5 ಟೆಸ್ಟ್ ಪಂದ್ಯಗಳಲ್ಲೂ ಬೆಂಚ್ ಕಾಯಿಸಿದ ಅಶ್ವಿನ್..! ಇಂಗ್ಲೆಂಡ್ಗೆ ಕರೆಸಿಕೊಂಡಿದ್ದೇಕೆ..?
* ಇಂಗ್ಲೆಂಡ್ ಎದುರು 5 ಪಂದ್ಯಗಳಲ್ಲೂ ಬೆಂಚ್ ಕಾಯಿಸಿದ ಅಶ್ವಿನ್
* ಬರ್ಮಿಂಗ್‌ಹ್ಯಾಮ್ ಟೆಸ್ಟ್ ಪಂದ್ಯದಲ್ಲೂ ಹೊರಗುಳಿದ ಅಶ್ವಿನ್
* ಕೋವಿಡ್‌ನಿಂದ ಚೇತರಿಸಿಕೊಂಡು ಇಂಗ್ಲೆಂಡ್‌ನತ್ತ ಪ್ರಯಾಣ ಬೆಳೆಸಿದ್ದ ಸ್ಪಿನ್ನರ್
ಬರ್ಮಿಂಗ್‌ಹ್ಯಾಮ್(ಜು.02) : ಹೆಸರು ರವಿಚಂದ್ರನ್ ಅಶ್ವಿನ್ (Ravichandran Ashwin). ಶಾರ್ಟ್ ಆಗಿ ಆರ್. ಅಶ್ವಿನ್ ಅಂತ ಕರಿತಾರೆ. ವಯಸ್ಸು 35 ವರ್ಷ. ತಮಿಳುನಾಡಿನ ಈ ಆಲ್ರೌಂಡರ್ ಖಾತೆಯಲ್ಲಿ ಬರೋಬ್ಬರಿ 442 ಟೆಸ್ಟ್ ವಿಕೆಟ್ಗಳಿವೆ. ಹಾಗೆ 2,931 ರನ್ಗಳನ್ನೂ ಬಾರಿಸಿದ್ದಾರೆ. 31 ಕ್ಯಾಚ್ಗಳನ್ನೂ ಹಿಡಿದಿದ್ದಾರೆ. ಟೀಂ ಇಂಡಿಯಾ ತವರಿನಲ್ಲಿ ಟೆಸ್ಟ್ ಕ್ರಿಕೆಟ್ ಆಡುತ್ತಿದೆ ಅಂದ್ರೆ ಅವರೇ ಟ್ರಂಪ್ಕಾರ್ಡ್ ಪ್ಲೇಯರ್. ಭಾರತದಲ್ಲಿ ಇವರ ಮುಂದೆ ಕೊಹ್ಲಿನೂ ಡಮ್ಮಿಯೇ.
ಆದರೆ ಅದ್ಯಾಕೋ ವಿದೇಶದಲ್ಲಿ ಟೆಸ್ಟ್ ಆಡುವಾಗ ಟೀಂ ಇಂಡಿಯಾ (Team India) ಮಾತ್ರ ಅಶ್ವಿನ್ ಅವರನ್ನ ನೆಗ್ಲೆಟ್ ಮಾಡುತ್ತೆ. ಕಳೆದ ವರ್ಷ ಇಂಗ್ಲೆಂಡ್ ಟೂರ್ಗೆ ಹೋಗಿದ್ದ ಭಾರತ 4 ಟೆಸ್ಟ್ಗಳನ್ನಾಡಿತ್ತು. ಆದ್ರೆ ಆ ನಾಲ್ಕೂ ಟೆಸ್ಟ್ಗಳಲ್ಲೂ ಅಶ್ವಿನ್ ಬೆಂಚ್ ಕಾಯಿಸಿದ್ದರು. ಆಗಲೇ ಅಪಸ್ವರಗಳು ಎದ್ದಿದ್ದವು. ಕೊರೊನಾದಿಂದ ಮುಂದೂಡಲ್ಪಟ್ಟಿದ್ದ ಆ 5ನೇ ಟೆಸ್ಟ್ ಜುಲೈ 01ರಿಂದ ಬರ್ಮಿಂಗ್‌ಹ್ಯಾಮ್ನಲ್ಲಿ ಆರಂಭವಾಗಿದೆ. 5ನೇ ಟೆಸ್ಟ್ನಲ್ಲೂ ರವಿಚಂದ್ರನ್ ಅಶ್ವಿನ್ ಆಡ್ತಿಲ್ಲ. ಅಲ್ಲಿಗೆ ಇಂಗ್ಲೆಂಡ್ ವಿರುದ್ಧದ ಐದಕ್ಕೆ ಐದು ಟೆಸ್ಟ್ಗಳನ್ನೂ ಅಶ್ವಿನ್ ಬೆಂಚ್ ಕಾದ್ರು. ಅಶ್ವಿನ್ ಮೊದಲ ಬಾರಿಗೆ ಅನಿಸ್ತಿದೆ ಒಂದು ಸಿರೀಸ್ನಲ್ಲಿ ಒಂದೂ ಪಂದ್ಯವಾಡದೆ ಇರೋದು.
