ಆದರೆ ಷರತ್ತುಗಳಿದ್ದವು. ಸಂಜೆ 6.30 ರೊಳಗೆ ಮನೆಯಲ್ಲಿರಲೇಬೇಕು,  ತನ್ನ ಸ್ವಂತ ಕಾರಿನಲ್ಲಿ ಬರಬೇಕು ಮತ್ತು ತನ್ನ ಮೇಕಪ್ ಕೋಣೆಯಲ್ಲಿ ಯಾವ ಪುರುಷರಿಗೆ ಅವಕಾಶ ಕೊಡಬಾರದೆನ್ನುವುದೂ ಸೇರಿದ್ದವು.
 

ಮೊದಲು ಪ್ರೀತಿ ಹೆಸರಿನಲ್ಲಿ ಮದುವೆಯಾಗಿ, ನಂತ್ರ ಜೀವನವನ್ನ ನಿಯಂತ್ರಿಸಿ, ಗಂಡ ತನ್ನನ್ನು ಕೈಗೊಂಬೆಯನ್ನಾಗಿ ಮಾಡಿಕೊಂಡು ತನಗೆ ಬೇಕಾದಂತೆ ಆಡಿಸುವಾಗ ಯಾವ ಹುಡುಗಿ ತಾನೆ ಇದನ್ನೆಲ್ಲಾ ಸಹಿಸುವಳು. ಆದರೆ ಕಮಲ್ ನಾನು ಇದನ್ನೆಲ್ಲಾ ನಿನ್ನ ಒಳಿತಿಗಾಗಿ ಮಾಡ್ತಿದ್ದೇನೆ ಎಂದು ಹೇಳಿ ಕಂಟ್ರೋಲ್ ಮಾಡೋದನ್ನ ಮೀನಾ ಕುಮಾರಿ ಸಹಿಸಿಕೊಂಡರು. ಇದುವೇ ಅವರ ಅಂತ್ಯಕ್ಕೆ ಕಾರಣವಾಯ್ತು. 
 

ಮೀನಾ ಕುಮಾರಿ ಹಣ ಸಂಪಾದಿಸುತ್ತಿದ್ದರೂ, ಚಿಲ್ಲರೆ ಪೈಸೆಗಾಗಿ ಗಂಡನ ಮುಂದೆ ಕೈ ಚಾಚುತ್ತಿದ್ದರು
ಮದುವೆ ನಂತರ, ಮೀನಾ ಸಂಪಾದಿಸಿದ ಹಣವನ್ನು ಕಮಲ್ ತನ್ನ ಸುಪರ್ದಿಗೆ ತೆಗೆದುಕೊಂಡರು. ಅನ್ನು ಕಪೂರ್ ತಮ್ಮ ಟಾಕ್ ಶೋ ಒಂದರಲ್ಲಿ ಮೀನಾ ಕುಮಾರಿ ಜೀವನದ (life of Meena Kumari) ಬಗ್ಗೆ ಮಾತನಾಡುತ್ತಾ, ಒಂದು ಬಾರಿ ಮೀನಾ ಪತಿ ಬಳಿ ತನಗೆ ಮಸಾಜ್ ಮಾಡುವವಳ ಸಂಬಳದಲ್ಲಿ 2 ರೂಪಾಯಿ ಹೆಚ್ಚಿಸುವಂತೆ ಕೇಳಿದ್ದರಂತೆ, ಆದ್ರೆ ಕಮಲ್ ಜಗಳ ಮಾಡಿ ನಿನಗೆ ಮಸಾಜ್  ಅಗತ್ಯವೇ ಇಲ್ಲ ಎಂದಿದ್ದರಂತೆ.  ಸಿಕ್ಕಾಪಟ್ಟೆ ಜಗಳವಾಗಿ ಕೊನೆಗೆ ಕಮಲ್ ಮಸಾಜ್ ಮಾಡುವವಳನ್ನೇ ಕೆಲಸದಿಂದ ತೆಗೆದು ಹಾಕಿದರಂತೆ. ನೀವೇ ಹಣ ಸಂಪಾದಿಸುವಾಗ ಸಣ್ಣ ಮೊತ್ತದ ಹಣಕ್ಕಾಗಿ ನಿಮ್ಮ ಗಂಡನ ಕಡೆಗೆ ಕೈ ಚಾಚುವುದಕ್ಕಿಂತ ಹೆಚ್ಚು ಮುಜುಗರದ ಸಂಗತಿ ಇನ್ನೇನು ಇರುತ್ತೆ ಅಲ್ವಾ? ಇದು ಆತ್ಮಗೌರವವನ್ನು ಹತ್ತಿಕ್ಕುವ ಮಾರ್ಗ. ನಿಮ್ಮನ್ನ ಒಬ್ಬರು ಕಂಟ್ರೋಲ್ ಮಾಡಲು ಪ್ರಯತ್ನಿಸುತ್ತಿದ್ದರೆ, ಖಂಡಿತವಾಗಿಯೂ ಅವರು ನಿಮ್ಮನ್ನ ಪ್ರೀತಿಸುತ್ತಿಲ್ಲ ಅನ್ನೋದು ನೆನಪಿರಲಿ. 
 

