ಬೆಂಗಳೂರಿನ ಇತಿ ಆಚಾರ್ಯ ಪಂಜಾಬಿ ಕತಿ!
ಬೆಂಗಳೂರಿನ ಹುಡುಗಿ ಇತಿ ಆಚಾರ್ಯ ಕನ್ನಡದ ಜತೆಗೆ ಆಗಾಗ ಹಿಂದಿ, ತೆಲುಗು, ತಮಿಳಿಗೆ ಹೋಗು ಬರುವ ನಟಿ. ಈಗ ಈಕೆ ನಟನೆಯ ‘ಕವಚ’ ಸಿನಿಮಾ ತೆರೆಗೆ ಬರುತ್ತಿದೆ. ಈಗಾಲೇ ಒಂದಿಷ್ಟುಕನ್ನಡ ಚಿತ್ರಗಳಲ್ಲಿ ನಟಿಸಿರುವ ಇತಿ ಆಚಾರ್ಯ ಅವರು ಶಿವಣ್ಣ ಜತೆ ನಟಿಸಿದ ಅನುಭವ ಹಂಚಿಕೊಂಡಿದ್ದಾರೆ.
ಕೊನೆಗೂ ಒಂದು ದೊಡ್ಡ ಸಿನಿಮಾ ಮೂಲಕ ಪ್ರೇಕ್ಷಕರ ಮುಂದೆ ಬರುತ್ತಿದ್ದೀರಿ?
ಹೌದು. ಇದು ನನ್ನ ಕನಸಿನ ಸಿನಿಮಾ. ಇಲ್ಲಿಯವರೆಗೂ ಕನ್ನಡದಲ್ಲಿ ನಾಲ್ಕೈದು ಚಿತ್ರಗಳಲ್ಲಿ ನಟಿಸಿದ್ದೇನೆ. ಈಗ ‘ಕವಚ ನನ್ನ ಕೆರಿಯರ್ನಲ್ಲೇ ದೊಡ್ಡ ಸಿನಿಮಾ ಆಗಲಿದೆ ಎನ್ನುವ ಭರವಸೆ ಇದೆ. ಅದಕ್ಕೆ ಕಾರಣ ಇದು ಶಿವಣ್ಣ ನಾಯಕನಾಗಿ ನಟಿಸಿರುವ ಬ್ಯೂಟಿಫುಲ್ ಕಂಟೆಂಟ್ ಇರುವ ಸಿನಿಮಾ.
ಶಿವಣ್ಣ ಜತೆ ನಟಿಸಿದ ಅನುಭವ ಹೇಗಿತ್ತು?
ಮೊದಲ ಬಾರಿಗೆ ಅವರ ಜತೆ ಕಾಣಿಸಿಕೊಂಡಿದ್ದು. ಸ್ಟಾರ್ ನಟ. ಆದರೆ, ಸಿಂಪಲ್ ಮ್ಯಾನ್. ಇದೇ ನಾನು ಶಿವಣ್ಣ ಅವರಲ್ಲಿ ಕಂಡುಕೊಂಡಿದ್ದು. ಹೊಸ ಕಲಾವಿದರಿಗೆ ಸೆಟ್ನಲ್ಲಿ ತುಂಬಾ ಸಲಹೆಗಳನ್ನು ನೀಡುತ್ತಿದ್ದರು. ಒಬ್ಬ ಹೀರೋ ಜತೆ ನಟಿಸಿದ್ದೇನೆ ಎನ್ನುವುದಕ್ಕಿಂತ ಒಬ್ಬ ಅದ್ಭುತ ಕಲಾವಿದ ಜತೆ ಅಭಿನಯಿಸಿರುವ ಖುಷಿ ಇದೆ. ‘ಕವಚ’ ಚಿತ್ರದ ಮೂಲಕ ನಾನು ದೊಡ್ಡ ಕಲಾವಿದರ ಜತೆಗೆ ತೆರೆ ಹಂಚಿಕೊಂಡಿದ್ದು ನನ್ನ ಅದೃಷ್ಟ. ಅಲ್ಲದೆ ಸೆಂಚುರಿ ಸ್ಟಾರ್ ಜತೆ ನಟಿಸುವ ಪಾತ್ರ ಎಂದಾಗ ನಾನು ಹಿಂದೆ ಮುಂದೆ ನೋಡದೆ ಒಪ್ಪಿಕೊಂಡೆ.