ಜೂನ್ 15ರಂದು ಇಂಗ್ಲೆಂಡ್ ಫ್ಲೈಟ್ ಹತ್ತೋಕು ಮುಂಚೆ ರವಿಚಂದ್ರನ್ ಅಶ್ವಿನ್ಗೆ ಕೋವಿಡ್ ಕಾಣಿಸಿಕೊಂಡಿತ್ತು. ಹಾಗಾಗಿ ಅವರು ಲೇಟಾಗಿ ಇಂಗ್ಲೆಂಡ್ಗೆ ಪ್ರಯಾಣ ಬೆಳೆಸಿದ್ರು. ಆಡಿಸದಿದ್ದರೆ ರವಿಚಂದ್ರನ್ ಅಶ್ವಿನ್ ಅವರನ್ನ ಇಂಗ್ಲೆಂಡ್ಗೆ ಕರೆಸಿಕೊಂಡಿದ್ದೇಕೆ ಅನ್ನೋ ಪ್ರಶ್ನೆ ಮೂಡಿದೆ. ಇನ್ನು ಕಳೆದ ವರ್ಷ ನಾಲ್ಕು ಟೆಸ್ಟ್ಗಳಿಂದ ಡ್ರಾಪ್ ಮಾಡಿದಕ್ಕೆ ಕೆಲವರು ಕೊಹ್ಲಿ ಮೇಲೆ ಗರಂ ಆಗಿದ್ದರು. ಈಗಲೂ ಅವರನ್ನ ಡ್ರಾಪ್ ಮಾಡಿದ್ದಾರೆ. ಅಲ್ಲಿಗೆ ಇಂಗ್ಲೆಂಡ್ನಲ್ಲಿ ಒಬ್ಬ ಸ್ಪಿನ್ನರ್ಗೆ ಆಡಲು ಮಾತ್ರ ಅವಕಾಶ. ಹಾಗಾಗಿ ಅಶ್ವಿನ್ ಡ್ರಾಪ್ ಮಾಡಿ ಜಡೇಜಾಗೆ ಚಾನ್ಸ್ ಕೊಡಲಾಗಿದೆ ಅನ್ನೋ ಸತ್ಯವನ್ನ ಒಪ್ಪಿಕೊಳ್ಳಬೇಕು.
ಟೀಂ ಇಂಡಿಯಾದಲ್ಲಿ ಮೂರು ಬದಲಾವಣೆ :
2021ರಲ್ಲಿ ಆಡಿದ ತಂಡಕ್ಕೂ ಈಗ ಟೆಸ್ಟ್ ಆಡುತ್ತಿರುವ ತಂಡಕ್ಕೂ ಮೂರು ವ್ಯತ್ಯಾಸಗಳಿವೆ. ಅಂದತೆ ಮೂರು ಬದಲಾವಣೆ ಆಗಿವೆ. ರೋಹಿತ್ ಶರ್ಮಾ (Rohit Sharma), ಕೆಎಲ್ ರಾಹುಲ್ ಮತ್ತು ಅಜಿಂಕ್ಯ ರಹಾನೆ ಬದಲಿಗೆ ಶುಬ್ಮನ್ ಗಿಲ್, ಹನುಮ ವಿಹಾರಿ ಹಾಗೂ ಶ್ರೇಯಸ್ ಅಯ್ಯರ್ ಆಡ್ತಿದ್ದಾರೆ. ಉಳಿದಂತೆ 8 ಮಂದಿ ಕಳೆದ ವರ್ಷವೂ ಟೆಸ್ಟ್ ಸರಣಿ ಆಡಿದ್ದರು.
35 ವರ್ಷಗಳ ಬಳಿಕ ಫಾಸ್ಟ್ ಬೌಲರ್ ಕ್ಯಾಪ್ಟನ್:
ರೋಹಿತ್ ಶರ್ಮಾಗೆ ಕೊರೊನಾ ಪಾಸಿಟಿವ್ ಬಂದಿರುವುದರಿಂದ ಜಸ್ಪ್ರೀತ್ ಬುಮ್ರಾ (Jasprit Bumrah) ಟೀಂ ಇಂಡಿಯಾವನ್ನ ಲೀಡ್ ಮಾಡ್ತಿದ್ದಾರೆ. ಸುದೀರ್ಘ 35 ವರ್ಷಗಳ ಬಳಿಕ ವೇಗದ ಬೌಲರ್ ಒಬ್ಬ ಭಾರತ ತಂಡದ ನಾಯಕರಾಗಿದ್ದಾರೆ. 1987ರಲ್ಲಿ ಕಪಿಲ್ ದೇವ್ ಭಾರತ ಟೆಸ್ಟ್ ತಂಡದ ನಾಯಕರಾಗಿದ್ದರು.
ಕಳೆದ ವರ್ಷ ಆಡಿದ ತಂಡಕ್ಕೂ ಈ ವರ್ಷ ಆಡಿದ ತಂಡಕ್ಕೂ ಸಾಕಷ್ಟು ಬದಲಾವಣೆಗಳಾಗಿವೆ. ಕೇವಲ ಭಾರತ ಮಾತ್ರವಲ್ಲ, ಇಂಗ್ಲೆಂಡ್ ಟೀಮ್ನಲ್ಲೂ ಕೋಚ್, ಕ್ಯಾಪ್ಟನ್, ವೈಸ್ ಕ್ಯಾಪ್ಟನ್ ಮತ್ತು ಕೆಲ ಆಟಗಾರರು ಬದಲಾಗಿದ್ದಾರೆ. ಇದನ್ನ ನೊಡಿದ್ರೆ ಜಸ್ಟ್ 10 ತಿಂಗಳಲ್ಲಿ ಎಷ್ಟೆಲ್ಲಾ ಬದಲಾವಣೆಗಳಾಗಿವೆ ಅನಿಸದೆ ಇರದು.
