ಅಬ್ಬಬ್ಬಾ... ನ.14ರಂದು ಪ್ರಪಂಚದಾದ್ಯಂತ 38 ಭಾಷೆಗಳಲ್ಲಿ ಸೂರ್ಯ ನಟನೆಯ 'ಕಂಗುವ' ಚಿತ್ರ ಬಿಡುಗಡೆ

ತಮಿಳು ನಟ ಸೂರ್ಯ ನಟನೆಯ ಐತಿಹಾಸಿಕ ಸಿನಿಮಾ ನವೆಂಬರ್ 14 ರಂದು ಪ್ರಪಂಚದಾದ್ಯಂತ ಅದ್ದೂರಿಯಾಗಿ ಬಿಡುಗಡೆಯಾಗುತ್ತಿದೆ. ಭಾರತದಲ್ಲಿ ಸುಮಾರು 6000ಕ್ಕೂ ಅಧಿಕ ಚಿತ್ರಮಂದಿರಗಳಲ್ಲಿ ತೆರೆಕಾಣುತ್ತಿರುವ ಈ ಚಿತ್ರ, ಕರ್ನಾಟಕದಲ್ಲಿ ಹೆಸರಾಂತ ಕೆವಿಎನ್ ಸಂಸ್ಥೆ ಮೂಲಕ ಬಿಡುಗಡೆಯಾಗುತ್ತಿದೆ. ‘ಕಂಗುವ’ 38 ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ ಎಂದು ಚಿತ್ರತಂಡ ಘೋಷಿಸಿದೆ.  38 ಭಾಷೆಗಳಲ್ಲಿ ಬಿಡುಗಡೆಯಾದರೆ ಅಷ್ಟು ಭಾಷೆಗಳಲ್ಲಿ ಬಿಡುಗಡೆಯಾಗುತ್ತಿರುವ ಮೊದಲ ಸಿನಿಮಾ ಎಂಬ ಖ್ಯಾತಿ ‘ಕಂಗುವ’ ಚಿತ್ರಕ್ಕೆ ದೊರೆಯಲಿದೆ. ‘ಈವರೆಗೆ ತಮಿಳು ಸಿನಿಮಾಗಳು ಬಿಡುಗಡೆಯಾಗದ ಜಗತ್ತಿನ ವಿವಿಧ ಪ್ರದೇಶಗಳಲ್ಲಿ, ಅಲ್ಲಿನ ಪ್ರಾದೇಶಿಕ ಭಾಷೆಯಲ್ಲಿ ನಮ್ಮ ಸಿನಿಮಾ ಬಿಡುಗಡೆ ಮಾಡುತ್ತೇವೆ. ತಮಿಳು ಸಿನಿಮಾರಂಗದಲ್ಲೇ ಹೊಸ ದಾಖಲೆ ಬರೆಯಲು ಹೊರಟಿದ್ದೇವೆ’ ಎಂದು ನಿರ್ಮಾಪಕ ಕೆ ಇ ಜ್ಞಾನವೇಲ್‌ ತಿಳಿಸಿದ್ದಾರೆ. ಸುಮಾರು 300 ಕೋಟಿಗೂ ಅಧಿಕ ಬಜೆಟ್‌ನ ಈ ಸಿನಿಮಾವನ್ನು ಸಿರುಥೈ ಸಿವ ನಿರ್ದೇಶಿಸುತ್ತಿದ್ದಾರೆ. ಬಾಲಿವುಡ್‌ ನಟಿ ದಿಶಾ ಪಟಾನಿ ಚಿತ್ರದ ನಾಯಕಿ.