Ranji Trophy ನಾಕೌಟ್ ಪಂದ್ಯಗಳಲ್ಲಿ ಯಶಸ್ವಿ ಜೈಸ್ವಾಲ್ ಟೆರರ್ ಬ್ಯಾಟಿಂಗ್
* ರಣಜಿ ಟ್ರೋಫಿ ನಾಕೌಟ್ ಪಂದ್ಯದಲ್ಲಿ ಮಿಂಚಿನ ಪ್ರದರ್ಶನ ತೋರುತ್ತಿರುವ ಯಶಸ್ವಿ ಜೈಸ್ವಾಲ್
* ಯಶಸ್ವಿ ಜೈಸ್ವಾಲ್ ಲೀಗ್ ಪಂದ್ಯದಲ್ಲಿ ಮಿಂಚಿದ್ದಕ್ಕಿಂತ ನಾಕೌಟ್ ಪಂದ್ಯಗಳಲ್ಲಿ ಅಬ್ಬರಿಸಿದ್ದೇ ಹೆಚ್ಚು
* ಐಪಿಎಲ್ನಲ್ಲಿ ರಾಜಸ್ಥಾನ ರಾಯಲ್ಸ್ ತಂಡವನ್ನು ಪ್ರತಿನಿಧಿಸುತ್ತಿರುವ ಯಶಸ್ವಿ ಜೈಸ್ವಾಲ್
ಬೆಂಗಳೂರು(ಜೂ.25): ಬಹು ತಂಡಗಳು ಭಾಗವಹಿಸೋ ಟೂರ್ನಿಗಳಲ್ಲಿ ಸ್ಟಾರ್ ಪ್ಲೇಯರ್ಸ್ ಅನಿಸಿಕೊಂಡೋರು ಲೀಗ್ನಲ್ಲಿ ಆರ್ಭಟಿಸಿ, ನಾಕೌಟ್ಗಳಲ್ಲಿ ಮುಗ್ಗರಿಸ್ತಾರೆ. ಏಷ್ಯಾಕಪ್, ವಿಶ್ವಕಪ್, ಅಂಡರ್-19 ವಿಶ್ವಕಪ್, ರಣಜಿ ಟೂರ್ನಿ ಹೀಗೆ ಬಿಗ್ ಟೂರ್ನಿಗಳ ಲೀಗ್ನಲ್ಲಿ ಉತ್ತಮ ಪ್ರದರ್ಶನ ನೀಡುವ ಆಟಗಾರರು, ನಾಕೌಟ್ ಮ್ಯಾಚ್ಗಳಲ್ಲಿ ಮಾತ್ರ ವಿಫಲರಾಗ್ತಾರೆ. ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಸೇರಿದಂತೆ ಅದೆಷ್ಟೋ ದಿಗ್ಗಜ ಕ್ರಿಕೆಟರ್ಸ್ ನಾಕೌಟ್ ಪಂದ್ಯದಲ್ಲಿ ಮಕಾಡೆ ಮಲಗಿದ್ದು ಉಂಟು. ಆದ್ರೆ ಇಲ್ಲೊಬ್ಬ ಕ್ರಿಕೆಟರ್ ನಾಕೌಟ್ ಮ್ಯಾಚ್ಗಳೆಂದರೆ ಆರ್ಭಟಿಸಿಬಿಡುತ್ತಾನೆ. ಆತನೇ ಮುಂಬೈನ ಯಶಸ್ವಿ ಜೈಸ್ವಾಲ್ (Yashasvi Jaiswal).
ಯಶಸ್ವಿ ಜೈಸ್ವಾಲ್ ಯಶಸ್ಸಿನ ಗುಟ್ಟು..!:
ಯಶಸ್ವಿ ಜೈಸ್ವಾಲ್. ಅಂಡರ್-19 ಪ್ಲೇಯರ್. ಐಪಿಎಲ್ನಲ್ಲಿ ರಾಜಸ್ಥಾನ ರಾಯಲ್ಸ್ (Rajasthan Royals) ಓಪನರ್. ಡೊಮೆಸ್ಟಿಕ್ನಲ್ಲಿ ಮುಂಬೈ ಆರಂಭಿಕ ಬ್ಯಾಟರ್. ಈತನಿಗೆ ನಾಕೌಟ್ ಪಂದ್ಯಗಳೆಂದರೆ ಅದೇನು ಪ್ರೀತಿನೋ ಗೊತ್ತಿಲ್ಲ. ನಾಕೌಟ್ ಮ್ಯಾಚ್ಗಳಲ್ಲಿ ಪ್ಯಾಡ್ ಕಟ್ಟಿ ಕ್ರೀಸಿಗೆ ಇಳಿದ್ರೆ ಮುಗೀತು. ಬಿಗ್ ಇನ್ನಿಂಗ್ಸ್ ಆಡದೆ ವಾಪಾಸ್ ಆಗೋ ಮಾತೇ ಇಲ್ಲ. ಕೇವಲ ಒಂದು ಟೂರ್ನಿ, ಒಂದು ಪಂದ್ಯದಲ್ಲಿ ಮಾತ್ರವಲ್ಲ, ಹಲವಾರು ನಾಕೌಟ್ ಮ್ಯಾಚ್ಗಳಲ್ಲಿ ಯಶಸ್ವಿ ಜೈಸ್ವಾಲ್ ಬಿಗ್ ಇನ್ನಿಂಗ್ಸ್ ಆಡುವಲ್ಲಿ ಯಶಸ್ವಿಯಾಗಿದ್ದಾರೆ.
