ನಯನತಾರಾ- ಧನುಷ್ ನಡುವೆ ಕ್ಲಾಷ್: ನಟನ ವಿರುದ್ಧ ನಟಿ ಬಳಸಿರುವ ಆ ಜರ್ಮನ್‌ ಪದದ ಅರ್ಥವೇನು?

ನಯನತಾರಾ ಅವರ ಮದುವೆ ಮತ್ತು ಜೀವನಕ್ಕೆ ಸಂಬಂಧಿಸಿದ ಡಾಕ್ಯುಮೆಂಟರಿ ನೆಟ್‌ಫ್ಲಿಕ್ಸ್‌ನಲ್ಲಿ ನವೆಂಬರ್ 18 ರಂದು ಬಿಡುಗಡೆಯಾಗಲಿದೆ. Nayanthara : Beyond the Fairytale ಎಂಬ ಹೆಸರಿನಲ್ಲಿ ತಯಾರಾಗಿರುವ ಈ ಡಾಕ್ಯುಮೆಂಟರಿಯನ್ನು ಬಿಡುಗಡೆ ಮಾಡಲು ಧನುಷ್ ಅಡ್ಡಿಪಡಿಸಿದ್ದಾರೆ ಎಂದು, ಅವರ ಮೇಲಿನ ವೈಯಕ್ತಿಕ ದ್ವೇಷದಿಂದ ಧನುಷ್ ಸೇಡು ತೀರಿಸಿಕೊಳ್ಳುವ ಕ್ರಮ ಕೈಗೊಂಡಿದ್ದಾರೆ ಎಂದು ನಟಿ ನಯನತಾರಾ ಬಹಿರಂಗವಾಗಿ ಆರೋಪಿಸಿದ್ದಾರೆ. 

ನಾನುಂ ರೌಡಿ ಧಾನ್ ಚಿತ್ರದ ದೃಶ್ಯಗಳನ್ನು ಬಳಸಿದ್ದಕ್ಕಾಗಿ 10 ಕೋಟಿ ಪರಿಹಾರ ಕೇಳಿ ಧನುಷ್ ನೋಟಿಸ್ ಕಳುಹಿಸಿರುವುದು ಅನಾಗರಿಕ ಕ್ರಮ ಎಂದೂ, ಎಷ್ಟೇ ದೊಡ್ಡ ನಟರಾಗಿದ್ದರೂ ತಮಿಳುನಾಡು ಜನರು ಈ ಅನಾಗರಿಕ ಕ್ರಮವನ್ನು ಒಪ್ಪುವುದಿಲ್ಲ ಎಂದೂ ನಯನತಾರಾ ಕಟುವಾಗಿ ಬರೆದಿದ್ದಾರೆ. ಅಭಿಮಾನಿಗಳ ಮುಂದೆ ನೀವು ತೋರಿಸಿಕೊಳ್ಳುವ ಮುಖ ಬೇರೆ, ನಿಮ್ಮ ನಿಜವಾದ ಮುಖ ಬೇರೆ ಎಂದೂ ಧನುಷ್‌ರನ್ನು ಟೀಕಿಸಿದ್ದಾರೆ. 

ಆ ಪತ್ರದ ಕೊನೆಯ ಪ್ಯಾರಾದಲ್ಲಿ, ಮುಂದಿನ ಸಂಗೀತ ಬಿಡುಗಡೆ ಸಮಾರಂಭದಲ್ಲಿ, ಇದ್ಯಾವುದೂ ನಡೆದಿಲ್ಲ ಎಂದು ನಿರಾಕರಿಸಿ ಕಾಲ್ಪನಿಕ ಕಥೆಗಳನ್ನು ಹೆಣೆದು, ಅದನ್ನೇ ನಿಜವೆಂದು ನೀವು ಹೇಳುವ ಸಾಧ್ಯತೆ ಹೆಚ್ಚು. ಆದರೆ, ಅದನ್ನು ದೇವರು ನೋಡುತ್ತಿದ್ದಾನೆ ಎಂಬುದನ್ನು ಮರೆಯಬೇಡಿ. 

ಈ ಸಂದರ್ಭದಲ್ಲಿ, ಜರ್ಮನ್ ಭಾಷೆಯ “Schadenfreude” ಎಂಬ ಪದವನ್ನು ನಿಮಗೆ ಪರಿಚಯಿಸುತ್ತೇನೆ, ಅದರ ಅರ್ಥ ತಿಳಿದುಕೊಂಡು ಇನ್ನು ಯಾರಿಗೂ ಅದನ್ನು ಮಾಡದಂತೆ ನೋಡಿಕೊಳ್ಳಿ ಎಂದು ನಯನತಾರಾ ಹೇಳಿದ್ದಾರೆ. ಹಿಂದೆ ನಿಮ್ಮೊಂದಿಗೆ ಪ್ರಯಾಣಿಸಿದವರ ಯಶಸ್ಸನ್ನು ಯಾವುದೇ ಕೋಪವಿಲ್ಲದೆ, ಶಾಂತಿಯಿಂದ ಸ್ವೀಕರಿಸಬೇಕೆಂದು ಕೇಳಿಕೊಳ್ಳುತ್ತೇನೆ ಎಂದು ನಯನತಾರಾ ತಮ್ಮ ಪತ್ರದಲ್ಲಿ ತಿಳಿಸಿದ್ದಾರೆ.

ಈಗ "Schadenfreude" ಎಂಬ ಪದದ ಅರ್ಥವನ್ನು ಅನೇಕರು ಇಂಟರ್ನೆಟ್‌ನಲ್ಲಿ ಪೋಸ್ಟ್ ಮಾಡುತ್ತಿದ್ದಾರೆ. ಅಂದರೆ ಇನ್ನೊಬ್ಬರ ದುಃಖವನ್ನು ನೋಡಿ ಒಬ್ಬರು ಸಂತೋಷಪಡುವುದು ಅಥವಾ ತೃಪ್ತಿಪಡುವುದು ಎಂಬುದೇ ಆ ಜರ್ಮನ್ ಪದದ ಅರ್ಥ.