ಸರಿ, ಈ ಚಿತ್ರದಲ್ಲಿ ನಿಮ್ಮ ಪಾತ್ರವೇನು?
ಇದು ಜಿ ವಿ ಆರ್ ವಾಸು ನಿರ್ದೇಶನದ ಸಿನಿಮಾ. ನಾನು ಇಲ್ಲಿ ಪಂಜಾಬಿ ಹುಡುಗಿ ಪಾತ್ರದಲ್ಲಿ ಕಾಣಿಸಿಕೊಂಡಿರುವೆ. ತುಂಬಾ ಮಾಡರ್ನ್ ಹುಡುಗಿ. ಈ ಜನರೇಷನ್ ಹುಡುಗಿಯರ ಸಂಚಲ ಮನಸ್ಸುಗಳನ್ನು ಪ್ರತಿನಿಧಿಸುವ ಪಾತ್ರ ನನ್ನದು. ಪ್ರತಿಯೊಬ್ಬರಿಗೂ ಇದು ಕನೆಕ್ಟ್ ಆಗುತ್ತದೆ.
ನೀವು ಮೂಲ ಚಿತ್ರ ನೋಡಿದ್ದೀರಾ? ಅಲ್ಲಿಗೂ ಇಲ್ಲಿಗೂ ಏನು ಬದಲಾವಣೆ?
ನೋಡಿದ್ದೇನೆ. ಮಲಯಾಳಂ ‘ಒಪ್ಪಂ’ ಚಿತ್ರದ ಕತೆ ಕನ್ನಡ ಪ್ರೇಕ್ಷಕರಿಗೂ ಖಂಡಿತ ಇಷ್ಟವಾಗುತ್ತದೆ. ಆ ಕಾರಣಕ್ಕೆ ಅದನ್ನು ಇಲ್ಲಿ ರೀಮೇಕ್ ಮಾಡಲಾಗುತ್ತಿದೆ. ಒಳ್ಳೆಯ ಸಿನಿಮಾ. ಕತೆಯಲ್ಲಿ ಯಾವುದೇ ರೀತಿಯ ಬದಲಾವಣೆ ಇಲ್ಲ. ಕನ್ನಡಕ್ಕೆ ತಕ್ಕಂತೆ ಪಾತ್ರಗಳನ್ನು ನಿರ್ದೇಶಕರು ಸಂಯೋಜನೆ ಮಾಡಿದ್ದಾರೆ. ಸಸ್ಪೆನ್ಸ್ ಜತೆ ಥ್ರಿಲ್ಲರ್ ಇರುವ ಒಂದು ಕ್ರೈಮ್ ಕತೆ.
ಈ ಚಿತ್ರದ ಮೇಲೆ ನಿಮಗಿರುವ ನಿರೀಕ್ಷೆಗಳೇನು?
ಕವಚ ಸಿನಿಮಾ ತೆರೆಗೆ ಬಂದ ಮೇಲೆ ಕನ್ನಡದಲ್ಲಿ ನನಗೆ ಹೆಚ್ಚು ಅವಕಾಶಗಳು ಸಿಗಲಿವೆ. ಯಾಕೆಂದರೆ ನನ್ನ ಪಾತ್ರ ಅಷ್ಟುಚೆನ್ನಾಗಿದೆ. ಆ ನಂಬಿಕೆಯಲ್ಲೇ ಸಿನಿಮಾ ಬಿಡುಗಡೆಯ ದಿನವನ್ನು ಎದುರು ನೋಡುತ್ತಿದ್ದೇನೆ.
