ಆಕ್ಲೆಂಡ್(ಡಿ.19)‌: ಪಾಕಿಸ್ತಾನ ವಿರುದ್ಧ ಮೊದಲ ಟಿ20 ಪಂದ್ಯದಲ್ಲಿ ನ್ಯೂಜಿಲೆಂಡ್‌ 5 ವಿಕೆಟ್‌ಗಳ ಗೆಲುವು ಸಾಧಿಸಿದೆ. ಈ ಮೂಲಕ 3 ಪಂದ್ಯಗಳ ಸರಣಿಯಲ್ಲಿ ನ್ಯೂಜಿಲೆಂಡ್‌ 1-0 ಮುನ್ನಡೆ ಪಡೆದಿದೆ. 

ಟಾಸ್‌ ಗೆದ್ದು ಮೊದಲು ಬ್ಯಾಟ್‌ ಮಾಡಿದ ಪಾಕಿಸ್ತಾನ, 39 ರನ್‌ಗೆ 5 ವಿಕೆಟ್‌ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ನಾಯಕ ಶದಾಬ್‌ ಖಾನ್‌ (42) ಹೋರಾಟದಿಂದ 9 ವಿಕೆಟ್‌ಗೆ 153 ರನ್‌ ಕಲೆಹಾಕಿತು. ಕಿವೀಸ್‌ ಪರ ಯುವ ವೇಗಿ ಜಾಕಬ್‌ ಡಫಿ (4-33) ಅತ್ಯದ್ಭುತ ಬೌಲಿಂಗ್‌ ದಾಳಿ ನಡೆಸಿದರು. ಪಾದಾರ್ಪಣೆ ಪಂದ್ಯದಲ್ಲೇ ಮಿಂಚಿನ ಪ್ರದರ್ಶನ ತೋರಿದ ಜಾಕಬ್ ಡಫಿ ಪಂದ್ಯ ಶ್ರೇಷ್ಠ ಗೌರವಕ್ಕೆ ಭಾಜನರಾದರು. ನ್ಯೂಜಿಲೆಂಡ್ ಪರ ಟಿ20 ಕ್ರಿಕೆಟ್‌ನಲ್ಲಿ ಪಾದಾರ್ಪಣೆ ಪಂದ್ಯದಲ್ಲೇ 4 ವಿಕೆಟ್ ಕಬಳಿಸಿದ ಮೊದಲ ವೇಗಿ ಎನ್ನುವ ಗೌರವವೂ ಡಫಿ ಪಾಲಾಗಿದೆ.

ಇನ್ನು ಸ್ಪರ್ಧಾತ್ಮಕ ಗುರಿ ಬೆನ್ನತ್ತಿದ ಆತಿಥೇಯ ನ್ಯೂಜಿಲೆಂಡ್ ಕೂಡಾ ಉತ್ತಮ ಆರಂಭ ಪಡೆಯಲು ವಿಫಲವಾಯಿತು. 21 ರನ್‌ ಗಳಿಸುವಷ್ಟರಲ್ಲಿ ಕಿವೀಸ್‌ ಪಡೆಯ ಅಗ್ರ ಕ್ರಮಾಂಕದ ಇಬ್ಬರು ಬ್ಯಾಟ್ಸ್‌ಮನ್‌ಗಳು ಪೆವಿಲಿಯನ್ ಸೇರಿದ್ದರು. ಆದರೆ ವಿಕೆಟ್‌ ಕೀಪರ್‌ ಟಿಮ್ ಸೈಫರ್ಟ್ ಕೇವಲ 43 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 1 ಸಿಕ್ಸರ್ ನೆರವಿನಿಂದ 57 ರನ್ ಬಾರಿಸುವ ಮೂಲಕ ತಂಡಕ್ಕೆ ಆಸರೆಯಾದರು.

ನೇಪಾಳ ಕ್ರಿಕೆಟ್‌ ಕೋಚ್‌ ಆಗಿ ಡೇವ್ ವಾಟ್ಮೋರ್ ನೇಮಕ

ಇನ್ನು ಮಧ್ಯಮ ಕ್ರಮಾಂಕದಲ್ಲಿ ಗ್ಲೆನ್ ಫಿಲಿಪ್ಸ್(23), ಮಾರ್ಕ್ ಚಾಪ್ನನ್(34) ಹಾಗೂ ಜೇಮ್ಸ್ ನೀಶಮ್(15*) ಮತ್ತು ಮಿಚೆಲ್ ಸ್ಯಾಂಟ್ನರ್(12) ಅಜೇಯ ಬ್ಯಾಟಿಂಗ್ ನಡೆಸುವ ಮೂಲಕ ಇನ್ನೂ 7 ಎಸೆತಗಳು ಬಾಕಿ ಇರುವಂತೆಯೇ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ಸಂಕ್ಷಿಪ್ತ ಸ್ಕೋರ್:

ಪಾಕಿಸ್ತಾನ: 153/9
ಶಾದಾಬ್ ಖಾನ್: 42
ಜಾಕಬ್‌ ಡಫಿ:33/4

ನ್ಯೂಜಿಲೆಂಡ್: 156/5
ಟಿಮ್ ಸೈಫರ್ಟ್: 57
ಹ್ಯಾರಿಸ್ ರವೂಫ್: 29-3

ಪಂದ್ಯಶ್ರೇಷ್ಠ: ಜಾಕಬ್‌ ಡಫಿ