ನೆಟ್ಫ್ಲಿಕ್ಸ್ ನೋಡ್ತಿರಾ?: ಎಷ್ಟು ಲಾಭ ಮಾಡ್ಕೊಂಡೈತೆ ನೋಡಿ!
ನೆಟ್ಫ್ಲಿಕ್ಸ್ ಆದಾಯದಲ್ಲಿ ಭಾರೀ ಹೆಚ್ಚಳ! ನೆಟ್ಫ್ಲಿಕ್ಸ್ ಗ್ರಾಹಕರ ಪ್ರಮಾಣದಲ್ಲಿ ಭಾರೀ ಏರಿಕೆ! ಕಂಪನಿ ಆದಾಯದಲ್ಲಿ ಶೇ.34 ರಷ್ಟು ಏರಿಕೆ! 4 ಬಿಲಿಯನ್ ಡಾಲರ್ ತಲುಪಿದ ನೆಟ್ಫ್ಲಿಕ್ಸ್ ಆದಾಯ
ಲಾಸ್ ಗ್ಯಾಟೋಸ್(ಅ.17): ನೆಟ್ಫ್ಲಿಕ್ಸ್ ನ ಬಳಕೆದಾರರು ಹೆಚ್ಚಾದ ಪರಿಣಾಮ, ಕಳೆದ ತ್ರೈಮಾಸಿಕದಲ್ಲಿ ಕಂಪನಿ ನಿರೀಕ್ಷೆಗಿಂತ ಹೆಚ್ಚಿನ ಪ್ರಮಾಣದ ಆದಾಯ ಗಳಿಸಿದೆ.
ವಿಶ್ವಾದಾದ್ಯಂತ ಸುಮಾರು 7 ಮಿಲಿಯನ್ ನಷ್ಟು ಗ್ರಾಹಕರನ್ನು ಹೊಸದಾಗಿ ಪಡೆದಿರುವ ನೆಟ್ಫ್ಲಿಕ್ಸ್ , ಕಳೆದ ತ್ರೈಮಾಸಿಕದಲ್ಲಿ ನೆಟ್ಫ್ಲಿಕ್ಸ್ ನ ಲಾಭ ಕಳೆದ ವರ್ಷಕ್ಕಿಂತ ಮೂರು ಪಟ್ಟು ಹೆಚ್ಚಾಗಿದೆ ಎನ್ನಲಾಗಿದೆ.
ನೆಟ್ಫ್ಲಿಕ್ಸ್ ಗ್ರಾಹಕರ ಸಂಖ್ಯೆ ಬರೋಬ್ಬರಿ 137 ಮಿಲಿಯನ್ ನಷ್ಟಾಗಿದ್ದು, ಈ ಹಿನ್ನೆಲೆಯಲ್ಲಿ ಕಳೆದ ತ್ರೈಮಾಸಿಕದಲ್ಲಿ ಅದರ ಲಾಭ 403 ಮಿಲಿಯನ್ ಡಾಲರ್ ಗೆ ಏರಿಕೆಯಾಗಿದೆ.
ಕಂಪನಿ ಆದಾಯದಲ್ಲಿ ಶೇ.34 ರಷ್ಟು ಏರಿಕೆಯಾಗಿ, 4 ಬಿಲಿಯನ್ ಡಾಲರ್ ಗೆ ತಲುಪಿದೆ ಎಂದು ನೆಟ್ಫ್ಲಿಕ್ಸ್ ಇತ್ತೀಚಿಗಷ್ಟೇ ಬಿಡುಗಡೆ ಮಾಡಿದ ವರದಿಯಲ್ಲಿ ಉಲ್ಲೇಖ ಮಾಡಿದೆ.
ಇನ್ನು ನೆಟ್ಫ್ಲಿಕ್ಸ್ ಲಾಭ ಗಳಿಸುತ್ತಿದ್ದಂತೆಯೇ ಷೇರು ಮಾರುಕಟ್ಟೆಯಲ್ಲೂ ನೆಟ್ಫ್ಲಿಕ್ಸ್ ಷೇರುಗಳು ಶೇ.12 ರಷ್ಟು ಏರಿಕೆ ಕಂಡಿದೆ. ಒರಿಜಿನಲ್ ಕಂಟೆಂಟ್ನಲ್ಲಿ ನೆಟ್ಫ್ಲಿಕ್ಸ್ 8 ಬಿಲಿಯನ್ ಡಾಲರ್ ಹೂಡಿಕೆ ಮಾಡಲು ಯೋಜನೆ ಹೊಂದಿದ್ದು, ಹೂಡಿಕೆದಾರರಿಗೆ ಲಾಭದ ಭರವಸೆ ನೀಡಲು ಸಿದ್ಧ ಎಂದು ಸಂಸ್ಥೆ ಹೇಳಿದೆ.