12,163 ಕೋಟಿ ರೂಪಾಯಿಗೆ ಬೆಂಗಳೂರಿನ ಮಾವಳ್ಳಿ ಟಿಫಿನ್‌ ರೂಮ್‌-MTR ಖರೀದಿಗೆ ಮುಂದಾದ ಐಟಿಸಿ!

ಎಂಟಿಆರ್‌ ಫುಡ್ಸ್‌ ಮತ್ತು ಈಸ್ಟರ್ನ್‌ ಕಾಂಡಿಮೆಂಟ್ಸ್‌ ಅನ್ನು 12,163 ಕೋಟಿ ರೂಪಾಯಿಗೆ ಖರೀದಿಸಲು ಐಟಿಸಿ ಮಾತುಕತೆ ನಡೆಸುತ್ತಿದೆ. ಓರ್ಕ್ಲಾ ಇಂಡಿಯಾ ಐಪಿಒ ಬದಲಿಗೆ ಖಾಸಗಿ ಒಪ್ಪಂದದ ಮೂಲಕ ಮಾರಾಟ ಮಾಡುವ ಸಾಧ್ಯತೆ ಇದೆ.

ಬೆಂಗಳೂರು (ಫೆ.19): ಉದ್ಯಾನನಗರಿಯ ಅತ್ಯಂತ ಪ್ರಖ್ಯಾತ ಬ್ರ್ಯಾಂಡ್‌ಗಳಲ್ಲಿ ಒಂದಾದ ಎಂಟಿಆರ್‌ ಫುಡ್ಸ್‌ ಪ್ರೈವೇಟ್‌ ಲಿಮಿಟೆಡ್‌ ಮೇಲೆ ಐಟಿಸಿ ಕಂಪನಿ ಕಣ್ಣಿಟ್ಟಿದೆ. ಪ್ರಸ್ತುತ ಎಂಟಿಆರ್‌ ಫುಡ್ಸ್‌ ಹಾಗೂ ಈಸ್ಟರ್ನ್‌ ಕಾಂಡಿಮೆಂಟ್ಸ್‌ ಪ್ರೈವೇಟ್‌ ಲಿಮಿಟೆಡ್‌ ಮಾಲೀಕರಾಗಿರುವ ನಾರ್ವೆ ಮೂಲದ ಓರ್ಕ್ಲಾ ಎಎಸ್ಎ ಜೊತೆ ಖರೀದಿ ಒಪ್ಪಂದದ ಮಾತುಕತೆ ಮುಕ್ತಾಯವಾಗಿದೆ ಎಂದು ತಿಳಿದುಬಂದಿದೆ. ಈ ಎರಡೂ ಕಂಪನಿಗಳನ್ನು ಅಂದಾಜು 1.4 ಬಿಲಿಯನ್‌ ಯುಎಸ್‌ ಡಾಲರ್‌ ಅಂದರೆ 12,163 ಕೋಟಿ ರೂಪಾಯಿಗೆ ಖರೀದಿ ಮಾಡುವ ಬಗ್ಗೆ ಐಟಿಸಿ ಪ್ರಸ್ತಾಪ ಮಾಡಿದೆ ಎಂದು ಇಬ್ಬರು ಅಧಿಕಾರಇಗಳನ್ನು ಉಲ್ಲೇಖಿಸಿ ಮಿಂಟ್‌ ವರದಿ ಮಾಡಿದೆ. ದಕ್ಷಿಣ ಮಾರುಕಟ್ಟೆಗಳಲ್ಲಿ ಪ್ರಾಬಲ್ಯ ಸಾಧಿಸಬೇಕು ಎನ್ನುವ ನಿಟ್ಟಿನಲ್ಲಿ ಐಟಿಸಿ ಈ ಮಾತುಕತೆ ನಡೆಸುತ್ತಿದೆ. ಓರ್ಕ್ಲಾ ಈ ಹಿಂದೆ ಸೆಪ್ಟೆಂಬರ್ 2024 ರ ಹೊತ್ತಿಗೆ ತನ್ನ ಭಾರತೀಯ ವ್ಯವಹಾರದ ಐಪಿಒ ಅನ್ನು ಪರಿಗಣಿಸಿತ್ತು. ಆದರೆ ಈಗ ಉತ್ತಮ ಮೌಲ್ಯಮಾಪನವನ್ನು ಪಡೆದುಕೊಂಡರೆ ಖಾಸಗಿ ಒಪ್ಪಂದದ ಮೂಲಕ ಬಹುಪಾಲು ಪಾಲು ಮಾರಾಟವನ್ನು ಮೌಲ್ಯಮಾಪನ ಮಾಡುತ್ತಿದೆ ಎಂದು ವರದಿ ತಿಳಿಸಿದೆ. 

