ಸೂಪರ್‌ ಕಪ್‌ ಫುಟ್ಬಾಲ್ ಟೂರ್ನಿಗೆ ಇಂದು ಚಾಲನೆ; BFC ಸೇರಿ 16 ತಂಡಗಳು ಭಾಗಿ
ಸೂಪರ್‌ ಕಪ್‌ ಫುಟ್ಬಾಲ್ ಟೂರ್ನಿ ಇಂದಿನಿಂದ ಆರಂಭ
3ನೇ ಆವೃತ್ತಿಯ ಟೂರ್ನಿಗೆ ಕೇರಳದ ಮಂಜೇರಿ ಹಾಗೂ ಕಲ್ಲಿಕೋಟೆ ಆತಿಥ್ಯ
ಬೆಂಗಳೂರು ಎಫ್‌ಸಿ ಸೇರಿದಂತೆ 16 ತಂಡಗಳು ಸ್ಪರ್ಧೆ
ಮಂಜೇರಿ(ಏ.08): 4 ವರ್ಷಗಳ ಬಳಿಕ ಮತ್ತೊಮ್ಮೆ ಸೂಪರ್‌ ಕಪ್‌ ಫುಟ್ಬಾಲ್ ಟೂರ್ನಿ ಶನಿವಾರದಿಂದ ಆರಂಭಗೊಳ್ಳಲಿದ್ದು, ಮಾಜಿ ಚಾಂಪಿಯನ್‌ ಬೆಂಗಳೂರು ಎಫ್‌ಸಿ ಸೇರಿದಂತೆ 16 ತಂಡಗಳು ಸ್ಪರ್ಧಿಸಲಿದೆ. 3ನೇ ಆವೃತ್ತಿಯ ಟೂರ್ನಿಗೆ ಕೇರಳದ ಮಂಜೇರಿ ಹಾಗೂ ಕಲ್ಲಿಕೋಟೆ ಆತಿಥ್ಯ ವಹಿಸಲಿವೆ.
ಟೂರ್ನಿಯಲ್ಲಿ ಐಎಸ್‌ಎಲ್‌ನ 11, ಐ-ಲೀಗ್‌ನ 5 ತಂಡಗಳು ಭಾಗಿಯಾಗಲಿದ್ದು, ತಲಾ 4 ತಂಡಗಳ 4 ಗುಂಪುಗಳನ್ನಾಗಿ ವಿಂಗಡಿಸಲಾಗಿದೆ. ಪ್ರತಿ ಗುಂಪಿನಲ್ಲಿ ಅಗ್ರಸ್ಥಾನ ಪಡೆಯುವ ತಂಡ ಸೆಮಿಫೈನಲ್‌ ಪ್ರವೇಶಿಲಿದೆ. ಫೈನಲ್‌ ಪಂದ್ಯ ಏಪ್ರಿಲ್‌ 25ರಂದು ನಡೆಯಲಿದೆ. ಬಿಎಫ್‌ಸಿ ತಂಡ ‘ಎ’ ಗುಂಪಿನಲ್ಲಿ ಸ್ಥಾನ ಗಿಟ್ಟಿಸಿಕೊಂಡಿದ್ದು, ಆರಂಭಿಕ ಪಂದ್ಯದಲ್ಲಿ ಶನಿವಾರ ಶ್ರೀನಿಧಿ ಡೆಕ್ಕನ್‌ ಜೊತೆ ಸೆಣಸಾಡಲಿದೆ. ಬಳಿಕ ಏ.12ಕ್ಕೆ ರೌಂಡ್‌ಗ್ಲಾಸ್‌ ಪಂಜಾಬ್‌ ಎಫ್‌ಸಿ, ಏಪ್ರಿಲ್‌ 16ರಂದು ಸಾಂಪ್ರದಾಯಿಕ ಬದ್ಧವೈರಿ ಕೇರಳ ಬ್ಲಾಸ್ಟರ್ಸ್‌ ವಿರುದ್ಧ ಆಡಲಿದೆ.
ಪಂದ್ಯ: ಸಂಜೆ 5ಕ್ಕೆ
ಪ್ರಸಾರ: ಸೋನಿ ಸ್ಪೋರ್ಟ್ಸ್‌/ಫ್ಯಾನ್‌ಕೋಡ್‌ ಆ್ಯಪ್‌
‘ಚಾಂಪಿಯನ್ಸ್‌’ ಜೆರ್ಸಿಯನ್ನು ಬಡ ಮಕ್ಕಳಿಗೆ ಕೊಟ್ಟ ಬಿಎಫ್‌ಸಿ!
