ನವದೆಹಲಿ[ಆ.01]: ರಸ್ತೆ ನಿಯಮ ಉಲ್ಲಂಘಿಸಿದರೆ ಭಾರೀ ದಂಡ ವಿಧಿಸಲು ಅವಕಾಶ ಇರುವ ಮೋಟಾರು ವಾಹನ (ತಿದ್ದುಪಡಿ) ಮಸೂದೆಗೆ ರಾಜ್ಯಸಭೆ ಮಂಗಳವಾರ ಅನುಮೋದನೆ ನೀಡಿದೆ. ಈಗಾಗಲೇ ಈ ಮಸೂದೆ ಲೋಕಸಭೆಯಲ್ಲಿ ಅನುಮೋದನೆ ಪಡೆದುಕೊಂಡಿದೆ. ಹೀಗಾಗಿ ಈ ಮಸೂದೆ ಕಾಯ್ದೆಯಾಗಿ ಜಾರಿಯಾಗಲು ರಾಷ್ಟ್ರಪತಿಗಳ ಸಹಿಯೊಂದೇ ಬಾಕಿ ಉಳಿದಿದೆ.

ರಾಜ್ಯಸಭೆಯಲ್ಲಿ ಸುದೀರ್ಘ ಚರ್ಚೆಯ ಬಳಿಕ ಮಸೂದೆಯನ್ನು ಮತಕ್ಕೆ ಹಾಕಲಾಗಿದ್ದು, ಮಸೂದೆಯ ಪರವಾಗಿ 108 ಹಾಗೂ ವಿರೋಧವಾಗಿ 13 ಮತಗಳು ಚಾಲಾವಣೆ ಆಗಿವೆ.

ಪರಿಷ್ಕೃತ ಮಸೂದೆ ಅನ್ವಯ ಅಪಘಾತದಲ್ಲಿ ಸಾವನ್ನಪ್ಪಿದ ಕುಟುಂಬಕ್ಕೆ 5 ಲಕ್ಷ ರು., ತೀವ್ರವಾಗಿ ಗಾಯಗೊಂಡವರಿಗೆ 2.5 ಲಕ್ಷ ರು. ಪರಿಹಾರ ನೀಡಲಾಗುವುದು. ರಸ್ತೆ ಅಪಘಾತದಲ್ಲಿ ಸಿಲುಕಿ ಸಾವು-ಬದುಕಿನ ನಡುವೆ ಹೋರಾಡುತ್ತಿರುವವರನ್ನು ಆಸ್ಪತ್ರೆಗೆ ಸೇರಿಸುವವರ ರಕ್ಷಣೆ ಸೇರಿದಂತೆ ಇನ್ನಿತರ ಮಹತ್ವದ ಅಂಶಗಳನ್ನು ಮಸೂದೆ ಒಳಗೊಂಡಿದೆ.

ಯಾವುದಕ್ಕೆ ಎಷ್ಟು ದಂಡ?

- ಮದ್ಯಪಾನ ಮಾಡಿ ವಾಹನ ಚಾಲನೆ: 2000 ರು.ನಿಂದ 10000 ರು.

- ರ‍್ಯಾಷ್‌ ಡ್ರೈವಿಂಗ್‌: 1000 ರು.ನಿಂದ 5000 ರು.

- ಡಿಎಲ್‌ ಇಲ್ಲದೇ ಚಾಲನೆ: 500 ರು.ನಿಂದ 5000 ರು.

- ಮಿತಿಮೀರಿದ ವೇಗ: 1000 ರು.ನಿಂದ 2000 ರು.

-ಸೀಟ್‌ ಬೆಲ್ಟ್‌ ಇಲ್ಲದೆ ಚಾಲನೆ: 100 ರು.ನಿಂದ 1000 ರು.

- ಮೊಬೈಲ್‌ನಲ್ಲಿ ಮಾತನಾಡುತ್ತ ಚಾಲನೆ: 1000 ರು.ನಿಂದ 5000 ರು.

- ವಾಹನಗಳ ಇಂಜಿನ್‌ ಅಗತ್ಯ ಸ್ಟಾಂಡರ್ಡ್‌ ಇಲ್ಲದಿದ್ದರೆ, ಉತ್ಪಾದಕರಿಗೆ 500 ಕೋಟಿ ರು.ವರೆಗೂ ದಂಡ