ಅಪ್ಪನ ಹಾದಿಯಲ್ಲಿಯೇ ಮಗ ಚಂದ್ರಪಾಲ್, ದ್ವಿಶತಕ ಸಾಧನೆ ಮಾಡಿದ ಜಗತ್ತಿನ ಏಕೈಕ ತಂದೆ-ಮಗನ ಜೋಡಿ
ಜಿಂಬಾವ್ವೆ ಎದುರು ದ್ವಿಶತಕ ಚಚ್ಚಿದ ತೇಜನಾರಾಯಣ ಚಂದ್ರಪಾಲ್
ತಂದೆ ಶಿವನಾರಾಯಣ ಚಂದ್ರಪಾಲ್ ಹಾದಿಯಲ್ಲಿ ತೇಜನಾರಾಯಣ ಚಂದ್ರಪಾಲ್
ಟೆಸ್ಟ್ ಕ್ರಿಕೆಟ್ನಲ್ಲಿ ದ್ವಿಶತಕ ಸಿಡಿಸಿದ ಜಗತ್ತಿನ ಮೊದಲ ಅಪ್ಪ-ಮಗನ ಜೋಡಿ
ಬುಲವಾಯೊ(ಫೆ.07): ವೆಸ್ಟ್ ಇಂಡೀಸ್ ದಿಗ್ಗಜ ಕ್ರಿಕೆಟಿಗ ಶಿವನಾರಾಯಣ ಚಂದ್ರಪಾಲ್ ಅವರ ಹಾದಿಯಲ್ಲಿಯೇ ಮಗ ತೇಜನಾರಾಯಣ ಚಂದ್ರಪಾಲ್ ಸಾಗುತ್ತಿದ್ದಾರೆ. ಇದೀಗ ಜಿಂಬಾಬ್ವೆ ಎದುರಿನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಅಜೇಯ ದ್ವಿಶತಕ ಸಿಡಿಸುವ ಮೂಲಕ ತಮ್ಮ ತಂದೆಯಂತೆ ಮಗ ಕೂಡಾ ಟೆಸ್ಟ್ ಕ್ರಿಕೆಟ್ನಲ್ಲಿ ದ್ವಿಶತಕ ಬಾರಿಸಿದ ಸಾಧನೆ ಮಾಡಿದ್ದಾರೆ. ಈ ಮೂಲಕ ಟೆಸ್ಟ್ ಕ್ರಿಕೆಟ್ನಲ್ಲಿ ದ್ವಿಶತಕ ಸಿಡಿಸಿದ ಜಗತ್ತಿನ ಮೊದಲ ಹಾಗೂ ಏಕೈಕ ಅಪ್ಪ-ಮಗನ ಜೋಡಿ ಎನ್ನುವ ಹಿರಿಮೆಗೆ ಪಾತ್ರರಾಗಿದ್ದಾರೆ.
ವೆಸ್ಟ್ಇಂಡೀಸ್ನ ಆರಂಭಿಕ ಜೋಡಿ ಕ್ರೇಗ್ ಬ್ರಾಥ್ವೇಟ್ ಹಾಗೂ ತೇಜನಾರಾಯಾಣ ಚಂದ್ರಪಾಲ್ ಜಿಂಬಾಬ್ವೆ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಮೊದಲ ವಿಕೆಟ್ಗೆ 100ಕ್ಕೂ ಹೆಚ್ಚು ಓವರ್ ಬ್ಯಾಟ್ ಮಾಡಿದ್ದು, ಈ ಸಾಧನೆ ಮಾಡಿದ ವಿಶ್ವದ ಕೇವಲ 2ನೇ ಜೋಡಿ ಎನಿಸಿಕೊಂಡಿದೆ.
ಮಳೆ ಪೀಡಿತ ಪಂದ್ಯದಲ್ಲಿ 3ನೇ ದಿನವೂ ಬ್ಯಾಟ್ ಮಾಡಿದ ಈ ಜೋಡಿ ಮೊದಲ ಇನ್ನಿಂಗ್್ಸನ 114.1 ಓವರ್ಗಳಲ್ಲಿ 336 ರನ್ ಜೊತೆಯಾಟವಾಡಿತು. 182 ರನ್ ಗಳಿಸಿ ಬ್ರಾಥ್ವೇಟ್ ಔಟಾಗುವುದರೊಂದಿಗೆ ಅತೀ ಹೆಚ್ಚು ಓವರ್ ಜೊತೆಯಾಟವಾಡಿದ ಶ್ರೀಲಂಕಾದ ಮರ್ವಾನ್ ಅಟಪಟ್ಟು-ಸನತ್ ಜಯಸೂರ್ಯ ಅವರ ದಾಖಲೆ ಮುರಿಯುವ ಅವಕಾಶ ಕಳೆದುಕೊಂಡಿತು. ಈ ಜೋಡಿ 2000ರಲ್ಲಿ ಪಾಕಿಸ್ತಾನ ವಿರುದ್ಧ 114.2 ಓವರಲ್ಲಿ 335 ರನ್ ಜೊತೆಯಾಟವಾಡಿತ್ತು.