2007 ರಲ್ಲಿ ಎಂಟಿಆರ್ ಮತ್ತು 2020 ರಲ್ಲಿ ಈಸ್ಟರ್ನ್ ಅನ್ನು ಸ್ವಾಧೀನಪಡಿಸಿಕೊಳ್ಳುವ ಮೂಲಕ ಭಾರತೀಯ ಮಾರುಕಟ್ಟೆಯನ್ನು ಪ್ರವೇಶಿಸಿದ ನಾರ್ವೆ ಮೂಲದ ಓರ್ಕ್ಲಾ ಕಂಪನಿಯು ಇನ್ನೂ ಐಪಿಒ ಆಯ್ಕೆಯನ್ನು ಸಂಪೂರ್ಣವಾಗಿ ಕೈಬಿಟ್ಟಿಲ್ಲ. ಖಾಸಗಿ ಮಾರಾಟವು ಅನುಕೂಲಕರ ಮೌಲ್ಯಮಾಪನವನ್ನು ನೀಡದಿದ್ದರೆ, ಓರ್ಕ್ಲಾ ತನ್ನ ಎಂಟಿಆರ್‌ ಹಾಗೂ ಈಸ್ಟರ್ನ್‌ ಫುಡ್‌ಅನ ಐಪಿಓಅನ್ನು ಪರಿಚಯಿಸುವ ಸಾಧ್ಯತೆ ಇದೆ.

ಓಸ್ಲೋದಲ್ಲಿ ನೆಲೆಸಿರುವ ಓರ್ಕ್ಲಾದ ವಕ್ತಾರರು ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದು,"ಆಧಾರರಹಿತ ಮಾರುಕಟ್ಟೆ ವದಂತಿಗಳು ಅಥವಾ ಊಹಾಪೋಹಗಳ" ಬಗ್ಗೆ ಪ್ರತಿಕ್ರಿಯಿಸಲು ನಿರಾಕರಿಸಿದರು. ಈ ನಡುವೆ, ಐಟಿಸಿ ತನ್ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಸಂಜೀವ್ ಪುರಿ ಈ ಬಗ್ಗೆ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದರು.

ಇತ್ತೀಚೆಗೆ FMCG ಬ್ರ್ಯಾಂಡ್ ಪ್ರಸುಮಾವನ್ನು ಸ್ವಾಧೀನಪಡಿಸಿಕೊಂಡಿರುವ ITCಗೆ, MTR ಫುಡ್ಸ್ ಮತ್ತು ಈಸ್ಟರ್ನ್ ಕಾಂಡಿಮೆಂಟ್ಸ್ ಸ್ವಾಧೀನವು ಮಸಾಲೆಗಳು ಮತ್ತು ಅಡುಗೆ ಮಾಡಲು ಸಿದ್ಧ ಆಹಾರ ವಿಭಾಗಗಳಲ್ಲಿ ತನ್ನ ಅಸ್ತಿತ್ವವನ್ನು ಬಲಪಡಿಸುತ್ತದೆ. ಮಿಂಟ್ ಪ್ರಕಾರ, ಈ ಬ್ರ್ಯಾಂಡ್‌ಗಳು ಆಂಧ್ರಪ್ರದೇಶ, ಕರ್ನಾಟಕ, ತಮಿಳುನಾಡು ಮತ್ತು ಕೇರಳದಲ್ಲಿ ಮಾರುಕಟ್ಟೆಯಲ್ಲಿ ಲೀಡರ್‌ ಆಗಿದ್ದು, FY24 ರಲ್ಲಿ ಓರ್ಕ್ಲಾ ಇಂಡಿಯಾದ 2,400 ಕೋಟಿ ರೂ. ಆದಾಯದ 80% ಕ್ಕಿಂತ ಹೆಚ್ಚು ಉತ್ಪಾದಿಸುತ್ತವೆ.

ಬೆಂಗಳೂರಿನ ಮೈಯಾ ಕುಟುಂಬದಿಂದ 1950 ರಲ್ಲಿ ಪ್ರಾರಂಭವಾದ MTR ಫುಡ್ಸ್, ವರ್ಷಗಳಲ್ಲಿ ವೈವಿಧ್ಯಮಯವಾಗಿದೆ ಮತ್ತು ಈಗ ಉತ್ತರ ಅಮೆರಿಕಾ, ಪಶ್ಚಿಮ ಏಷ್ಯಾ, ಜಪಾನ್ ಮತ್ತು ಆಗ್ನೇಯ ಏಷ್ಯಾದ ಕೆಲವು ಭಾಗಗಳಲ್ಲಿ ಅಂತರರಾಷ್ಟ್ರೀಯವಾಗಿ ಉತ್ಪನ್ನಗಳನ್ನು ಮಾರಾಟ ಮಾಡುತ್ತದೆ.