ಕನ್ನಡದಲ್ಲಿ ನೀವು ನಟಿಸಿದ ಸಿನಿಮಾಗಳು ಯಾವುವು?
‘ಧ್ವನಿ’ ಹಾಗೂ ‘ಡೀಲ್ ರಾಜ’ ಸಿನಿಮಾಗಳು. ಮೊದಲನೇ ಚಿತ್ರಕ್ಕೆ ಚಿತ್ರೋತ್ಸವಗಳಲ್ಲಿ ಒಳ್ಳೆಯ ಪ್ರಶಂಸೆ ಸಿಕ್ಕಿತು. ಕಮರ್ಷಿಯಲ್ಲಾಗಿಯೂ ಬಿಡುಗಡೆ ಆಯಿತು. ಇನ್ನೂ ಕೋಮಲ್ ಜತೆ ನಟಿಸಿದ ‘ಡೀಲ್ ರಾಜ’ ಸಿನಿಮಾ ಪ್ರೇಕ್ಷಕರಿಗೆ ನನ್ನ ಕಮರ್ಷಿಯಲ್ಲಾಗಿ ಪರಿಚಯ ಮಾಡಿಸಿತು. ಈಗ ರಾಧಿಕಾ ಕುಮಾರಸ್ವಾಮಿ ಹಾಗೂ ಜೆ ಡಿ ಚಕ್ರವರ್ತಿ ಕಾಂಬಿನೇಷನ್ನಲ್ಲಿ ಬರುತ್ತಿರುವ ‘ಕಾಂಟ್ರಾಕ್ಟ್’ ಚಿತ್ರದಲ್ಲಿ ನಟಿಸುತ್ತಿದ್ದೇನೆ. ಇದು ಬಹು ಭಾಷೆಯಲ್ಲಿ ತಯಾರಾಗುತ್ತಿರುವ ಸಿನಿಮಾ.
ಬೇರೆ ಭಾಷೆಯಲ್ಲೂ ನಟಿಸುತ್ತಿದ್ದೀರಲ್ಲ?
ಹೌದು, ಈಗಷ್ಟೆಒಂದು ತೆಲುಗು ಸಿನಿಮಾ ಒಪ್ಪಿಕೊಂಡು ಶೂಟಿಂಗ್ನಲ್ಲಿ ತೊಡಗಿಸಿಕೊಂಡಿದ್ದೇನೆ. ಮೆಗಸ್ಟಾರ್ ಚಿರಂಜೀವಿ ಅವರ ಸಂಬಂಧಿ ಅಲ್ಲೂ ವಂಶಿ ನಾಯಕನಾಗಿ ನಟಿಸುತ್ತಿರುವ ಚಿತ್ರ. ಹೆಸರು ‘ಲಕನ್ ಎಂಬುದು. ಹಾರರ್ ಕಾಮಿಡಿ ಸಿನಿಮಾ. ಇದರ ನಡುವೆ ತಮಿಳಿನ ಆಲ್ಬಂ ಸಾಂಗ್ ಹೆಜ್ಜೆ ಹಾಕಿದ್ದೇನೆ. ಇನ್ನೂ ‘ಮಿಯಾ ಮೋರ್’ ಎನ್ನುವ ಇಂಗ್ಲಿಷ್ ಕಿರು ಚಿತ್ರ ಮಾಡಿದ್ದೇನೆ. ಇದನ್ನ ಕನ್ನಡಕ್ಕೂ ಡಬ್ ಮಾಡುವ ಯೋಚನೆ ಇದೆ. ಮನುಷ್ಯರು ಮತ್ತು ಪರಿಸರದ ಸಂಬಂಧದ ಕತೆ ಇರುವ ಚಿತ್ರವಿದು.