ಹೆಂಡತಿಯ ಖ್ಯಾತಿಯಿಂದ ತನಗೆ ಅವಮಾನ
ಮೀನಾ ಮತ್ತು ಕಮಲ್ ಕಾರ್ಯಕ್ರಮವೊಂದಕ್ಕೆ ಆಗಮಿಸಿದಾಗ, ಸೊಹ್ರಾಬ್ ಮೋದಿ ಅವರನ್ನು ರಾಜ್ಯಪಾಲರಿಗೆ ಪರಿಚಯಿಸುತ್ತಾ 'ಇದು ಮೀನಾ ಕುಮಾರಿ ಮತ್ತವರ ಪತಿ' ಎಂದು ಹೇಳಿದರು. ಕಮಲ್ ಅದನ್ನು ಅವಮಾನವೆಂದು ಗುಡುಗಿದರು. ಆವಾಗ್ಲೇ ಅವರು, ನಾನು ಕಮಲ್ ಅಮ್ರೋಹಿ ಮತ್ತು ಇದು ನನ್ನ ಹೆಂಡತಿ ಮೀನಾ' ಎಂದು ಹೇಳಿದ್ದರಂತೆ. ಹೀಗೆ ಹೇಳಿ ಅವರು ಕಾರ್ಯಕ್ರಮದಿಂದ ಹೊರ ನಡೆದರು, ಇದರಿಂದ ಮೀನಾ ಮುಜುಗರದಿಂದ ತಲೆ ತಗ್ಗಿಸುವಂತಾಯಿತಂತೆ. ಒಬ್ಬ ಪುರುಷನು ಪುರುಷನಾಗಿರುವುದರ ಬಗ್ಗೆ ತುಂಬಾ ಅಹಂಕಾರ ಹೊಂದಿರುವಾಗ, ತನ್ನ ಹೆಂಡತಿಯ ಖ್ಯಾತಿ ಮತ್ತು ಯಶಸ್ಸು ಅವಮಾನ ಎಂದು ಭಾವಿಸಿದಾಗ, ಯಾವುದೇ ಮಹಿಳೆ ಅವನೊಂದಿಗಿರೋದು ಅಸಾಧ್ಯ. ಒಂದು ವೇಳೆ ನೀವು ಅಂತವರ ಜೊತೆ ವಾಸಿಸಿದ್ರೆ ನಿಮ್ಮ ಜೀವನವೂ ಮೀನ ಕುಮಾರಿಯಂತಾಗುತ್ತದೆ. .
 