ಅಂಡರ್-19 ವಿಶ್ವಕಪ್ ನಾಕೌಟ್ ಪಂದ್ಯಗಳಲ್ಲಿ ಜೈಸ್ವಾಲ್ ಅಬ್ಬರ:
ಅಂಡರ್-19 ವರ್ಲ್ಡ್ಕಪ್ನಲ್ಲಿ (ICC U-19 World Cup) ಆಡಿದ್ದ ಯಶಸ್ವಿ ಜೈಸ್ವಾಲ್, ನಾಕೌಟ್ ಪಂದ್ಯಗಳಲ್ಲಿ ರನ್ ಹೊಳೆಯನ್ನೇ ಹರಿಸಿದ್ರು. ಕ್ವಾರ್ಟರ್ ಫೈನಲ್ನಲ್ಲಿ ಹಾಫ್ ಸೆಂಚುರಿ, ಸೆಮಿಸ್ನಲ್ಲಿ ಸೆಂಚುರಿ ಮತ್ತು ಫೈನಲ್ನಲ್ಲಿ ಅರ್ಧಶತಕ ಸಿಡಿಸಿದ್ದರು. ಈ ಮೂಲಕ ಭಾರತ ಜೂನಿಯರ್ ತಂಡಕ್ಕೆ ಆಸರೆಯಾಗಿದ್ದರು.
ರಣಜಿ ನಾಕೌಟ್ ಮ್ಯಾಚ್ಗಳಲ್ಲಿ ಯಶಸ್ವಿ ಆರ್ಭಟ:
ಸದ್ಯ ಬೆಂಗಳೂರಿನಲ್ಲಿ ರಣಜಿ ಟ್ರೋಫಿ ಫೈನಲ್ (Ranji Trophy Final) ಮ್ಯಾಚ್ ನಡೆಯುತ್ತಿದೆ. ಮುಂಬೈ ಮತ್ತು ಮಧ್ಯ ಪ್ರದೇಶ ತಂಡಗಳು ರಣಜಿ ಕಪ್ ಗೆಲ್ಲಲು ಹೋರಾಟ ನಡೆಸುತ್ತಿವೆ. ಫಸ್ಟ್ ಇನ್ನಿಂಗ್ಸ್ನಲ್ಲಿ ಯಶಸ್ವಿ ಜೈಸ್ವಾಲ್ ಹಾಫ್ ಸೆಂಚುರಿ ಬಾರಿಸಿದ್ದಾರೆ. ಕೇವಲ ಫೈನಲ್ನಲ್ಲಿ ಮಾತ್ರವಲ್ಲ, ಸೆಮಿಫೈನಲ್ ಪಂದ್ಯದ ಎರಡು ಇನ್ನಿಂಗ್ಸ್ನಲ್ಲಿ ಜೈಸ್ವಾಲ್ ಶತಕ ಸಿಡಿಸಿದ್ದರು. ಕ್ವಾರ್ಟರ್ ಫೈನಲ್ನಲ್ಲೂ ಸೆಂಚುರಿ ಬಾರಿಸಿದ್ದರು. ಆ ಆರ್ಭಟ ನೋಡಿದ್ದ ಮಧ್ಯಪ್ರದೇಶ ತಂಡ, ಫೈನಲ್ನಲ್ಲೂ ಶತಕ ಸಿಡಿಸ್ತಾರೆ ಅಂದುಕೊಂಡಿತ್ತು. ಆದರೆ ಅರ್ಧಶತಕ್ಕೆ ತಮ್ಮ ಆಟ ನಿಲ್ಲಿಸಿದ್ರು. ಸೆಕೆಂಡ್ ಇನ್ನಿಂಗ್ಸ್ನಲ್ಲಿ ಸೆಂಚುರಿ ಹೊಡೆದ್ರೂ ಆಶ್ಚರ್ಯವಿಲ್ಲ ಬಿಡಿ.
Ranji Trophy Final ಬಲಿಷ್ಠ ಮುಂಬೈಗೆ ತಿರುಗೇಟು ನೀಡಿದ ಮಧ್ಯಪ್ರದೇಶ..!
ಯಶಸ್ವಿ ಜೈಸ್ವಾಲ್, ಈ ಸೀಸನ್ ರಣಜಿಯಲ್ಲಿ ಆಡಿರೋ ಜಸ್ಟ್ 3 ಪಂದ್ಯದಲ್ಲಿ 497 ರನ್ ಹೊಡೆದಿದ್ದಾರೆ. ಮೂರು ಸೆಂಚುರಿ, ಒಂದು ಹಾಫ್ ಸೆಂಚುರಿ ಅವರ ಖಾತೆಯಲ್ಲಿದೆ. ಇನ್ನು ಜೈಸ್ವಾಲ್ ಇದುವರೆಗೂ ಆಡಿರೋದು ಕೇವಲ ನಾಲ್ಕೇ ನಾಲ್ಕು ಫಸ್ಟ್ ಕ್ಲಾಸ್ ಮ್ಯಾಚ್ಗಳು ಅನ್ನೋದೇ ವಿಶೇಷ.