ಮಾಸ್ಕ್ ಧರಿಸದ 4 ಜನ ವಿಮಾನದಿಂದ ಹೊರಹಾಕಿ ಪೊಲೀಸರ ವಶಕ್ಕೆ ಕೊಟ್ಟರು!
ಮಾಸ್ಕ್ ಧರಿಸದ ಪ್ರಯಾಣಿಕರನ್ನು ವಿಮಾನದಿಂದ ಕೆಳಗಿಳಿಸುವಂತೆ ವಿಮಾನ ಸಂಸ್ಥೆಗಳಿಗೆ ನಾಗರಿಕ ವಿಮಾನಯಾನ ಪ್ರಧಾನ ನಿರ್ದೇಶನಾಲಯ(ಡಿಜಿಸಿಎ) ನಿರ್ದೇಶನ| ಮಾಸ್ಕ್ ಧರಿಸದಿದ್ದ ನಾಲ್ವರು ಪ್ರಯಾಣಿಕರನ್ನು ಜಮ್ಮು ವಿಮಾನ ನಿಲ್ದಾಣದಲ್ಲಿ ವಿಮಾನದಿಂದ ಕೆಳಕ್ಕಿಳಿಸಿ ಭದ್ರತಾ ಏಜೆನ್ಸಿಗಳ ವಶಕ್ಕೆ
ನವದೆಹಲಿ(ಮಾ.18): ಮಾಸ್ಕ್ ಧರಿಸದ ಪ್ರಯಾಣಿಕರನ್ನು ವಿಮಾನದಿಂದ ಕೆಳಗಿಳಿಸುವಂತೆ ವಿಮಾನ ಸಂಸ್ಥೆಗಳಿಗೆ ನಾಗರಿಕ ವಿಮಾನಯಾನ ಪ್ರಧಾನ ನಿರ್ದೇಶನಾಲಯ(ಡಿಜಿಸಿಎ) ನಿರ್ದೇಶಿಸಿದ ಬೆನ್ನಲ್ಲೇ, ಸರಿಯಾಗಿ ಮಾಸ್ಕ್ ಧರಿಸದಿದ್ದ ನಾಲ್ವರು ಪ್ರಯಾಣಿಕರನ್ನು ಜಮ್ಮು ವಿಮಾನ ನಿಲ್ದಾಣದಲ್ಲಿ ವಿಮಾನದಿಂದ ಕೆಳಕ್ಕಿಳಿಸಿ ಭದ್ರತಾ ಏಜೆನ್ಸಿಗಳ ವಶಕ್ಕೆ ನೀಡಲಾಗಿದೆ.
ಅಲ್ಲದೆ ಪ್ರಯಾಣಿಕರ ಈ ವರ್ತನೆಯನ್ನು ದುರ್ವರ್ತನೆ ಎಂದು ಪರಿಗಣಿಸಿ ಇವರನ್ನು 3 ತಿಂಗಳಿಂದ 24 ತಿಂಗಳುಗಳ ಕಾಲ ತನ್ನ ವಿಮಾನ ಹತ್ತದಂತೆ ಅಲಯನ್ಸ್‌ ಏರ್‌ ವಿಮಾನ ಸಂಸ್ಥೆ ನಿರ್ಬಂಧಿಸಬಹುದಾಗಿದೆ.
ಅಲಯನ್ಸ್‌ ವಿಮಾನದ ಮೂಲಕ ಜಮ್ಮುವಿನಿಂದ ದೆಹಲಿಗೆ ಪ್ರಯಾಣಿಸಲು ಮುಂದಾಗಿದ್ದ ನಾಲ್ವರು ಪ್ರಯಾಣಿಕರು ಸರಿಯಾಗಿ ಮಾಸ್ಕ್ ಧರಿಸಿರಲಿಲ್ಲ. ಈ ವೇಳೆ ಸರಿಯಾಗಿ ಮಾಸ್ಕ್ ಧರಿಸುವಂತೆ ವಿಮಾನ ಸಿಬ್ಬಂದಿ ಪದೇ-ಪದೇ ಸೂಚಿಸುತ್ತಲೇ ಇದ್ದರು.
ಆದರೆ ಸಿಬ್ಬಂದಿ ಎಚ್ಚರಿಕೆಯನ್ನು ಉಡಾಫೆ ಮಾಡಿದ ಪ್ರಯಾಣಿಕರು ಇದೀಗ ವಿಮಾನದಿಂದ ಹೊರಬಿದ್ದು, ಭದ್ರತಾ ಸಿಬ್ಬಂದಿ ವಶಕ್ಕೆ ಸಿಲುಕಿದ್ದಾರೆ.