ಗಂಡನಿಗಾಗಿ ಇನ್ನೊಬ್ಬನ ಜೊತೆ ಹಾಸಿಗೆ ಹಂಚಿಕೊಂಡ ಮೀನಾ
ಒಮ್ಮೆ ಕೋಪಗೊಂಡ ಕಮಲ್ ಮೀನಾಗೆ ಮೂರು ಬಾರಿ ತಲಾಕ್ (tripple talaq) ನೀಡಿದ್ದರಂತೆ. ನಂತರ ಅದಕ್ಕಾಗಿ ಅವರು ಪಶ್ಚಾತ್ತಾಪ ಪಟ್ಟು, ಮತ್ತೆ ಮದುವೆಗಾಗಿ ಪ್ರಪೋಸ್ ಮಾಡಿದ್ರಂತೆ. ಕಮಲ್ ಅವರನ್ನ ಹುಚ್ಚರಂತೆ ಪ್ರೀತಿಸುತ್ತಿದ್ದ ಮೀನಾ ಕೂಡ ಕಮಲ್ ಬಳಿ ಮರಳಲು ಬಯಸಿದ್ದಳು. ಹಾಗಾಗಿ ಇಸ್ಲಾಂ ಧರ್ಮದ ರೀತಿ ಪ್ರಕಾರ ಹಾಲಾಲಾ ಸಂಪ್ರದಾಯ ಪಾಲಿಸಬೇಕಾಗಿತ್ತಂತೆ. 

ಈ ಸಂಪ್ರದಾಯದ ಪ್ರಕಾರ ಮೀನಾ, ಜೀನತ್ ಅಮನ್ ಅವರ ತಂದೆ ಅಮನ್ ಉಲ್ಲಾ ಖಾನ್ ಅವರನ್ನು ವಿವಾಹವಾಗಿದ್ದರು ಎಂದು ಹೇಳಲಾಗಿದೆ. ಇಬ್ಬರೂ ವಿವಾಹವಾಗಿ, ಹಾಸಿಗೆ ಹಂಚಿಕೊಂಡ, ನಂತರ ಅವರಿಂದ ವಿಚ್ಚೇದನ ಪಡೆದು, ನಂತರವೇ  ಆಕೆ ಕಮಲ್ ಅವರನ್ನು ಮದುವೆಯಾಗಲು ಸಾಧ್ಯವಾಯಿತು. ಈ ಸಂಪ್ರದಾಯ ಮೀನಾಗೆ ದೊಡ್ಡ ಪೆಟ್ಟನ್ನೇ ನೀಡಿತ್ತು. ಆಕೆ ಇದಕ್ಕಾಗಿ ತನ್ನನ್ನು ತಾನು ವೇಶ್ಯೆ ಎಂದು ಕರೆದುಕೊಂಡಿದ್ದರಂತೆ. ಇದನ್ನ ಅವರ ಬಯೋಗ್ರಾಫಿಯಲ್ಲೂ (biography) ಬರೆಯಲಾಗಿದೆ. ಪ್ರೀತಿ ಹೆಸರ ಈ ರೀತಿ ಮಾಡುವ ಗಂಡನ ಜೊತೆ ಇರಬೇಕೆ? ನೀವೇ ಹೇಳಿ.
 

ತನ್ನ ಅಸಿಸ್ಟಂಟ್‌ನಿಂದಲೇ ಪೆಟ್ಟು ತಿಂದ ಮೀನಾ ಕುಮಾರಿ
ಮೀನಾ ಅವರ ಜೀವನವನ್ನು ನಿಯಂತ್ರಿಸುವ ಕಮಲ್ ಅಮ್ರೋಹಿ ಅವರ ಪ್ರಯತ್ನ ಎಷ್ಟೊಂದಿತ್ತು ಎಂದರೆ, ನಟಿಯ ಮೇಲೆ ಕಣ್ಣಿಡುವ ಕೆಲಸವನ್ನು ಅವರು ತಮ್ಮ ಸಹಾಯಕ ಬಕರ್ ಅಲಿಗೆ ನೀಡಿದರು. ಈ ಕಾರಣದಿಂದಾಗಿ, ಮೀನಾಗೆ ಸೆಟ್‌ನಲ್ಲಿ ಏನು ಮಾಡೋದಕ್ಕೂ ಕಷ್ಟವಾಗುತ್ತಿತ್ತಂತೆ. ಅಸಿಸ್ಟಂಟ್(assistant)  ಆಕೆಯನ್ನು ಎಷ್ಟರ ಮಟ್ಟಿಗೆ ನಿಯಂತ್ರಿಸುತ್ತಿದ್ದನೆಂದರೆ, ಅಸಮಾಧಾನಗೊಂಡ ನಟಿ ಸೆಟ್ ನಲ್ಲಿ ಅಳುತ್ತ ಕೂರುತ್ತಿದ್ದರಂತೆ. ಅಷ್ಟೇ ಅಲ್ಲ, ಒಮ್ಮೆ ಅಸಿಸ್ಟಂಟ್ ಮೀನಾ ಮೇಲೆ ಕೈ ಕೂಡ ಎತ್ತಿದ್ದರಂತೆ. ಆದರೆ ಕಮಲ್ ಇದಕ್ಕೆ ಏನೂ ಉತ್ತರ ನೀಡದಾಗ, ಕೊನೆಗೆ ಮೀನಾ ಕಮಲ್ ಅಮ್ರೋಹಿಯನ್ನು ಬಿಡೋದಕ್ಕೆ ನಿರ್ಧರಿಸಿದ್ದರು. 