ಟೆಸ್ಟ್ನಲ್ಲಿ ತಂದೆ ಬಳಿಕ ಮಗನಿಂದಲೂ ಶತಕ
ದಿಗ್ಗಜ ಕ್ರಿಕೆಟಿಗ ಶಿವನಾರಾಯಣ್ ಚಂದ್ರಪಾಲ್ ಬಳಿಕ ಅವರ ಮಗ ತೇಜನಾರಾಯಣ ಚಂದ್ರಪಾಲ್ ಕೂಡಾ ಟೆಸ್ಟ್ನಲ್ಲಿ ಶತಕ ಸಿಡಿಸಿದ್ದಾರೆ. ಕೇವಲ 3ನೇ ಟೆಸ್ಟ್ ಆಡುತ್ತಿರುವ ತೇಜನಾರಾಯಣ ಮೊದಲ ಶತಕವನ್ನೇ ದ್ವಿಶತಕವನ್ನಾಗಿ ಪರಿವರ್ತಿಸಿದ್ದು, ಔಟಾಗದೆ 207 ರನ್ ಗಳಿಸಿದರು. ಶಿವನಾರಾಯಣ ತಮ್ಮ 19ನೇ ಟೆಸ್ಟ್ನಲ್ಲಿ ಚೊಚ್ಚಲ ಶತಕ ಬಾರಿಸಿದ್ದು, ಒಟ್ಟಾರೆ 30 ಶತಕ ಸಿಡಿಸಿದ್ದಾರೆ. ಟೆಸ್ಟ್ನಲ್ಲಿ ಶತಕ ಬಾರಿಸಿದ 12ನೇ ತಂದೆ-ಮಗ ಎನ್ನುವ ಹಿರಿಮೆಗೂ ಪಾತ್ರವಾಗಿದ್ದಾರೆ.
ವಿಂಡೀಸ್ ಇನಿಂಗ್ಸ್ ಡಿಕ್ಲೇರ್, ಜಿಂಬಾಬ್ವೆ ಎಚ್ಚರಿಕೆಯ ಆರಂಭ:
ಆರಂಭಿಕ ಬ್ಯಾಟರ್ ತೇಜನಾರಾಯಣ ಬಾರಿಸಿದ ಅಜೇಯ ದ್ವಿಶತಕ(207) ಹಾಗೂ ನಾಯಕ ಕ್ರೆಗ್ ಬ್ರಾಥ್ವೇಟ್(182) ಬಾರಿಸಿದ ಮಿಂಚಿನ ಶತಕದ ನೆರವಿನಿಂದ ವೆಸ್ಟ್ ಇಂಡೀಸ್ ತಂಡವು ಮೊದಲ ಇನಿಂಗ್ಸ್ನಲ್ಲಿ 6 ವಿಕೆಟ್ ಕಳೆದುಕೊಂಡು 447 ರನ್ ಬಾರಿಸಿ ಇನಿಂಗ್ಸ್ ಡಿಕ್ಲೇರ್ ಮಾಡಿಕೊಂಡಿತು. ಆರಂಭಿಕ ಬ್ಯಾಟರ್ಗಳನ್ನು ಹೊರತುಪಡಿಸಿ ವಿಂಡೀಸ್ನ ಉಳಿದ ಬ್ಯಾಟರ್ಗಳು ಜವಾಬ್ದಾರಿಯುತ ಬ್ಯಾಟಿಂಗ್ ಪ್ರದರ್ಶನ ತೋರಲು ವಿಫಲವಾದರು.
Border Gavaskar Trophy ಆಸೀಸ್ ಸ್ಪಿನ್ ಚಾಲೆಂಜ್ಗೆ ಭಾರತ ಭರ್ಜರಿ ತಯಾರಿ..!
ಕೈಲ್ ಮೇಯರ್ಸ್(20), ರೀಫರ್(02), ಬ್ಲಾಕ್ವುಡ್(5), ರೋಸ್ಟನ್ ಚೇಸ್(7) ಹಾಗೂ ಜೇಸನ್ ಹೋಲ್ಡರ್(11) ಅಲ್ಪಮೊತ್ತಕ್ಕೆ ವಿಕೆಟ್ ಒಪ್ಪಿಸುವ ಮೂಲಕ ನಿರಾಸೆ ಅನುಭವಿಸಿದರು. ಜಿಂಬಾಬ್ವೆ ತಂಡದ ಪರ ಬ್ರೆಂಡನ್ ಮವುಟ 5 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಆಗಿ ಹೊರಹೊಮ್ಮಿದರೆ, ವಸಕಜಾ ಒಂದು ವಿಕೆಟ್ ತಮ್ಮ ಬುಟ್ಟಿಗೆ ಹಾಕಿಕೊಂಡರು.
ಇನ್ನು ಮೊದಲ ಇನಿಂಗ್ಸ್ ಆರಂಭಿಸಿದ ಜಿಂಬಾಬ್ವೆ ತಂಡಕ್ಕೆ ಇನ್ನೊಸೆಂಟ್ ಕಾಲಾ(59) ಅಜೇಯ ಅರ್ಧಶತಕದ ಮೂಲಕ ತಂಡಕ್ಕೆ ಆಸರೆಯಾಗಿದ್ದಾರೆ. ಮೂರನೇ ದಿನದಾಟದಂತ್ಯದ ವೇಳಗೆ ಜಿಂಬಾಬ್ವೆ ತಂಡವು 3 ವಿಕೆಟ್ ಕಳೆದುಕೊಂಡು 114 ರನ್ ಬಾರಿಸಿದೆ. ಇನ್ನುಳಿದ ಎರಡು ದಿನದಲ್ಲಿ ವಿಂಡೀಸ್ ಅದ್ಭುತ ಪ್ರದರ್ಶನ ತೋರಿದರೆ, ಮೊದಲ ಟೆಸ್ಟ್ ಪಂದ್ಯವನ್ನು ತಮ್ಮದಾಗಿಸಿಕೊಳ್ಳಬಹುದು.