ಬೆಂಗಳೂರು: ಐಎಸ್‌ಎಲ್‌ ಫೈನಲಲ್ಲಿ ತಂಡ ಗೆದ್ದರೆ ಆಟಗಾರರು ಧರಿಸಲು ಬೆಂಗಳೂರು ಎಫ್‌ಸಿ ತಂಡ ತಯಾರಿಸಿದ್ದ ‘ಚಾಂಪಿಯನ್ಸ್‌’ ಜೆರ್ಸಿಯನ್ನು ಫ್ರಾಂಚೈಸಿಯು ವ್ಯರ್ಥ ಮಾಡದೆ ಬಡ ಮಕ್ಕಳಿಗೆ ವಿತರಿಸಿದ್ದು, ಸಾಮಾಜಿಕ ತಾಣಗಳಲ್ಲಿ ಅಭಿಮಾನಿಗಳ ಮೆಚ್ಚುಗೆಗೆ ಪಾತ್ರವಾಗಿದೆ. ಶುಕ್ರವಾರ ನಗರದ ಕೆಲ ಬಡ ಮಕ್ಕಳಿಗೆ ತಂಡದ ನಾಯಕ ಸುನಿಲ್‌ ಚೆಟ್ರಿ, ಗೋಲ್‌ಕೀಪರ್‌ ಗುರ್ಪ್ರೀತ್ ಜೆರ್ಸಿ ವಿತರಿಸಿದರು.
Appachettolanda Hockey Festival: ಕುಲ್ಲೇಟಿರ, ಕುಪ್ಪಂಡ ಫೈನಲ್‌ಗೆ ಲಗ್ಗೆ
ಉಳಿದ ಜೆರ್ಸಿಗಳನ್ನು ಬೆಂಗಳೂರಿನಾದ್ಯಂತ ವಿವಿಧ ಆಸ್ಪತ್ರೆ, ವೃದ್ಧಾಶ್ರಮ, ಅನಾಥಾಶ್ರಮಗಳಿಗೂ ಬಿಎಫ್‌ಸಿ ವಿತರಿಸಲಿದೆ. ಸುಮಾರು 150ರಷ್ಟು ಜೆರ್ಸಿಯನ್ನು ಐಎಸ್‌ಎಲ್‌ ಫೈನಲ್‌ಗೂ ಮುನ್ನ ಬಿಎಫ್‌ಸಿ ಸಿದ್ಧಗೊಳಿಸಿತ್ತು. ಆದರೆ ತಂಡ ಫೈನಲ್‌ನಲ್ಲಿ ಎಟಿಕೆಗೆ ಶರಣಾಗಿತ್ತು.
ಬ್ಯಾಡ್ಮಿಂಟನ್‌: ಸೆಮೀಸ್‌ಗೇರಿದ ಭಾರತದ ಪ್ರಿಯಾನ್ಶು
ಆಲಿರ್ಯಾನ್ಸ್‌: ಭಾರತದ ಯುವ ಶಟ್ಲರ್‌ ಪ್ರಿಯಾನ್ಶು ರಾಜಾವತ್ ಆರ್ಲಿಯಾನ್ಸ್‌ ಮಾಸ್ಟರ್ಸ್‌ ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಸೆಮಿಫೈನಲ್‌ಗೆ ಲಗ್ಗೆ ಇಟ್ಟಿದ್ದಾರೆ. ವಿಶ್ವ ರ‍್ಯಾಂಕಿಂಗ್‌‌ನಲ್ಲಿ 58ನೇ ಸ್ಥಾನದಲ್ಲಿರುವ 21 ವರ್ಷದ ಪ್ರಿಯಾನ್ಶು, ಶುಕ್ರವಾರ ಪುರುಷರ ಸಿಂಗಲ್ಸ್‌ ಕ್ವಾರ್ಟರ್ ಫೈನಲ್‌ನಲ್ಲಿ ಚೈನೀಸ್ ತೈಪೆಯ ಚಿ ಯು ಡೆನ್ ವಿರುದ್ದ 21-18, 21-18 ನೇರ ಗೇಮ್‌ಗಳಲ್ಲಿ ಜಯಭೇರಿ ಬಾರಿಸಿದರು. ಸೆಮೀಸ್‌ನಲ್ಲಿ ಅವರು ಶನಿವಾರ ಐರ್ಲೆಂಡ್‌ನ ನಾಟ್‌ ನ್ಯುಯೆನ್‌ ವಿರುದ್ದ ಸೆಣಸಾಡಲಿದ್ದಾರೆ.
ಭಾರತ ಹಾಕಿ ತಂಡಗಳಿಗೆ ಹೆಚ್ಚುವರಿ ಕೋಚ್ ನೇಮಕ
ನವದೆಹಲಿ: ಏಷ್ಯನ್‌ ಗೇಮ್ಸ್‌ಗೂ ಮುನ್ನ ಭಾರತ ಹಾಕಿ ತಂಡಗಳಿಗೆ ಹಾಕಿ ಇಂಡಿಯಾ ಹೆಚ್ಚುವರಿ ಕೋಚ್‌ಗಳನ್ನು ನೇಮಿಸಿದೆ. ಮಹಿಳಾ ತಂಡದ ವಿಶ್ಲೇಷಣಾತ್ಮಕ ಕೋಚ್ ಆಗಿ ಆಸ್ಟ್ರೇಲಿಯಾದ ಆಂಥೋನಿ ಫ್ಯಾರ್ರಿ, ಪುರುಷರ ತಂಡಕ್ಕೆ ದಕ್ಷಿಣ ಆಫ್ರಿಕಾದ ರೆಡ್ ಹಾಲೈಟ್‌ ನೇಮಕವಾಗಿದ್ದಾರೆ.