ಕುಡತಕ್ಕೆ ದಾಸಳಾಗಿ ಜೀವವನ್ನೇ ಕಳೆದುಕೊಂಡ ಟ್ರಾಜಿಡಿ ಕ್ವೀನ್
ಗಂಡ ಮತ್ತು ಜೀವನ ಮೀನಾ ಕುಮಾರಿಗೆ ನುಂಗಲಾರದ ಪೆಟ್ಟು ನೀಡಿದ್ದವು, ತನ್ನ ನೋವನ್ನ ಮರೆಯೋದಕ್ಕೆ ಮೀನಾ ಕುಡಿತದ ದಾಸಿಯಾದರು. ಚನಲಚಿತ್ರಗಳಲ್ಲಿ ಆಕೆಯ ಒಲವು ಕಡಿಮೆಯಾಯಿತು, ಹಲವು ಬೇಡಿಕೆಯ ನಂತರ ಆಕೆ ನಟಿಸಿದ ಪಕೀಜಾ ಚಿತ್ರದ ಚಿತ್ರೀಕರಣ ಪೂರ್ಣಗೊಂಡಿತು, ಆದರೆ ಆಕೆಯ ಆರೋಗ್ಯ ತುಂಬಾನೆ ಹದಗೆಡುತ್ತಾ ಬರುತ್ತಿತ್ತು, ಹಾಗಾಗಿ ಬಾಡಿ ಡಬಲ್ ಅನ್ನು ಅನೇಕ ದೃಶ್ಯಗಳಲ್ಲಿ ಬಳಸಬೇಕಾಯಿತು. ಕೊನೆಗೆ, ಈ ಆಲ್ಕೋಹಾಲ್ ನಿಂದಾಗಿಯೇ ಲಿವರ್ ಸಮಸ್ಯೆಗೆ ಒಳಗಾಗಿ ನಟಿ ತಮ್ಮ 38ನೇ ವಯಸ್ಸಿನಲ್ಲಿ ಕರಿಯರ್ ನ ಉತ್ತುಂಗಲ್ಲಿರುವಾಗಲೇ ಸಾವನ್ನಪ್ಪಿ ಇವತ್ತಿಗೂ ಟ್ರಾಜಿಡಿ ಕ್ವೀನ್ (the tragedy queen) ಎಂದು ಜನಪ್ರಿಯತೆ ಪಡೆದಿದ್ದಾರೆ. 

ಮೀನಾ ಅವರ ಸಾವು ಸಹ ಇತರ ಹುಡುಗಿಯರಿಗೆ ಒಂದು ಪಾಠ. ಯಾಕಂದ್ರೆ ಪ್ರೀತಿ ಎಂದು ಹಿಂದೆ ಹಿಂದೆ ಹೋಗಿ, ಆತ ಟಾರ್ಚರ್ ಕೊಡುತ್ತಿದ್ದರೂ, ಮಾನಸಿಕ ಹಿಂಸೆ ಕೊಡುತ್ತಿದ್ದರೂ ಸಹಿಸಿಕೊಂಡು ಕುಳಿತರೆ ಮುಂದೊಂದು ದಿನ ನಿಮ್ಮ ಜೀವನ ಕೊನೆಯಾಗೋದು ಖಚಿತ. ಹಾಗಾಗಿ ಪ್ರೀತಿ ಹೆಸರಲ್ಲಿ ಮೋಸ ಹೋಗಬೇಡಿ ನೆನಪಿರಲಿ.